ڈائری دا پنا : 64 سندھی لینگوئج اتھارٹی||رفعت عباس

ایہ سندھی لینگوئج اتھارٹی دے چئیرمین دا دفتر ہا ‘ کمرے وچ چئیرمین پروفیسر عبدالغفور میمن تے سندھ دا ہک نامور کہانی کار مدد علی سندھی موجود ہَن ‘ پروفیسر عبدالغفور میمن 20 اپریل 2018 دیاں فائلاں دی سنبھال وچ رُجھیا ہا ‘ بوہے وچوں وڑدیاں سلام کیتم تے چئیرمین دی میز توں ذرا پروبھرے صوفہ سیٹ تے بَیہ تھیم ” یہ رفعت عباس ہے ملتان سے آیا سرائیکی شاعر ‘ اس وقت تھر پارکر سے آیا ہے ” اسحق سمیجو میڈے بارے ڈسیا ‘ چئیرمین دل بستگی نال ڈٹھا تے سر ہلایا ‘ میں وی سر ہلایم تے سینے اُتے ہتھ دھریم ‘ مدد علی سندھی کوں قرب توں آدر ڈتم ‘ اوہ بھلا مانڑس ہا تے اپنڑے مہاندرے وچوں پھبدا پیا ہا ‘ میں اوندے ناں تے کم دا جانڑو ہم ‘ ہک اپنڑائت وچوں ڈاہ پندھراں منٹ گالہیں تھیاں ‘ ایہ سندھ دا کہانی کار سندھی لینگوئج اتھارٹی دی پبلیکیشن کمیٹی دا ممبر ہا تے اجلاس وچ شرکت سانگے کراچی توں حیدر آباد آیا ہا ‘ اوں واپس کراچی ونجنڑا ہا ‘ ہک ملاقات وچوں جیڑھی شاعریں کوں ہمیشہ یاد رہندی تے کہانی کاریں کوں اکثر بُھل ویندی ہئی اوہ خوش لباس ٹُر گیا ‘ پروفیسر غفور میمن رُجھیا ہا ‘ اسحق سمیجو اپنڑی کرسی توں اُٹھی کے میڈے نال صوفے تے ان بیٹھا ہا ‘ کجھ ڈینہ پہلے اساں ڈوہئیں سکھر توں حیدر آباد تئیں پندھ کیتا ہا ‘ ایں پندھ وچ تصوف خاص کراہیں وحدت الوجود تے گالھیں تِھیاں ہَن ‘ اسحق سمیجو اوہ گالہیں میمن صاحب نال سانجھیاں کیتیاں تیں اوہ اپنڑی کرسی چھوڑ تے ساڈے سامنڑے ان بیٹھا ہا ‘ چا میز تے لگ گئی ہئی ‘ تصوف توں گالھ جدید سندھی شاعری دوں ٹُر پئی ہئی ‘ اجوکی سندھی نظم تے غزل تے گالھ تھئی ہئی’ ارداس کیتم ” اجوکی سندھی شاعری عربی / فارسی / اردو عروض دوں ٹُری ہے جڈاں جو نویں سرائیکی شاعری عربی / فارسی / اردو اوزان دی جاہویں اپنڑے ماتریاں / تل وطنی ردھم دوں پَرتی ہے ” گالھ تھوڑی دیر رُک گئی ہئی ” رفعت کو بھوک لگی ہے کسی اچھے ریستوران تک چلتے ہیں ” اسحق سمیجو بولیا ‘ واقعی بُکھ میکوں لگی ہئی ‘ سویرے مِٹھی وچ ناشتہ کیتا ہا ‘ تھرپارکر دے ازل ابد وچوں ہک سنگت میڈے نال ہئی ‘ اوہ سبھ اتھارٹی دے دفتر وچ موجود ہَن ‘ اوہ اپنڑیاں اپنڑیاں کرسیاں تے پئے مُرکدے ہَن ‘ اُنہاں کوں بس میں ڈیکھ سگدا ہم ” کھانا یہیں منگواتے ہیں ” پروفیسر عبدالغفور میمن اپنڑا ماہنڑو روٹی مانی کیتے پَٹھیا ” سندھی شاعری میں دونوں نظام ماترہ بندی / چھند بندی /پنگل اور عروض کا چلن ہے لیکن اکثریت اب عروض استعمال کرتی ہے ” دوستیں ڈسیا ہا ” میمن صاحب ہک بئی گالھ ڈسی ہئی جو سندھ دا قدیمی ردھم جینکوں لالن لال لطیف , سچل تے صوفی شاعریں ورتیا ہا کہیں ویلے وچوں جھنگلی ردھم بَنڑ گیا ہا ‘ میں دوست ادل سومرو , ایاز گُل تے علی دوست عاجز دے بیت تے وائیاں آپ پڑھیاں تے سُنڑیاں ہَن ‘ علی دوست عاجز دیاں کتاباں ‘ رتا روھیڑا ‘ تے ‘ سائر جو سوداءُ ‘میڈے بیگ وچ ہَن پر اجوکی سندھی شاعری دا ودھیک اعتبار عربی/ فارسی / اردو عروض ہا ” عربی / فارسی / اردو عروض جدید سندھی شاعری میں رچ گیا ہے اور آج ہماری شاعری خاص طور پر غزل کا حصہ ہے ” اسحق سمیجو آکھیا ہا ‘ سبھ سچ ہا ‘ سندھ دے شاعر تے اُنہاں دی شعری روایت سبھ سچ ہئی ‘ عربی فارسی اردو عروض کوں سلام ہا ‘ سندھ تے اوندی عظیم اجوکی شاعری کیتے ہمیش آدر ہا پر اج ہک سرائیکی شاعر لکھ محبتاں وچوں سندھی لیگوئج اتھارٹی دے دفتر وچ سندھ وادی دے مقامی شعری ردھم بارے سوال چولیا ہا