استاد فدا حسین گاݙی دی برسی دے موقع تے سرائیکی لوک سانجھ انہاں دی کتاب چھاپی ہے ۔ڈیلی سویل تے قسط وار اے کتاب چھاپی ویسی ۔ پہلی قسط حاضر ہے ۔۔
اڳونہی ڳالھ
اُستاد فدا حسین گاݙی دے جھوک لݙا ونڄݨ دے پورے ہک سال پچھوں، اے کتاب پیلھی لِنگ جنوری 1994ء وچ ” سرائیکی کلچر” دے ٹائیٹل نال چَھپی۔تݙاں اینکوں چھاپݨ دا اَہر سئیں اکرم میراݨی تےلیہ دی سنگت دی پاسیوں تھیا جنہیں اُستاد فدا حسین گاݙی دے کُجھ چوݨویں لکھتیں کوں کتابی روپ ݙے کنیں چھپوایا۔
ٻہوں وݙی مُدت گُذرݨ پچھوں اے کتاب ” آؤٹ آف پرنٹ” تھی ڳئی تے سرائیکی سنگت دی پاسیوں کئی واری آکھیا ڳیا جو اوں کتاب تے ٻہوں ساریں ٻنہیں اݨ چھپئیل لکھتیں کوں رَلا کنیں ہک ننواں ایڈیشن چھاپیا ونڄے۔ آہدن جِتھاں ارداہ ہووے، اُتھاں راہ بݨ ای ویندی ہے۔ اے ودھیک لکھتیں آلی کتاب پورے چَھوی ورہیں پچھوں چھپ کنیں تہاݙے ہتھیں ہے۔
سرائیکی لوک سانجھ (اسلام آباد)
سرائیکی وسیب دا عظیم دانشور
اُستاد فدا حسین خان دی شخصیت، اُنہاں دیاں خدمات بارے کُجھ آکھݨ سوکھا نئیں۔ اُنہاں دی سیاسی اَتے علمی زندگی لمبی وی ہے اَتے پُرپیچ وی۔ ایں بارے زیادہ وضاحت نال تاں سئیں محمود نظامی، ارشاد تونسوی، منصور کریم اَتے مظہر عارف کجھ آکھݨ دی پوزیشن وچ ہوسن, میں تاں چَھڑا اے آکھساں جو ساکوں اُنہاں نال اختلاف وی ریہے اَتے اتفاق وی، پر وَل وی محبت اَتے عقیدت دا رشتہ ہمیش قائم ریہے۔ اُنہاں ہمیش ساکوں اپݨی رہنمائی اَتے محبت نال نوازے اَتے کم کار کیتے رہنمائی فرمیندے رَیہن۔ سرائیکی کلچر بارے لِکھݨ اَتے سمجھݨ کوں اَہدے رَیہن۔
اُستاد فدا حسین گاݙی دے اے مضمون جیڑھے کتابی شکل وچ تُہاݙے سامݨے ہِن، شاید ہک کتاب وچ چھپݨ لوں نہ لکھے ڳئے ہَن پَر اِنہاں دا ہک ٻئے نال ایہو جھیاں تعلق ہے جو اَساں اِنہاں کوں کتابی شکل وچ چھپاوݨ دا فیصلہ کیتے۔ اے کتاب جتھاں ٻنی، تھل اَتے چولستان دی تَس دا اظہار ہے، اُتھاں کچھی دی اُلفت اَتے سرائیکی لوکاں دی کسمپرسی اَتے محرومی کوں ایں طرانح پیش کیتا ڳئے جو دِل ٻُجھ ویندے۔ سرائیکی وسیب دے وَکھرپ، ثقافت اَتے قومی سُنڄاݨ دی ایں کن مناسب وکالت شاید اِی کہیں کیتی ہووے۔ اے کتاب سرائیکی وسیب دے اُستاد، دانشور اَتے رہنما دی علمی کاوش دا ہک نمونہ ہے۔ میکوں ایں ڳالھ دی خوشی ہے جو دوستاں میکوں ایں کم لائق سمجھے جو اُستاد فدا حسین خان دے کم کوں سرائیکی و سیب دے سامݨے پیش کراں۔
اکرم میراݨی، جنوری 1994ء
یہ بھی پڑھیے
”سیفل نامہ“ مولوی لطف علی تے محبوب مٹھل مجاہد جتوئی||سعید خاور
”ساڈے دل دریا، ساڈی اکھ صحرا“(وسیب یاترا :21)||سعید خاور
”دریا او دریا، پاݨی تیݙے ݙونگھے“(وسیب یاترا :20)||سعید خاور