اللہ سئیں قلندری سئیں کنے کئی وڈا کم گھنڑ چہندن ||شکیل نتکانی

شاعر، شاعری دے ذریعے الیندا پیا ہووے، تاں اوندی کئی وڈی کنے وڈی عجیب گاہل، عجیب نکتہ، عجیب خیال بس ایویں نارمل جھیاں لگدے تے نہ صرف قابلِ قبول ہوندے بلکہ داد وی ملدی اے، ہئیت تاں بندہ کئی وی اختیار کر سگدے لیکن اوندی حقیقی شخصیت اوں ویلھے سامنڑیں آندی جیہڑھے ویلے تساں اوندی شاعری نئیں اونداں گاہلیں سنڑو جیندے وچ او آپڑیں پورے قد کاٹھ، سوچ سمجھ تے علم و فراست نال کھڑا ہوندے۔

میکوں مخمور قلندری سئیں ہونڑیں دی مجلس وچ بہونڑ دا اج تک شرف حاصل نئیں تھیا لیکن اج ہک ویڈیو دے ذریعے انہیں دی شاعری دی بجائے انہیں دیاں گاہلیں سنڑیم تے میڈے دل بے اختیار گواہی دتی اے جو اللہ سئیں انہیں کنے کئی بہوں وڈا کم گھنڑے۔

او لوک خوش نصیب ہن جنہیں کوں انہیں دا قرب حاصل اے کیوں جو او انہیں دی پر مغز گفتگو انہیں دی زبان نال انہیں دے سامنڑیں بہہ کئیں، ساہ روک کئیں سنڑدے پئے ہودن۔

میڈا وی انہیں داں گالہیں سنڑ کئیں کئی واری ساہ رک گئے جو کتنی متانت کتنی سنجیدگی تے مہارت نال شاعرانہ ڈکشن کو استعمال کریندے ہوئیں دیرہ اسماعیل خان دے ہک وڈے مسئلے تے گاہل کریندے بیٹھین لیکن مسئلے دا حل انہیں اے ڈسے جو جیہڑے لوک مسئلے دی بنیاد ہن او جیہڑے ویلے ساڈی زبان سکھ ویسن ساڈے جھئیں تھی ویسن ساڈا مسئلہ آپئیں حل تھی ویسی تے ایکوں ہزاراں سال وی لگ سگدن،

ہزاراں سال بعد کیا تھی سگدے ممکن ہے جیویں او سوچیندے پئے ہوؤں اویں ناں تھیوے، پہاڑ توں لہونڑ والے آندے رہون تے پچھوں تے ناں ول ونجن تے بندوقیں والے آپڑیں بندوقیں وچ اضافہ کریندے رہ ونجن تے عین ممکن اے دیرے وال انہیں دی زبان سکھ ویسن۔ ہزاراں نئیں چند دہائیاں پہلے بنوں وچ وی سرائیکی بولی ویندی ہئی ہنڑ پتہ نئیں بولی ویندی اے یا کئے ناں۔

لیکن ول وی میکوں یقین اے کہ اللہ سئیں قلندری سئیں کنے کئی وڈا کم گھنڑ چہندن تے جتنا دھیان او شاعری تے دیندن اتنا او ایں پاسے ڈیون تے کئی بہوں وڈی تبدیلی گھن کے آ سگدن شرط ول وی اے ہے جو انہیں دی شاعری تے واہ واہ کرنڑ والے عملی میدان وچ وی انہیں نال کھڑن تے باقاعدہ جدوجہد شروع کرن پہلے مرحلے وچ قلندری سئیں، عثمان کریم بھٹہ سئیں، عاشق بزدار سئیں، حنیف جعفری تے بئے بہوں سارے وڈے ناں انہیں چیک پوسٹیں جنہیں دا قلندری صاحب ذکر کریندے بیٹھین وچو کہیں ہک چیک پوسٹ دے اگوں پرامن احتجاجی کیمپ لاون۔