اوندا پیو گھنگھلو رہیندا ہا ۔۔۔||رفعت عباس

اوندا پیو گھنگھلو رہیندا ہا۔

پیو ٻڈھڑا تھی ڳیا رڑھ واہی دا کم اوں سنبھالیا تے کئی سالاں پچھوں گھنگھلو رہایس۔ایہ پوہ دی کوئی موسم ہئی اوں ݙینہ چڑھے پہلا گھنگھلو پَٹیا

اونکوں لڳیا ایہ گھنگھلو ٻہوں رتا وکھرا تے اندرو اندر دھڑکدا پئے۔اوہ گھابریا جو ایہ کیا ہے۔اوں نِجھ کراہیں ݙٹھا ایہ دل ہئی۔ہک بندے دا دل پورا اوندی تَلی تے دھڑکدا پیا ہا۔ اوہ ݙر ڳیا پر ہمت کر کے گھر اپݨے ٹریا۔اوہ گھر اندر وڑیا تاں ذال اوندی ݙر گئی”تیݙی تلی تے ایہ کیا ہے؟ "……” ایہ گھنگھلو ہے میں رڑھ وچوں پَٹے”اوں ݙسیا۔وت گالھ اڳوں بڈھڑے پیو تئیں پُڄ ڳئی۔اوہ بڈھڑا کئی سالیں توں دل دی بیماری وچ کھٹڑے نال لڳ ڳیا ہا۔نہ ٹُر پِھر سگدا نہ رڑھ تانڑیں ویندا ہا۔اوں پتر دی تلی تے دل کوں دھڑکدا ݙِٹھا۔پُتر آکھیا ایہ گھنگھلو اے۔بڈھڑے پُتر کوں کول اپݨے سݙیا تے آکھیا”اینکوں میݙے دل اُتے رکھ چا”پُتر اوں دھڑکدے دل کوں پیو دے دل اتے رکھیا تاں دل اُتھاہیں غائب تھی گیا۔ پیو بڈھڑا کھٹ تیں اُٹھی بیٹھا۔آکھیس”میکوں رڑھ تانڑیں گِھن جُل

ایہ گالھ ٻہوں دور تئیں کِھنڈ ڳئی۔لوک اپݨے دل دیاں بیماریاں نال آوݨ اُتھاں پئے گئے۔گھر اُنہاں دا حکمت خانہ بَݨ ڳیا۔ٻہوں ٻڈھڑے دل,ادھ موئے تہائ مُکے دل۔دل وچ مورے۔ آپریشن توں پہلے پِچھاں۔حکیماں دے جواب ڈتڑے دل۔اوہ دل وانڳوں دھڑکدا گھنگھلو تازہ رڑھ وچوں پٹن۔بیمار دے ہاں اُتے رکھن اُتھاہیں اوہ ہاں وچ لَیہ ونجے۔بیمار اُٹھی ٻاہوے تے ٹُردا ہویا گھر ونڄے۔پیو بڈھڑا علاج دے پیسے ہک گھنگھلو دی ملھ جِتی گِھنے

اُنہاں دے گھر ٻاہروں میلہ ہک لڳ ڳیا۔بزار اُتھاہیں بݨ ڳئی دکاناں کھل ڳیاں۔ایٹھیاں وچ ٹانگیاں دے ڳاݙیاں دے سٹینڈ وݙے بݨ ڳئے۔ݙاہ ہزار پندھراں ہزار لوک ݙہاڑی آون۔ تریمتیں مرد ٻال ٻلونگڑے پُڄن۔ہمسایاں اپݨے گھراں وچ سَراواں بݨا گِھدیاں۔تندور راتیں ٻَلن۔لوک اُتھاہیں ٹِکݨ پئے ڳئے۔اوہ سارا ݙینہ لوکیں کوں نویں دل لاون۔جیڑھے رہ ونڄن اگلے ݙینہ دی تانگھ رکھن۔اُنہاں ݙاہ لکھ لوکیں دا علاج کیتا۔ چھیکڑی دل ہک ٻڈھڑی دے کم آیا جینکوں اوندے ٻڈھڑے ٻال گِھن آئے ہَن

اُنہاں نویں موسم وچ گھنگھلو وت رَہائے پر ایں پھیریں اوہ دِل نہ بَݨے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

گھنگھلو : شلجم

رَڑھ : کھیتی