کیا خواتین بہتر باس ہوتی ہیں؟|| شمائلہ حسین

زندگی میں ساس اور باس سے واسطہ تقریباً ہر کسی کو پڑتا ہے۔ اور یہ دونوں منصب کسی کو ملیں اور اس کا رویہ اپنی بہو، داماد اور ماتحت عملے کے ساتھ آئیڈیلی اچھا رہے یہ بھی ناممکن ہے ۔ کسی لمحے میں کوئی اچھا تو کسی وقت میں کوئی بھی کسی کے لیے برا ہوسکتا ہے۔ لیکن وہ ولایتی سیانے کہہ گئے ہیں نا کہ "باس از آلویز رائٹ ” ۔ تو باس کو یہ اختیار ہمیشہ کے لیے دے دیا جاتا ہے کہ وہ جو بھی کہے جو بھی کرے وہ غلط نہیں ہوسکتا ہے۔ چاہے پھر وہ ورک پلیس ہراسمنٹ ہو یا جنسی ہراسانی کا کیس اکثرو بیشتر سربراہ ادارہ اپنے منصب کا استعمال کرتے ہوئے اپنا دامن صاف بچا جاتا ہے ۔

لیکن جب سے پوری دنیا میں خواتین نے اپنی قابلیت اور محنت کے بل بوتے پر اداروں کی سربراہی کا سہرا اپنے سر لینا شروع کیا ہے۔ ماتحتوں کے مسائل کی نوعیت میں بھی تنوع آیا ہے۔ جب تک مردوں کے ہاتھ میں یہ پوزیشنز رہیں ان کے تحت کام کرنے والوں کو ضرورت سے زیادہ کام کا پریشر ، آفس کی سطح کی سیاست، اقربا پروری اور ملازمت کے کسی بھی ذاتی عناد کی بنیاد پر ختم کر دیے جانے کا خوف لاحق رہا۔

جب خواتین نے مخصوص شعبوں سے نکل کر مردوں کے لیے مختص ملازمتیں کرنے کا حوصلہ کیا تو مرد ساتھیوں کے مقابلے میں کم تنخواہ اور مرد سربراہوں کی طرف سے جنسی ہراسانی کے مسئلے کا سامنا کرنا پڑا۔

یہ بھی کہا جاتا رہا کہ مرد چونکہ عورتوں کے مسائل کو سمجھتے نہیں اس لیے ان سے تعاون نہیں کرتے ۔