سندھو دا پُتر۔۔۔

حسن مرتضی

سندھو دا پتر عجیب بندہ اے یار. بالکل وکھرا. اپنڑے عشق اچ سچا تے سجاک. امیر زادہ تے سردار زادہ ہا. کیا لوڑھ ہئی ضیا الحق دے دور اچ بھٹو خاندان نال جوڑ کرتے اپنڑے اتے مصیبتاں دے در کھولنڑ دی. بس پتا نہی کیا سوچ ہئی جیرھی ہیکوں عشق دے اوکھیں راہیں رول ڈتے. بی بی شہید نال جوڑ بنڑیے تے فخر نال آکھیس ہنڑ بی بی جیل نا ویسی. ول ایویں تھیا ہر جاہ بی بی دی جاہ تے ہیندے اتے جبر دے تیر وسائے گین.

جیل بھگتائس اتلا مار کٹ کیتی گئی جو چولا رت کنے جبھیج گیا. زبان کٹی گئی پریشر سٹیا گیا جو بی بی شہید دی عزت تے حملہ کرتے طلاق دے ول موج ہی موج توں سکھی ہوسیں. لیکن وت اے کھڑ گیا. ول بی بی وی تاں ہیندے نال پریت نبھائی تے آکھیا جو آصف ایشیا دا نیلسن منڈیلا اے. ول پریت دی کہانی وچ نکھیڑے دا ویہلا اندے.

اوہو ویہلا جڈاں کچے گھڑی عشق کوں رول ڈتا. اوہو ویہلا جڈاں کیچ دے لوکیں ستی سسی کولوں پنل کھس گدا. اوہو ویہلا جڈاں زہر کھا تے عشق کوں ختم کرنڑ دی کوشش کیتی گئی. اوہو ویہلا جڈاں عشق بر بیابان اچ تسا کلہا ماریا گیا. بی بی شہید پنڈی دے کوفے اچ یزیدی فوج ہتھوں ایویں ماری گئی جیویں کڈاہیں بابا شہید کوں منصور وانگوں قتل کیتا گیا. جیویں سرمد مریجا. بابا شہید تاں وت وی خوش نصیب اے جو ہوندے قاتل پوری خلقت اکھاں سامنڑے ڈٹھے. لیکن بی بی شہید ویہلے تے وکھرا مقتل سجیا. لک تے ماریا گیا شئیت بی بی شہید توں بابا کنے ودھ ڈردے ہن.

اے اوکھا ویہلا ہئی. پر عاشق ول ای صبر کیتس نا بدعا دتس نا لڑ بھڑ کیتس. پاکستان کھپے دا نعرہ لادتس. بی بی دا پاک خون چا تے ہی وفاق دے ونڑ دے پاڑیں اچ سٹ چھوڑیس تے ہیکوں بچا گدس. ول ہی محبت اچ ہر قسم دا میڈیا ٹرائل برداشت کیتس. کیا گزردی ہوسس جڈاں سنڑدا ہوسی جو بی بی شہید دا قاتل میکوں آکھیا ویندے. لٹیرا ڈاکو چور کیرھا الزام ہے جیرھا نہی لاتا گیا. پر ویہلا تے تریخ ہیندے نال ہے.

ہر کوڑ تے ہر مندے تے ہیندے مخالف ہیندے دشمن سیف الرحمن کنے شہباز شریف یا ول جنرل پاشا سارے معافی منگ گے. مگر ویہلے دے فرعوناں تے ضیا الحقیاں کوں شئیت ہالی وی سمجھ نہی آندی وت ہی قلندر دا ہیندے عشق دا امتحان پئے گھندن. ہنے سارے مصیبتے دے ہوندے وی او ایویں کھلدے جو ہوندی کھل ڈیکھ تے اساں وی سکھ دا ساہ گھندوں ول روندے وی ہیں.

حیران ہیں کیویں ہک بندا اتلا جبر برداشت کرتے، جوانی قربان کرتے، عیاشیاں، سکون مکا تے کھلدا ودے. ول بڈھیپے اچ کھل تے جیل ویندا پئے. بہوں حوصلے نال کھلدے اے کھل نقلی تاں نہی پر لگدے اے وی بہوں روندا ہوسی حد کن زیادہ. یا ول اتلا رو گدس جو ہنڑ کھلدا ودے. کوئی پچھو جو کلھے ونج تے بی بی دی قبر تے کتلا روندی ؟

ویب ڈیسک

See author's posts