مارچ 29, 2024

ڈیلی سویل۔۔ زمیں زاد کی خبر

Daily Swail-Native News Narrative

حسن مرتضی

محبت نال "کفار مکہ” وچوں۔۔۔حسن مرتضٰی

اجوکے عالمی ادیباں دے مسائل شئت انسانی کلھیپ ، آونڑ والی مشینی ذہانت، ماحولیاتی بربادی دے اثرات ، نویں ماڈرن دنیا دے ٹیکنالوجی وچ پھس کے کلھے تھیونڑ دے انسانی ڈکھ تھی سگدن ۔

حسن مرتضیحسن مرتضٰی 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

سئیں عباس زیدی دا ناول کفار مکہ جیندا ترجمہ کامریڈ عامر حسینی کیتا۔ پیارے دوست ملک سلیم تحفے اچ دتا۔ بی بی شہید دے حوالے نال کئی شئے وی ہووے اوکوں پڑھنڑ کنے بہوں ڈرداں جو من بہوں مونجھا تھی ویندے پر پڑھنڑاں وی ضرور ہوندے۔

پہلے ترائے باب ہنڑ تک پڑھ چکیاں ۔ میں ایں تحریر کوں ریویو تاں نا آکھساں نا ہی میڈی جرات اے پر جو محسوس تھیندے او لکھنڑ فرض اے۔ تے جیویں پڑھدا رہساں لکھنڑ دی کوشش کریساں ۔ ہک طبقہ اج ادب کو غیر سیاسی کرنڑ دے مشن تےگامزن اے ۔ جیہرا مٹی ایندے مسائل ایندے حقوق توں بے بہرہ تھی کے تہاکوں ادبی منشیات ڈتی رکھدے پر اینجھے ادیب گھٹ ہن جیہرے اپنڑی وسوں دے اینجھے حقائق لکھ سگدن جیہرے خطرناک سچ ان تے ریاست تمام تر وسائل پراپیگنڈا انھاں کوں لکاونڑ واستے لائی رکھدی اے۔ عشق محبت توں انکار کڈاہیں نئیں کیتا پر کیا اے سماج جتھاں علم آلے گھر گھر روٹی کھاونڑ وی حرام اے ساکوں عشق دے اجازت ہے۔ ؟

اجوکے عالمی ادیباں دے مسائل شئت انسانی کلھیپ ، آونڑ والی مشینی ذہانت، ماحولیاتی بربادی دے اثرات ، نویں ماڈرن دنیا دے ٹیکنالوجی وچ پھس کے کلھے تھیونڑ دے انسانی ڈکھ تھی سگدن ۔ پر تریجھی دنیا آلے کتھ مرن جنھاں توں جیونڑ دا حق کہیں ویہلے رنگ دے ناں تے کھسیا ویندے تے کہیں ویہلے مذہب اتے قومیت دے ناں تے ۔ ساڈا ادیب تاں ایہے دکھڑے لکھسی۔ او وسوں جتھاں ونڈ توں پہلو عید محرم دیوالی ہولی کٹھے رل مل منائی گئی اتھاں میجر محی الدین رانا دا جنم کیویں تھیا ۔؟ دارا کوں عشق توں پہلو سیاسی جدوجہد کرتے جیونڑ دا حق وی گھنڑاں پوسی کیوں جو انسانی حقوق تاں خدا دی غیر مشروط اطاعت نال بدھے کھڑن۔

 

ابتدائیے وچ جیویں کربل دا قافلہ دمشق داخل تھئیا اے بہوں دردناک منظر اے ۔ قافلہ سالار ہک تریمت اے ۔ جنیدا حوصلہ بہادری سوہنڑپ زنجیراں اتے شامی پراپیگنڈا دے زیر اثر ریاستی مسلمان وی نئیں کھس سگیے ۔ ول اوندی گرجدار تقریر۔ اگو کیفے منیر تے بیٹھے حلاجیاں دا گروہ جیندا سربراہ بڈھڑا پروفیسر ہنڑ وی اکھاں وچ مساوات تے گل وچ صوفی ازم دی پوشاک پا کے جمہور دے خواب ڈیہڈا بیٹھے تے جوانیں کوں وی راہ ڈکھائی رہندے۔ پر دارا کیا کرے جیندے دل وچ لالین دے مصوم محبت اوکوں ایں جگ کنے وی بیگانہ کیتی ویندی اے ۔ اوندے سوال وی اوندی محبت کار ہن جو اگر منصور سولی چڑھنڑے تے ول سیاسی ناکامی تھئی ایندا جواب تھی سگدے ۔

نال اوندا ماضی جیہرا علی پور دے اوں ٹبے نال جڑیا کھڑے جتھاں میجر رانا اوندی نانکی برادری کوں اوویں کٹھا ہا جیویں فرات کنارے یزیدی فوج نے حسینیاں کوں ۔ میجر رانا دی مکاری ، اسلامی انتہا پسندی دے غلیف اچ غلیظ منافقت اتے معصوماں دے قتل دیاں دلیلاں جیہریاں سیاق و سباق توں بغیر قرانی آیات وچوں ہن ۔ ول مظلوم تریمتیں وچوں سبھ توں سوہنڑی تریمت ” منصفانہ تقسیم ” دے مطابق میجر دے حرم دی زینت تے باقی رل پھل گئیاں ۔

پاکستانی ، سعودی خفیہ اداریں دا افغان جنگ وچ مکرہ کردار تے ایں جنگ کوں اسلامی غلیف پوا کے انھاں مظلوم طبقات دی نسل کشی جیہرے انھاں دے غلیظ تذویراتی جنگ دے اگوں کندھ بنڑیے ۔ ضیا الحق دا میجر کوں فتح دی مبارک ڈیونڑ ۔ نال واشنگٹن اچ جشن ۔ کیا کیا دروہ جہاد دے ناں تے ایں مٹی نال تھئے تے اوندے نتیجے لوک کیویں متاثر تھئے ناول انصاف نال ڈسائی امدے۔ اگلے باب تے ناول ساکوں کتھاں پندھ کرویندے کر ڈیہدے۔ دارا دی محبت کیا تھیسی ۔ کیا حلاجیں دے خاب سچے تھیسن ۔ کیا ول منصور سولی چڑھ کے جیتسی یا ہر ویسی ۔ ول دارا دی محبت دا کیا؟ جیہری اوکوں ایں جہان توں ایں ماورا کر دتے ۔

%d bloggers like this: