ریڈیو پاکستان بہاولپور دے معروف کمپیئرمحمد اجمل ملک جھوک لڈا گن

اسلام آباد ۔ ریڈیو پاکستان دے معروف کمپیئر اجمل ملک سئیں جھوک لڈا گن، انہاں دی نماز جنازہ اج 24ستمبر ، شام 4وجے مرکزی عید گاہ نزد سرائیکی چوک بہاولپور اچ ادا کیتی ویسے ۔ سرائیکی ادبی اکیڈمی دی صدر ڈاکٹر سعدیہ کمال آکھیا جو سئیں اجمل ملک دی وفات نال پورا سرائیکی وسیب سوگوار ہے، انہاں دی کرشماتی آواز لوگاں دے دلاں کوں گرما ڈیندی ہئی،

اجمل ملک سئیں ہنس مکھ ، ملنسارشخصیت ہن، انہاں اپنڑے سامعین کوں اپنے سحر اچ گھن رکھیا ہا۔ جیڑھا اساڈی تہذیبی زندگی تے وڈی حد تک عمومی شائستگی دا مظہر ہن،سرائیکی ادبی اکیڈمی دے جنرل سیکرٹری شاہد دھریجہ آکھیا جو اجمل ملک سئیں نہ صرف ہک اچھے کمپیئر وی نہ ہن بلکہ نقابت و خطابت اچ وی کمال مہارت رکھیندے ہن تے مذہبی وسماجی محفلاں تے سرائیکی مشاعریاں دی وی جان ہن، حافظ قرآن ہوون دے نال نال آپ کوں کلام فرید وی زبانی یاد ہئی، اج سرائیکی وسیب انہاں دی مدھ بھری آواز توں محروم تھی گئے، ،محمد اجمل ملک اپنی خوبصورت آواز تے خوب صورت گالھیں دے باعث اساڈے دلاں اچ مہکدے راہسن، انہاں نے عوام دی ذہنی نشوونما تے اخلاقی تربیت اچ انتہائی اہم کردار ادا کیتا،

انہاں دی اچن چیت وفات تے سرائیکی وسیب دے نال نال سرائیکی ادبی اکیڈمی تے سرائیکی ٹی وی دی پوری ٹیم سوگوار ہے ، اللہ کریم انہاں دے درجات بلند فرماتے تے لواحقین کوں صبر و جمیل عطا فرماوے۔