حکایت :بُھوت دی جُتی : ا||رفعت عباس

بُھوت دی جُتی : ا

ہک بُھوت راتیں درخت تے سُمدا ہا’اوہ جُتی اپݨی درخت ہیٹھ لہاوے ہا سمے ہا دھمی وت جُتی پا کے گُم تھی ونڄے ہا’ہک ݙینہوار جُتی اوندی چوری تھی گئی

اوں ڳالھڑ توں پُچھیا ” تو دھمی دا جاگیا ودیں جتی میݙی درخت تلوں چویجی ہے تیکوں کوئی پتہ ہووے’ ڳالھڑ آکھیا: ” روز میں جُتی تیڈی درخت تلے ݙیدھاں پر اج نہمی ڈِٹھی "بھوت پہرے دار کول ڳیا ” تیکوں پتہ ہے میں بھوت تیݙے باغ وچ رہنداں تے راتیں درخت تے سُمداں ”…..”میکوں پتہ ہے تو جُتی راتیں درخت ہیٹھ لہیندیں تے دھمی پا کے گُم تھی ویندیں ”بھوت آکھیا : "جُتی میڈی چویجی تیکوں کوئی پتہ ہووے”پہرےدار ٻولیا : "تیڈی جُتی کینویں چَویجی اے ساری رات میں جاگدا ریہاں”

بُھوت اپنڑی جُتی گولݨ باغ وچوں نکھتا’اوہ سڑکاں توں لنگھدا چوکاں توں ٹپدا بزاراں تاݨیں پُڄ ڳیا’اوہ ڳلیاں توں گزردا ٻوہیاں اگوں وگدا فصیلاں تاݨیں آ ڳیا ‘ چا خانیاں وچوں تھیندا کٻاڑی بزاریں وچوں ولدا پوڑیاں توں چڑھدا ٻئے پاسوں لیہہ ڳیا ‘ اوہ ٹردا ریہا ݙوپہراں اونکوں تھی ڳئی تے لکڑ دے ہک بنچ اُتے ٻیہ تھیا ‘ کوئی ویلا گزریا ماہݨو ہک لنگھیا ‘ اوں بَھڄ تے اونکوں جَھلیا تے بنچ تے بِلہایا ” تیکوں میں نہ ونجݨ ݙیساں ایہا جتی میڈی اے ” ماہںو اڳوں کِھل پیا ” میݙی جُتی تیݙی جُتی کینویں ہے "……جُتی رتے رنگ دی ڈھیر دیر ݙیکھو تاں سنہری آپے تھی آوے…..” میں بُھوت ہاں ‘ جے نہ اپݨی جُتی پانواں گُم نمہی تھی سگدا ‘ ایہا مݙی جتی ہے میں دھمی دا ڳولیندا وداں ” ماہݨو اڳوں تَپ ڳیا ” توں بھانویں بھوت ہوسیں ایہا میݙی جُتی ہے میں سال دی پاتی وداں میݙے کول رسید ہے ‘ تیݙے کول کیہاں ثبوت ہے "……”میڈے کول ڳالھڑ تے پہرے دار دی گواہی ہے’ لہا میݙی جُتی میں پانواں تے گُم اِتھوں تھینواں”ماہݨو اگوں اوکھا تھی کے ٻولیا : ” کیڑھی جُتی تو آپ اِتھوں گُم تھی ” بِھڑاند اُنہاں گھت ݙِتی لوک کٹھے تھی آئے پولیس دا سپاہی ہک پُڄ آیا اگوں وت تھاݨا ہے’ تھاݨے دار ماہݨو کوں دڑکیا بھوت کوں ݙرایا تے جُتی مال خانے

اوہ کئی ݙینہواراں تھاݨے آئے ‘ ماہݨو رسید اپݨی چا آوے’ بُھوت گواہی وچ ڳالھڑ تے پہرے دار کوں گھن آوے پر جُتی انہاں کوں نہ ملی ‘ اوہ بادشاہ تئیں ڳئے ‘ بادشاہ ماہںو تے بھوت دی ڳالھ پوری سݨی اے ‘ اوں پولیس کوں سݙوایا تے تھانڑے دار جُتی سُودا پُڄ ڳیا ‘ بادشاہ نے جُتی ݙِٹھی……جُتی رتے رنگ دی ڈھیر دیر ݙیکھو تاں سُنہری آپے تھی آوے…….بادشاہ ماہݨو تے بھوت دو اشارہ کیتا تے آکھیا : ” ایہ جُتی میکوں بھا ڳئی ہے میں آپ پیساں "