ڈیموکریسی، پولیٹیکل الائنس تے شاؤنسٹ نیشنلزم|| مشتاق گاڈی

سرائیکی وسیب دے مستند رجعت پسند (رائٹ ونگ) تے فاشسٹ نیازی دے پیروکار قوم پرستی دا چولا پا کنیں اے تاثر ڄماوݨ دی کوشش وچ ہن جیویں پیپلز پارٹی، مسلم لیگ (ن) تے ٻنہیں مذہبی سیاسی تے قوم پرست جماعتیں دے اتحاد تے کٹھے مل کنیں حکومت بݨاوݨ نال کوئی ان ہونی ڳالھ تھی ڳئی ہے۔ایں سانگے کجھ گذارشات اے ہن۔

(1) ایں سیاسی اتحاد یا سانجھ سٻدھ نال ای ہک سلیکٹڈ فاشسٹ حکومت دا نکلݨ ممکن تھئے۔ ایندی موجودگی وچ پاکستان وچ اڳلے الیکشن کہیں صورت وچ نہن تھی سڳدے۔ پروگرام اے ہئی جو اپݨی مرضی دا چیف آف آرمی سٹاف بݨا کنیں ہک ٹوٹل ڈکٹیرشپ لاگو کیتی ونڄے۔ ایندا انت ایں ریاست دی ودھیک بھن تروڑ وچ ای تھیوݨا ہئی۔ایندیاں کجھ جھلکیاں ایں عدم اعتماد تحریک ویلھے مل چکن۔

( 2) انہیں سرائیکی شاؤنسٹیں دا پیپلز پارٹی دے خلاف ہک وݙا اعتراض اے ہے جو اے مسلم لیگ (ن) نال کیوں اتحاد کریندے پئین۔ کیا اے سیاسی اتحاد بݨن کوئی وݙی ان۔ہونی ہے؟ کیا گذری وہاݨی وچ اینجھے اتحاد نئیں بݨدے ریہے؟ چارٹر آف ڈیموکریسی، 2008 وچ اتحادی حکومت بݨاوݨ، پی ڈی ایم بݨاوݨ کجھ ایندیاں مثالاں ہن۔ ایندے اپٹھ انہیں ݙو پارٹیں دی چلدڑ لڑائی وی ریہہ ڳئی ہے۔ میمو گیٹ، پانامہ کیس، پی ڈٰی ایم دی ترٹ بھڄ ایندیاں مثالاں ہن۔ ایں سبھ کجھ وچ پیپلز پارٹی اپݨی پالیسی موجب سرائیکی صوبے دی حمایت جاری رکھی ہے۔ سرائیکی صوبہ دی حمایت کوں مسلم لیگ (ن) نال لڑائی دے نال کنڈیشنل کرݨ ہک سیاسی جہالت یا وت شیطانگی ہے۔

(3) سرائیکی صوبہ دے بݨن دیاں ݙو شرائط ہن۔ پاکستان وچ جمہوری آئینی حکومت چلدی راہوے، فئیر الیکشن تھیون تے سرائیکیں دا مینڈیٹ کہیں ݙڈھپ یا کوڑ پلال نال نہ چھکیا ونڄے (جیندی ہک تازہ مثال پی ٹی آئی تے جنوبی صوبہ محاذ دا ڈرامہ ہئی)۔ ݙوجھا سرائیکی وسیب وچ صوبہ کیتے سیاسی پریشر بݨے تے او ہک وݙا الیکشن ایشو بݨ کنیں سامہݨے آوے۔ ایں سانگے شارٹ کٹ نئیں مارے ونڄ سڳدے۔ سرائیکیں کوں پروگریسو ڈیموکریٹک نیشلسٹ موومنٹ دی لوڑھ ہے، ایں سانگے پولیٹیکل ایجوکیشن دی لوڑھ ہے، آرگنائزیشن دی لوڑھ ہے، ایکٹوازم دی لوڑھ ہے۔

(4) دنیا وچ نیشنلزم کوں فاشزم تے شاؤنزم نال جوڑن دیاں ڈھڳ مثالاں ہن۔ سرائیکیں کیتے ایں طرانح دی جڑت ہک ٹریجڈی ہوسی۔