تساں وت وچال آلا کم کریندے بیٹھو|| حسن مرتضی

ایں نئیں ہوندا رہندا ۔ ن لیگ کیا ہے یا کیا ہئی۔ جرنیلاں دی پھوک نال بھریا ہویا غبارہ ہئی ۔ اج دی ن لیگ پی ٹی آئی اے تاں وت ن لیگ دے مقابلے اچ پی ٹی ائی کتھوں ٹھیک تھی گئی ؟

باقی قوم پرستی دا مطلب اے نئیں جو لازمی طور تے اپنڑی ہک جماعت بنڑا کے جیندے اچ سرائیکی لوظ کھڑا ہووے اوکوں ووٹ ڈتا ونجے ۔ قوم پرستی مٹی دا شعور ہوونڑ توں بعد ایندے حقوق دی جدوجہد کرنڑ اے تے ساکوں پیپلز پارٹی دے علاوہ کتھاؤں نئیں لبھیا ۔

تساں سرائیکیں دی سبھ توں معتبر پولیٹیکل کلچر بنڑاونڑ والی تنظیم سرائیکی لوک سانجھ تے الزام لاتے جو اے لوکیں کوں بے عزت کرویندی اے ۔ ڈو سال پہلے سئیں اصغر گرماݨی صیب جگ مشہور شاعر رفعت عباس سئیں نال کیا کیتا ہا؟ کیا اصغر صیب وی لوک سانجھ دا حصہ ہن ؟ ایویں بئے وی ڈھیر ادیبیں نال ایویں تھئے۔ ہک گالھ کوں تساں کمفیوز کیتی پئے او ۔ او ہے لیفٹ رائٹ دی ونڈ۔ رائٹ ونگ دا بندہ سجرک پا کے وی ترقی پسند نئیں تھی سگدا۔ فوج دے حق اچ ، بن قاسم دے حق اچ قصیدے لکھدے تے ملونڈ گیری کریندے۔ ول او ہک ترقی پسند ادیب کوں کیویں آدر ڈے سگدے؟ ۔ ایویں لیفٹ دا بندہ کہیں ملاں ٹائپ قوم پرست کوں واہ واہ نئیں کرسگدا ۔ اے ونڈ ہمیش توں اے ہمیش رہسی۔

مہربانی کرو شاعرانہ جھیڑیں کوں ساڈے کھاتے نا پاؤ ۔ تساں ول اوہا گالھ کیتی اے جو قلندری کو بے عزتا کیتا گئے۔ سئیں جی کیا قلندری دی وال تے ونج کے اساں کئی غلط گالھ کیتی؟ ہک تاں او ساڈی وال تے آکے پٹھے سدھے لڑھ مارے ول اساں اوکوں سہرے پواوں کیا؟ اوں دہریت دا فتوی لایا ہئی کیا تہاڈے اچ اخلاقی جرات ہے جو اوندی مذمت کرو؟

ڈوجھا شاعر افکار علوی ۔ مہربانی کرو افکار دے بارے کتھاں کوئی غلط گالھ کیتی اساں ۔ ؟ افکار وی جے میں غلط نئیں تاں ایم کیو ایم دے یوم تاسیس دا مشاعرہ پڑھ آیا ہا۔ اے وی شئیت سرائیکی دی وڈی خدمت ہوسی ۔

ظہیر مہاروی دی غزل دی پیروڈی پورے پاکستان کیتی اے ۔ ایندے وچ ساڈا کیا قصور اے یا تاں ول اساں اتنے طاقتور ہئیں جو سارا پاکستان ساکوں فالو کریندے ۔

ویسے وݙی گالھ اے جو سرائیکی چند ہک پیروڈیاں دی کاوڑ اچ پیپلز پارٹی کوں شکست ڈیویسن ۔ شئیت گیلانی وی اسٹیبلشمنٹ دی کہیں غزل دی پیروڈی کیتی ہوسی تہوں ہرا ڈتا گے

تساں سرائیکی لوک سانجھ تے پیپلز پارٹی دی بی ٹیم ہوونڑ دا الزام لاتے ۔ پیپلز پارٹی دی تاں. نئیں او ترقی پسند جماعتیں دی بی ٹیم ضرور اے ۔ قوم پرست جتھاں ہوسن او لیفٹ تے ترقی پسند جماعتیں دے ہوسن ۔ سرائیکی شئیت پہلی قوم اے جیندے قوم پرست تحریک انصاف جھئیں فاشسٹ تے جرنیل مافیا جماعت دے ووٹر نکھتن ۔

ویسے لوک سانجھ تاں صرف پیپلزپارٹی دی حمایت کیتی ہئی مہم نا چلائی ہس ۔ اے بلا پکڑ کے الیکشن کیپمئن کیہری تنظیم کریندی رہ گئی ہئی؟ کیا او تحریک انصاف دی بی ٹیم کینی؟

عجیب گالھ اے ڈاکٹر اشو لال کوں نوٹیفکیشن ملنڑ تے گالم گلوچ شروع کیتی ونجے تاں سارے مپ مار پوندن ۔ پر جواب ڈتا ونجے تاں شور اٹھدے ادب ادب احترام آدر ۔ تساں تاں خود وی ہک جھا تے صفدر کلاسرہ کوں بے عزت کرنڑ واستے "مسٹروبیشن” دا حال پئے پچھدے ہاوے۔ اے فل احترام اچ شامل اے؟۔ مکالمے اچ اچی جھکی گالھ تھی ویندی اے ۔ ایندی آڑ وچ سیاسی گالھ نا روکو۔ ساکوں ای پتا اے کون نعرہ بھٹو دا مذاق اڈینڈا رہ گئے

ادب احترام پچھوں اساں نا لکسوں جو غلط ہے تاں ہے ۔ جے ضیا ملعون ہے تاں ہے ۔ یزید دا آدر نئیں کیتا ونج سگدا۔

باقی گالھ رہ گئی 23 ضلعیں دی اساڈا کلیم روہی تھل دامان تے ہے ۔ کل ہک دانشور فرمائی پئے ہن کشمیر تے ادھا بلوچستان تے پشاور تک سرائیکی اے۔ مطلب ہنڑ ون یونٹ بنڑا کے اوندا ناں سرائیکستان رکھوا ڈیوں۔ جے گالھ سرائیکستان ناں دی ہے تاں اے ریاست دی پالیسی اے جو کلچرل اکائیں کنے انکار کرنڑے ۔جنوبی پنجاب آکھنڑ بہوں غلط لگدے ول دھرنا ڈتا ونجے اسلام آباد۔ منوایا ونجے جو ساکوں سرائیکی آکھو۔

ایکٹو تھیوو ۔ جتھاں نیازی ، صوبہ محاذ آلے گودے آون سوال کرو۔ امید اے تہاڈا لانگ مارچ جلد تھیسی۔ اساں وی آن رلسوں