میری زندگی کا زیادہ وقت پردیس کاٹتے گزر گیا جسے سرائیکی میں پردیسی ڈھولا کہتے ہیں۔ پاکستان میں جگہ جگہ جو مہمان نوازی کی روایات اور محبت دیکھی وہ غیر ممالک میں نہ مل سکی۔
ہاں البتہ مکہ اور مدینہ میں مہمانداری کی روایات عروج پر ملیں اور وہاں رہنے والے لوگ چاہے وہاں کے لوکل ہوں یا باہر کے مہمانداری کے امین ہیں۔
پرانی بات ہے ضلع شانگلہ کے ایک گاٶں الپوری میں وزیراعظم پاکستان نے خطاب کرنا تھا۔میں پشاور سے اس تقریب کی کوریج کے لیے گیا اور جلسہ مغرب کی نماز کے ساتھ ختم ہوا۔ میں بہت تھکا ہوا تھا اور سوچا مینگورہ جا کر کسی اچھے ہوٹل قیام کرونگا اور دوسرے دن واپس پشاور چلا جاونگا۔ سخت سردی میں رات کو الپوری سے روانہ تو ہو گیا لیکن جسم میں درد اور بخار کی کیفیت تھی۔
جب دس بارہ میل پہاڑوں میں سفر کیا تو چکر آنے لگے۔وہاں اچانک ہماری گاڑی رکی جو ایک فارسٹ چیک پوسٹ تھی میں نے موقع غنیمت سمجھا اور گاڑی سے اتر گیا۔
بالکل ویران جگہ تھی میں نے فارسٹ گارڈ کو بتایا وہ مجھے اپنے کمرے لے گیا آگ گرم کی اور مجھے چاۓ پلائی تو میرے ہوش ٹھکانے آے۔
بہر حال رات کے دس بج چکے تھے کھانا تو میں کھا چکا تھا اب اس چھوٹے سے کمرے میں دو چارپائی دو گارڈز کے بستر تھے اور سردی بھی شدید تھی ۔
گارڈ نے کہا اوپر پہاڑ پر دو تین گھر ہیں میں آپ کے لیے بستر لاتا ہوں اور پھر وہ بستر لے آیا اور چارپائی پر جب بچھایا تو یہ بالکل نیا دلھن کا چمکیلی رضائی اور گدے اور نئی چادر والا بستر تھا میں نے حیران ہو کر پوچھا تو اس نے بتایا اوپر دو غریب خاندان رہتے ہیں۔
ایک لڑکے کی شادی تھی اور ابھی تھوڑی دیر پہلے دلھن لاۓ تھے۔ میں نے جب بستر اور مہمان کا بتایا تو غربت کی وجہ سے ان کے پاس مناسب بستر نہیں تھا۔ دلھا دلھن نے آپس میں مشورہ کیا کہ ہم نے تو ساری زندگی اسی بستر پر گزارنی ہے مہمان تو کل چلا جاۓ گا نیا دلھن والا بستر دے دیا اور خود پرانے بستر پر سو گیے۔
ادھر وہ فارسٹ گارڈ خود زمین پر اپنا بستر بچھا کے سو گیا اور مجھے نیا بستر اور چارپائی دے دی۔اب مجھے اپنا بخار اور درد تو بھول گیا مگر مہمانداری اور انسانی ہمدردی کی یہ عجیب فلم دماغ پر گھومنے لگی۔ دیر تک نیند نہ آئی اور کروٹیں بدلتا رہا۔
جیسے تیسے رات کٹ گئی مگر آج تک اس غریب جوڑے کی عظمت کا احساس میرے دل میں روشن ہے جس کو کبھی دیکھا بھی نہیں۔
About The Author
اے وی پڑھو
اشولال: دل سے نکل کر دلوں میں بسنے کا ملکہ رکھنے والی شاعری کے خالق
ملتان کا بازارِ حسن: ایک بھولا بسرا منظر نامہ||سجاد جہانیہ
اسلم انصاری :ہک ہمہ دان عالم تے شاعر||رانا محبوب اختر