آفت زدہ ہک تحریر۔۔۔ اشولال

باہروں در کھڑکیا
ذال میکوں آن ڈسایا جو ہک فقیر خیرات کھڑا منگدے اتے بڑ بڑ کریندی لگی گئی تے فوراً ول آی ۔گھر اچ دھیلا دمڑی کجھ نی پیا اوکوں اٹے دی پلیٹ ونج کے ڈے آو خیال نال ماسک پا کے دور کنوں۔ پلیٹ واپس وی گھن آنونی ہے میکوں لگیا جیویں آہدی کھڑی ہوے فقیر کوں بھکشا نی ڈیونی۔۔۔۔۔۔۔۔۔۔۔پرے کنوں دُر دُر کرنے ۔۔۔۔۔۔۔۔
میں کھلدے ہوئیں فقیر توں پچھیا ۔مریں۔۔۔۔۔۔۔تیکوں کرونا توں ڈر نہیں لگدا؟
تاں فقیر میں توں وی ڈھیر مطمئن اداسی نال بولیا ۔۔۔۔
آوے تاں سہی ۔۔۔ناساں نہ مل گھتیساں کرونا دیاں۔
حالانکہ فقیر آپ وی ماسک پاتی ودا ہا وت وی وبا دے کہیں خوف توں مکت ہا۔
وبائیں دی کتاب کھولوں تاں اے کوئی ننواں واقعہ نی٫البتہ ایندا گلوبل ہسٹیریاGlobal Hysteria بنن ہک ننواں واقعہ ہے۔ مارن کوں تاں ہک مچھر وی سکندر اعظم کوں مار سگدے ،فرعون داتخت ہلا سگدے،نمرود دیاں ناساں مل سگدے۔۔۔۔
ایمازون دے جنگلاں وچ آہدن مچھراں دے اے جھیں غول چھتھے پین جےکر اڈ پوون  تاں سامری بادشاہ دے جلوہ خیز تمدن دی خیر نی۔پر شاید 2050 تئیں اینہاں جنگلاں کوں قتل کر ڈتا ویسی۔مچھر شودے کوں جو کرنا ہے 2050 توں پہلے پہلے کرنے۔
علم دی کتاب شودی اے وی ڈسیندی ہے جو ایمازون دے جنگل دنیا دے پھیپھڑے ہن اساں پھیپھیڑیاں متوں راہون چاہندے ہیں کتنے بود ہیں۔
ڈیکھو۔۔۔۔۔نکی دھی اپنی گریٹا تھن برگ متھا ڈتی تاں ودی ہے سامری کوں ۔۔۔۔۔
اللہ نال ہووس ۔
میں بیٹھا سوچینداں جو بندے کوں ،ایندے عظیم الشان تمدن کوں تاں چھڑا ہک پلوتا ای کافی ہے۔
کرونا تاں وت ہک آفت ہے جیڑھی سامری بادشاہ کوں آن لگی ہے
جے کر اینویں بہہ  یاد کروں تاں اے وی ہک اےجیہاں وائرل فلو ہے جیں تل وطنی ریڈ اینڈینز دی 60 فیصد ابادی مکا ڈتی ہئی ۔اے آفت پھیلاون آلے تاجر آہدن مسٹر کولمبس دی اگوانی اچ خبر ایہا ہے جو اے وبا اٹلی اچ انہاں تاجراں کوں ودی گولیندی ہے۔
سامری بادشاہ دی پوری امپائر اوندا پورا گلوبل سامراج خطرے نال دوچار ہے اوندے جہاز ,بلڈوزرز،کریناں،ٹریناں تے مریخ فتح کرن دے مشن ،۔۔۔۔۔۔جام تھی گین۔
لگدے دنیا جیویں تھم گئی ہووے۔دراصل ایہو تھہار آتے سکون ہی کیپیٹلزم دی موت ہے
وت وی بے سکونی دی جنگ جاری ہے۔انسان ہمیشاں جنگ جیت ویندے پر وبا وی نہیں ہاردی ول ول شکلاں وٹا کہ آندی ہے۔کڈاہیں قدرت دے کہیں شگون دی شکل اچ تے کڈاہیں کہیں چتاونی دے روپ اچ۔
ممکن ہے اے وبا ای انہاں ٹھوکویں عقائد کوں تبدیل کر سگدی ہووے، جیڑھے انسان دوست نہیں رہ گئے شاید بے مہابا ترقی اتے اوندے مراق مارے جنون کوں ختم کر سگدی ہووے۔
شاید قدرت اے موقع ڈیون چاہندی ہے جو اساں جانوراں کوں، جنگلاں کوں،دریانواں کوں ،انساناں کوں ،پکھیاں کوں حیاتی نال پورے ایندے جگ جیون کوں محفوظ بنا سگدے ہیں۔
ایکوں کشادہ، پر امن،اتے انسان دوست جہان ڈے سگدے ہیں۔
پر ساڈی بدقسمتی اےہے اساں کہیں وباکوں شگون اتے چتاونی طور نہیں گھندے نا ہی ہیضے دی وبا اچ کہیں نال محبت کریندے ہیں۔
پہلا بند۔

,

ڈوجھا بند

میں شناں کوں اپنی ہک نظم ،طاعون ، سنا کہ ولا بیٹھاں کھلداں جو آخر میکوں کیوں اے یقین ہے جو انسان ہک ڈینہہ خود کوں تبدیل کرن تے آمادہ تھی ویسی پر اوں بے دخلی دا کیا تھیسی جیڑھی تاریخ اچ جرائم دے طور تے درج ہے۔
،کجھ لوک چوہیاں کوں مار کے طاعون دا مقابلہ کریندن
کجھ لوک چوہیاں دی پوجا نال طاعون دا مقابلہ کریندن
انت ڈوہیں مر ویندن
,
،طاعون,

تاں شناں میکوں کھل کے آکھن لگی، لگدے فقیر تہاکوں وت کوئی ننویں پٹی پڑھا گئے۔
میں مونجھا تھیا بیٹھا ہم یا پتہ نہیں خوش تھیا بیٹھا ہم اپنے آپ کوں بیٹھا اہداہم
ڈیکھ تاں سہی بھیڑا۔۔۔۔ویٹی کن سٹی،گرجے، مسیتاں ۔۔۔۔۔مندر خالی تھئے پین۔
اپنے خادمین دے بغیر اللہ سائیں دا گھر کتنا پر سکون ہے۔
پریشان صرف شیطان تھیا ودے جو اوکوں وٹے مارن آلے خبرےکتھاں لڈ گین۔
خوف ،بھئے،یقینا آپ ہک وبا ہوندی اے ایں وبا پچھوں شاید اپنے عقائد کوں ولا سمجھن اچ مدد ملے۔۔۔۔۔
کیا پتہ شاید ایہا وبا ای , Beginning to the end
of capitalism, دا شگون ہووے
میں نا امید نی ۔۔۔۔۔تھی سگدے اے وبا خوف توں ماورا ننواں ہک انسان دوست مینفیسٹو لکھن آئی ودی ہووے۔
چینی یا کرونا وائرس دا خوف گلوبل کلٹ Global cult اتے اوندی Hunger Games دا المیہ ہے
جیکوں اپنی اپنی وسوں وسیب اچوں ولا بہہ کے سوچن دی لوڑ ہے جو کرونا کیویں کہیں فقیر دا خوف نی بلکہ سامری بادشاہ اتے اوندے گلوبل راج دا حصہ ہے۔
وبا شاید اتنے بندے نی مریندی جتنے بندے جنگاں مریندین،تیز رفتاری مریندی ہے،نفرت مریندی ہے عقیدے مریندن جنہاں دے نزدیک ترائےچار کروڑ بندے مارن کوئی المیہ نی۔
اے او بے رحمی ہے جیڑھی ہیرو شیما اتے ناگاساکی کوں چند سیکنڈز اچ سڑکاں تے فوٹو وانگوں چھاپ سگدی ہے۔نادر شاہ درانی صرف پنج گھنٹے اچ ترے لکھ بندے مارن دا اعزاز حاصل کر سگدے۔
ہلاکو,چنگیز،سکندر اتے ہٹلر وانگوں
پر سامری بادشاہ انہاں جنگاں ، جنگ جوآں، قوماں، مزہباں،بے مزہباں دا کوئی لاک ڈاؤن کرن سانگے تیار نی۔
ایکوں تاں ہک کورونا وائرس ای بد حواس کر سگدے۔جیڑھا نظر وی نہیں اندا وت وی ساری دنیا کوں ہر جاہ ڈسدا پے۔
کتنا خوفزدہ ہے سامری دا سامراج تے نال اساں شودے اچھوت وی۔
سامنے ٹی وی تے وزیراعظم صاحب بیٹھے فرمیندن،کورونا سے ڈرنا نہیں کورونا سے لڑنا ہے،
لڑائی وی آہدن خوف دی ہک شکل ہوندی ہے۔
احتیاط اتے علاج بئی شے ہوندن۔
اتے گلی اچوں فقیر صدا ویندا ڈیندے۔۔۔۔۔۔۔۔سنو بھئی سادھو ۔۔۔۔۔۔آفت دی کوئ شکل نہیں ہوندی آفت تاں بندے دی اپنی ہی شکل ہے۔تھی سگے تاں اپنی اپنی شکل کوں ولا وٹاوں، متاں وٹیج پوندی ہوے۔اجاں تاں عالماں اے وی نی ڈسایا جو کورونا نر ہے کہ مادی۔
اشو لال
25 مارچ 2020
لال عیسن کروڑ ۔

dailyswail

See author's posts