کاٹھ دا گھوڑا||رفعت عباس

انہاں ہک کاٹھ دا گھوڑا بنڑایا جیڑھا اصلی گھوڑے دے قد کاٹھ وچ شہر دی چڑھائی تیں کھڑا رہ ویندا ہا۔

ہک ڈینہ ہک شاعر اتھوں لنگھیا۔

اوں گھوڑے کوں اکھیا:”توں چاہویں تاں تیکوں میں ایں کاٹھ وچوں جیندا جاگدا گھوڑا ہک کر ڈیواں۔جیڑھا اپنڑا سر لڈاوے،پچھ ہلاوے،گوٹھاں شہر بزاراں وچوں لنگھے تے جنگل دے چشمیاں دا پانڑی پیوے۔پر ہک گالھ اے،جیڑھے ڈینہ انہاں کاٹھ دے کاریگریں کوں تیڈے جیونڑ دی خبر لگی تیکوں متھے دے وچ گولی مار ڈیسن۔”

گھوڑے اکھیا:

"میکوں توں ایں کاٹھ وچوں باہر کڈھ،میں ہک پھیریں انہاں گوٹھاں شہر بزاراں وچوں لنگھاں تے جنگل دے چشمیاں دا پانڑی پینواں،اوہ ول بھانویں میکوں مار وی گھتن۔”