وئے پاندھی۔۔۔۔۔
آ ساکوں دریا دا چکر لوا
پاندھی ہک گھلا پچھو تے مڑ کے ڈٹھا تے ولا انڑ سنڑیا کر کے بیڑی ٹھلیی ٹر پیا
نینگر ولا ہکل ماری
پر پاندھی اج پیلھی دفعہ بٹوائ ویندا ہا
اوندے بٹوانونڑ دی
ہک وجہ نہ ہئ
بلکہ درے ساریاں ہن ۔ ہک تاں او 70سال دا بڈھڑا ہا اوندیاں لتاں بانہاں ساتھ نہ ڈیندیاں ہن
ڈوجھا۔مہینہ پہلے تھئ ہوئ اوندی ذال سہاگی دی موت اونکوں
اندری اندر بھن تروڑ کر چکی ہئ۔
پر اصل گال اے ہئ جو صرف دریا آکھنڑ پاندھی کوں بے ادبی لگدی ہئ۔ او آپ تاں اینکوں بابا آہدا ہا تے اوندے ممہانیں کنیں وی اتلا توقع رکھیندا ہا جو اینکوں سندھ مہاراج ضرور آکھن۔
او نینگر آپنڑی سوانڑی یا سنگتانڑی دے رلے وی یقینن پاندھی دے جزیرے تے ونجنڑ چانہدا ہا
پر پاندھی اج آپنڑے جزیرے نال کلہا باہونڑ چاہندا ہا
کانہہ کانے جھگی جھمبرا ونڑیں دا جنگل تے اوندے اتے راہندے پکھی۔ آپنڑی 40سال دی ساری سنگت نال چھیکڑی مکلاوے دی سوچ سوچی ویندا ہا
سوچیں سوچیں وچ کندھی کنیں اوندے جزیرے تک دا ڈو میل دا پندھ اج ڈو سو میل دا تھی چکا ہا
جے تائیں اونکوں چپو مارنڑ یاد امندا ہا پانڑی بیڑی کوں کھن تائیں پریں نے چکا ہوندا ہا
40 سال پہلو اوندے اتھاں آنونڑ دا ویلہا وی اونکوں ہنڑیں دی گال لگنڑ پئے گیا
جڈاں سہاگی تے او اتھاں ان پجے ہن ۔ ایڈو اوڈو پانڑی ہا ادھ ءچ ویہہ پنجویہہ قلعے جتناں ٹبا ڈیکھ تے جھمبھرا بنڑا ڈتونے
روزانہ پرہ پھٹدیں 2 چھج چھبیاں یا ٹوکرے چا کے پاندھی گھرو نکلدا ہا تے نال آلے بیٹ ءچ کہیں نا کہیں کوں ڈے کے ڈو پانڑاں اٹے دیاں گھن کے گھر ول امندا ہا
ایں ریوند ءچ ویلہا گزردا رہا
چھوٹے چھوٹے ۔سرینہہ ۔ٹولہا۔ بیر ۔کنڈے۔ ککر ۔دے بوٹے بہوں وڈا جنگل بنڑ گئے
سندھ مہاراج دی وی پاندھی نال اتلا محبت ہئ
چدھارو ہوونڑ دے باوجود وی اوں پاندھی دے جزیرے دی ہک بھک نہ ولا گدھی۔
ہولیں ہولیں لوکیں کوں پتہ لگا لوک گرمیں کوں ٹھاڈھل تے وخت گزارنڑ سانگے پاندھی دے جزیرے تے آنونڑ پئے گئے
ولا تاں کیا ہاڑ دی دھپ کیا پوہ پالا پاندھی دا جزیرہ سیر گاہ بنڑ چکا ہا۔
روز دی ریوند لگی رہ ویندی ہئ چار بندے چا کے پاندھی کندھی تے ان پچاوے ہا تاں اٹھ بے جزیرے تے جلنڑ واسطے پہلے کنیں آئے کھڑے راہندے ہن۔
مسلمان واسطے پاندھی خان ہندو کیتے پاندھی رام سکھ لیوں پاندھی سنگھ
کڈاہیں کڈاہیں ایں وی تھیندا ہا جو ہکے لہظے ترائے ترائے مذہب پاندھی دے گریڑے تے پناہ ونج گھندے ہن
نہ اچی نہ بچی پاندھی آپنڑی ہک نویکلی دنیا وسائ پیا ہا
چھوٹے جھمبھرے ءچ پاندھی تے پاندھی دی ذال سہاگی راہندے ہن
تے وگھے کھن دی وتھی تے ہک وڈا جھمبھرا ہا جتھاں اوندے بابے (سندھ مہاراج)دے ممہان ٹکدے ہن
پاندھی دے ذمے روٹی پکوانونڑ ہوندا ہا
ممہان اٹا نال چائ ودے راہندے ہن۔ بھاجی دا ترتل وی آپ کیتی ودے راہندے ہن یا سندھ مہاراج دے پیٹ ءچو ان کڈھدے ہن
کڈاہیں کڈاہیں تریہہ تریہہ ممہان وی آ ویندے ہن تے سہاگی سارا ڈینہہ روٹی پکانونڑ ءچ لگی رہ ویندی ہئ۔
پر مجال ہے جو کڈاہیں منہ کمڑاوے ہا
ڈوہیں ذال پئے سندھ مہاراج دے ناں توں وکانڑے ودے ہن
انہیں دی ہکا گال ہئ۔۔ سندھ مہاراج ہے تاں اساں ہیں
اے ساڈا پیو ماء اے ساڈے پیو ماء دے ممہان ہی ساڈا سب کجھ ہن۔
کڈاہیں کڈاہیں ہکڑ ڈکڑ ممہان حجت ھیل کر وی باہندا ہا
پر ککھ کانے ہوندیں ہوئیں وی پاندھی کہیں ڈوجھے مذہب دا جھمبھرا نہ بنڑایا
ہنالے تاں روٹی کھا کے ہر بندہ جتھاں دل آہدی ہئ تڈی تکڑا وچھا کے سم ویندا ہا
پر سیالے سونہے انڑ سونہے سمھنڑ دے ویلھے ہکے جھمبھرےءچ ہوندےہن
پاندھی ۔خان۔رام۔سنگھ ساریں دے کٹھے ہکو جیہاں رلیا رہ ویندا ہا
کجھ ممہان اینجھے وی آ نکلدے ہن جیرھے چس ءچ آ کے پاندھی کوں نال نیونڑ سانگے محل ماڑیاں وگھے ڈیونڑ دیاں ہامیاں وی بھر باہندے ہن
پر پاندھی ہکا گال کریندا ہا ۔جے تائیں میں بابے دی جھولی ءچ ہاں میں ٹھیک ہاں ۔جے اتھو نختم تاں میں رل ویساں مر ونجاں ہا وی ٹھیک ہا
پاہر ڈینہہ دے کوں کندھی توں ٹھلہنڑ آلا پاندھی اج آپنڑی گزری وہانڑی یاد کریندا ہویا جیرھلے گھر پجا تاں نماشاں تھی چکی ہئ۔
پاندھی ترئے ڈینہوار آپنڑی اوں دنیا ءچ گم گار رہ گیا آپنڑی 40سال دی سنگت نال مکلیندا رہ گیا
ترائے ڈینہہ دے بعد پاندھی دی بیڑی کندھی ان لگی
پاندھی بیڑی کوں بدھا ڈو نینگر بن پچھے بیڑی تے چڑ بیٹھے
پر پاندھی انھیں کوں آپنڑی وسوں تے نیونڑ دی بجائے آپ کہیں بی وسوں دو روانہ تھی گیا
ویندیں ویندیں ہک وسوں دی مسیت دے نلکے توں پانڑی پیونڑ کیتے رکیا ۔ پانڑی پی کے نلکے توں ہٹیا تاں السلام علیکم ورحمتہ اللہ وبراکتہ کریندیں ہوئیں ماہی سنارے گلتھا ان بھریا
وعلیکم سلام۔خیر خوش تھئ
اے حضرت صاحب کون ہن سائیں؟؟؟
اے سائیں پاندھی خاں ہن انھیں دی سندھ مہاراج دی آدھی ءچ بہوں ہی سونہڑی جھوک اے اساں انھیں دی جھوک تے ترائے چار گھلہ تھی آئے ہیں ساڈے سنگتی ہن ماشاءاللہ بہوں چنگے بندے ہن
ماہی سنارے امیر صاحب کوں پاندھی دے بارے ڈسیا
تساں اینویں کرو ساڈی جماعت اتھائیں آئ ہوئ اے اج شام دی روٹی وی ساڈے رلے کھا گھنو نماز دے بعد حضرت صاحب بیان فرمیسن او وی سنڑ گھنسو ۔۔جے ساڈی اے حجت منیندے ہئو تاں ہوسی تہاڈی مہربانی۔
ماہی سنارے پاندھی تے زور ڈتا تے پاندھی اوندی گال من گدھی۔
بیان دے بعد پاندھی نال سوال جواب تھیونڑ پئے گئے
پاندھی کلمہ تاں فر فر سنڑوا ڈتا قل وی سنڑوائے پر الحمد تے اتحیات نہ امدے ہن
ماشااللہ ماشااللہ پاندھی خاں تیکوں قل کلمہ امدن پیاں توں ماشااللہ مسلمان ہییں۔ پر پکا مسلمان نوہیں
ہاں کچا مسلمان ہاں ؟؟
پاندھی سر چا کے ماہی سنارے دو ڈہدیں ہوئیں آکھیا
ہا۔۔۔ توں اینویں کر تونڑیں ترائے ڈینہوار ساڈے کٹھے رہ ونج اساں تیکوں پوری نماز سکھال ڈیسوں
پاندھی ماہی سنارے دی اے گال سنڑ کے وی ترائے ڈینہہ راہنڑ تے تیار تھی گیا۔
ترائے ڈینہہ دے بعد پاندھی پوری نماز سکھ کے 5وخت دی نماز پڑھنڑ دا وعدہ ڈے کے اتھو روانہ تھی پیا
اوں جزیرے دے
مہابیو پاندھی کوں ہر وستی ءچ کوئ نہ کوئ سونہاں وی ٹکر ویندا ہا
تے نماز پڑھدیں ہوئیں وت کوئ نویں گال وی مل پوندی ہئ
اج او ترائے نمازاں پڑھ کے ترائے مولویں کولو پکے مسلمان تھیونڑ دے ترائے طریقے سکھ چکا ہا۔
ہتھ ناف دے اتو بدھنڑن
ہتھ دنی دے اتو بدھنڑن
ہتھ بدھنڑے نہیں ہتھ تے ہتھ رکھنڑے او وی سینے تے ۔ولا رفع یدین وی کرنڑے’۔’
پاندھی او رات اوکھیں سوکھیں گزاری تے ڈوجھے ڈینہہ ہک انڑ سونہے پاسے منہ کیتا
پیشیں کوں او ہک بی وستی ءچ ونج پجا
مسیت ءچ لوک کٹھے ہن نماز تھیونڑ آلی ہئ پاندھی وی وضو کر کے پج گیا
پر اتھاں تاں نماز وی بی ہئ امام دے پچھو اللہ اکبر دے بعد کلہا پاندھی ہا جیرھا ہتھ بدھی کھڑا ہا جیرھے اوں ایڈیں اوڈیں کانڑی اکھ ڈیکھنڑ دے بعد کھول ڈتے
وت اللہ اکبر تے پاندھی رکوع تے لگا گیا اڈیں اوڈیں کانڑی اکھ ڈیکھنڑ نال پتہ لگا جو سارے دعا دے ہتھ کھڑے کیتی کھڑن
سلام پھیرنڑ تے پاندھی نماز ادھوری چھوڑ تےنکلنڑ دی کیتی
وت اگو تے روانہ تھی پیا
رات ہک جاہ تے بر ءچ گزار کے سویرے جیرھی وستی ءچ پجا
اتھاں ہندو راہندے ہن
ہک مندر ءچ پج گیا تے چپ کر کے ہک پاسو چنڈ ءچ بہہ گیا
چنگے لہظے دے بعد پنڈت جی دے نیڑے تھی ہک سوال پچھس
ہیں سائیں اتھاں وی کچا ہندو پکا ہندو ہوندے؟؟؟؟
اجاں پنڈت اوندے سوال دا جواب کیناں ڈتا ہا
باہرو شور شرابا تھیونڑ پئے گیا ڈوہائیں جڈاں باہرو ان کے ڈٹھا تاں ڈاہ بارہاں بندے کاتیاں کہاڑیاں چا کے مندر دو امندے پئین تے نعرے وی مریندے امدن
نعرہ تکبیر۔ اللہ اکبر
پاکستان ۔ زندہ باد
یہ بھی پڑھیے
”کوئی خواب میکوں اُدھارا نہ ݙیویں“ (وسیب یاترا :12)||سعید خاور
”بدن دی بھوئیں تے مُونجھ دا متام“ (وسیب یاترا :11)||سعید خاور
””سندھو سکرات وِچ اے“ (وسیب یاترا :10)||سعید خاور