"لُون دا جیون گھر” دے اجزائے ترکیبی اچوں "قصے” دی گال۔۔۔ اظہر کلیانی

لُونڑی توں لُونڑکا ونجیج کیں جگ جہان اچ سنبھیج گیا ھا۔لُونڑی واسیں لُونڑکا دی گول اچ جگ جہان دی سونہہ گول گھدی ھئی۔لونڑ دے پرتیں کوں شیشے وانگ رنگلے رنگ اچ رنگنڑ آلے بدلیں دے گٹھے کٹھے کر کیں گزارن کرنڑ آلے لونڑی واس لونڑکا دی گول اچ بھوئیں کنوں لا آسمان تائیں سانجھے پئے تھیندے ھن۔

لونڑی دا شاہر سندھ وادی دے ڈوجھے شہریں وانگ کہیں بھئو وچوں نئیں گزریا کیوں جو انہاں دے شاہر اچ کوئی خدا کوئی مذہب کوئی موت نہ ہئی۔جیوت کاری دے چترے ساہویں نال ٹردا ہویا لونڑی شہر کہیں حملہ آور دی اکھ توں اوڈھر تھیونڑ وی جانڑدا ھا تیں سامنڑے آ کیں جنگ کوں ناٹک وچ وی بدل سگدا ھا۔

لونڑکا دی گول اچ کئی لونڑی واس حکایتاں دے بوھے کھول کیں چندر دی دری کھول کیں ولدا اپنڑی بھوئیں تیں اپنڑے شاہر دے ناٹک گھر اچ سانجھے تھیندیں ہوئیں جیونڑ دی کرت کاری کوں چھڑا ٹُریندے نہ ھن ساری دنیاں کوں ڈکھیندے ھن جو جیونڑ کہیں مذھب باجھوں کہیں بندوق باجھوں کہیں موت باجھوں کیتلا سوہنڑاں تیں سنجاپوں تھی سگدے۔

لُونڑکا لُونڑی اچوں ونجیا کتھاں ھا لُونڑکا تاں اپنڑی گول پاروں پورے لونڑی واسیں کوں اپنڑیاں اکھیں اتیں اپنڑے پیر ڈیونڑ سانگے ونجیا ھا۔لونڑکا تاں لونڑی شہر دی تربیت کر کیں ایں سانگے اوڈھر تھیا ھا جو سارے جگ کوں ڈکھالنڑ چاہندا ھا جو جیونڑ کتلا سوکھا تھی کیں ھنڈایا ونج سگدے ۔

ایہا لونڑی واسیں دی تربیت ھائی جو انہاں لونڑکا دے گم تھیونڑ دے بعد لُونڑکا کوں اپنڑاں خدا نئیں بنڑایا،لُونڑکا دی گول اچ مست تھی کیں انہاں خود کوں لُونڑکا سمجھے۔انہاں اپنڑے لونڑ دے جیونڑ گھر اچوں، فانا فلورا اچوں، چندر تاریں وچوں لونڑکا دے وجود کوں اپنڑے وجد اچوں محسوس کیتے۔

انہاں لونڑکا باجھوں ایں ویلھے کوں گُھگڑے اچ بند کیتے۔ست ڈنہیاں دے ناں رکھ تیں بارھاں مہیناں اچوں لنگھدیں ہوئیں ہزاراں سالاں دی تاریخ مرتب کیتی جیرھی ایں گلوب دی سب توں وکھری تاریخ ہئی۔

لُونڑکا لونڑی اچ جیرھے ڈنہیہ گزاریے ھن اوندا سب توں وڈا مُکھ اوندا ناٹک گھر ھا۔ لُونڑکا دا ایہو ناٹک گھر ھا جیرھا ناول دی آخری دری اچ آکیں جنگ کوں ناٹک اچ گھن آیا ھا یا ناٹک کوں جنگ اچ گھن آیا ھا۔جنگ اچ بندے مردن تاں ہمیشاں کیتے مر ویندن پر ناٹک اچ ہک لاحظے کیتے موئے بندے ڈوجھے لاحظے وچ ولا اپنڑے جیونڑ دی کرت کاری اچ ہوندن۔

لُونڑی دا شہر ایں پاروں اپنڑی جیوت کاری وچ ھا جو اتھاں نہ کوئی خدا ھا نہ جنگ ھئی نہ گورستان ھا۔اپنڑی وسوں دے اخیری حملہ آور انگریزاں دی یدھ کوں ناٹک اچ بدل کیں لونڑی واسیں دنیاں کوں ڈکھا ڈتا ھئی جو کہیں حملہ آور دے دستیاں کوں کینویں کنول دی ڈھنڈ اچ لُکایا ونج سگدے اتیں دشمناں دے ہیٹ کینویں وسوں واسیاں دیاں چیڑیاں دے آلھنڑے بنڑ سگدن۔اتیں یدھ دا اے ناٹک ڈیکھنڑ سانگے پورے گلوب توں خلقت کینویں کٹھی تھی سگدی ھے۔

کاتھی تیں نارنگی دے سامنڑے ڈو راتیں دا ناٹک پورا تھی چُکا ھا تریجھی رات دا ناٹک چھڑا "لُونڑکا” تیں "ُلُونڑی” واسیں سانگے نہ ھا پورے جگ جہان سانگے ھا۔