سرائیکی صوبہ پٹھاݨ دی ہٹی|| ذلفی

کوئی آھدے تیرہاں ہوون ، بیا آھدے ستاہراں ہوون، بئے کوں جوش آندے او آھدے نہ ستاہراں گھٹ ہن اکوی ہوون ، کجھ وڈے مہان لوک آ کے ہوکا ڈیندن نہ اساں تریوی ضلعے گھنسوں تے میں آھداں تریوی کیوں اصل اچ تاں ستاوی ضلعے بݨدن ۔۔

جیکر فیصل آباد نیوحے گھندے تے انڈسٹری کتھوں آنیسوں تے ساڈا نو جوان بے روزگار رہ ویسی تے پنجاپی وت ساڈے اُتیں جنگھ ولا باہسی، ایویں اگر تُساں چکوال کوں چھوڑیندے پاؤ تاں ” سجیلے، نشیلے تے بھڑکیلے جواناں” تیں ساڈا کنٹرول نہ راہسی اساں اپݨے پُرکھیں کوں کیا منہ ڈکھلیسوں!!!

چکوال دے جرنیل ہی ساڈی سرائیکی قوم دی سٹریٹیجیکل ڈیپتھ کوں مزید ڈونگھا کریسن۔۔اگر اساں کسمپرسی کولو کم نہ گھنوں تاں اٹک وی ساڈے حصے اچ آندے کیوں جو جی ایچ کیو تائیں پجݨ واسطے اٹک کوں اپݨے ہتھ اچ رکھݨ بہوں ضروری حے۔ اگر تھوڑی جہیں مزید ہمت کروں چا تے پنڈی کوں اپݨے صوبے دا حصہ بݨایا ونڃ سگدے اے کم او کر سگدن جیرحے سیاسی طور تیں بہوں میچور تے ایں دھرتی دے اصلی تے سُچل پُتر ہن۔

ساڈی وستی دی گامو مائی بہوں قابل عورت ہائی تے گُزران وی بہوں چنگی ہاسی اللہ سئیں اوکوں اپݨی رحمت دے نال پورے ستاوی پُتر ڈتے ہن تے اجکل او ستاوی دے ستاوی ٻیلی ہن۔۔جے کر گامو کوں اللہ سائیں ستاوی پُتر ڈے سگدے تے اساں سرائیکیں کوں جیرھے اتنا مہان، سمجھدار تے مہا کلا کار ہن ساکوں اپݨی کریمی دے نال ستاوی ضلعیں دا صوبہ نئیں ڈے سگدا۔۔

میں تاں اللہ سئیں دی رحمت کولو مایوس کائینمہیں تُساں ہیک ڈیہنہ ڈیکھسو ستاوی ضلعیں تیں مشتمل سرائیکی دھرتی دُشمنیں دے ہاں تیں منگ ڈلیسی۔۔

ستاوی ضلعیں دا اے صوبہ اتنا طاقتور تے کمال گورننس دا نمونہ ہوسی تے اساں اپݨی صوبائی خود مختیاری دا فائدہ چا کے اقوام متحدہ سمیت وڈیں وڈیں سّپر طاقتیں کوں اپݨا گرویدہ بݨا گھنسوں تے دُنیا ساڈی ترقی تے حکمت عملی کوں ڈیکھ کے حیران تے پریشان رہ ویسی۔۔

تُساں حیران تے پریشان آلی مثال سُݨی تاں ہوسی بالکل ایں مثال آلی کار اساں پوری دنیا کوں حیران و پریشان کر ڈیسوں۔۔

جئے سرائیکی جئے سرائیکی عوام۔۔