دھاگوں اور موم کے پر||یاسر جواد

قدیم یونانی ماہر معمار ڈیڈالس نے کریٹ کی بھول بھلیاں (labyrinth) تعمیر کیں۔ ایتھنز کے بادشاہ تھیسیئس کو ایک عفریت مینوتار (Minotaur) کو ہلاک کرنے کے جرم میں بھول بھلیوں میں رکھا گیا، مگر وہ بھاگ نکلا۔ بادشاہ مینوس کو شک گزرا کہ ڈیڈالس اور اُس کے بیٹے ایکیرس نے مفرور مجرم کو بھول بھلیوں کے راز بتائے تھے اور اُنھیں وہاں بند کر دیا۔

مگر ایکیرس اور ڈیڈالس وہاں سے بھی فرار ہو گئے کیونکہ ڈیڈالس نے پرندوں کے پر اور کمبلوں، کپڑوں اور موم سے دھاگے لے کر پنکھ بنا لیے۔ ڈیڈالس نے ایکیرس کو دو چیزوں سے بچنے کی تنبیہ کی: سستی اور گھمنڈ۔ ساتھ ہی اُسے سکھایا کہ بہت نیچا یا بہت اونچا نہیں اُڑنا، مبادا سمندر کی نمی پروں کو بوجھل کر دے یا سورج کی گرمی اُنھیں پگھلا دے۔

ایکیرس نے ڈیڈالس کی ہدایات کو نظر انداز کیا اور اُس کے پروں کا موم سورج کی تمازت سے پگھل گیا۔ ایکیرس آسمان سے نیچے سمندر میں گرا اور ڈوب گیا۔ اِسی لیے کہاوت بنی کہ ’’اُڑتے اُڑتے سورج کے بہت زیادہ قریب مت جاؤ۔‘‘

اعتدال پتا نہیں کس کو کہتے ہیں، لیکن اپنی اوقات میں رہنا بہت ضروری ہے۔ کامیابی کے وقت ہم سابق حالت کو بھول جانے پر مائل ہوتے ہیں۔ فرار خواہ کہیں سے بھی ہو، اُڑان چاہے کتنی ہی سبک ہو، مگر پر ہمیشہ دھاگوں اور موم کے ہی ہوتے ہیں۔