اٹھارویں ترمیم دا ڳلاواں۔۔۔ ذلفی

کافی ڈیہاں کولو سیاسی اُک دی مار اچ ٻہوں سارے لوک آوݨ آلے طوفان کولو ڈرے وی پئین تے چہ مگوئیاں وی کریندے پئین۔ ہالی تک محکمہ موسمیات آلیں اپݨا کوئی واضح ہدایت نامہ جاری نئیں کیتا بلکہ اپݨے تنخواہ دار مُلازمیں دے توسط نال دور دور دی کوڑی ملاوݨ دی کوشد اچ ہن۔
خبراں کڈھݨ آلے تے خبراں پُچاوݨ آلے اتھ پھیری ڈوہیں ٻہوں پریشان ہن۔ کُجھ آہدن جو جاتی اُمرا آلے تے بلاول ہاؤس آلے ڈوہیں اندری اندر اپݨی اپݨی جان چُھڑاوݨ کیتے "حاکم” دے حُکم تیں غور کریندے پائین۔ تے کُجھ اُمید پرست اے وے سمجھیندن جو حاکم ہُݨ ایں پوزیشن اچ کائینی جو او پہلے آلی کار دٻڑ ڳُسنی کر سڳے۔
ایکوں اگر مقامی معورضی حالات نال جوڑ کے ڈیکھوں تاں جیرھی تصویر بݨدی حے او بَلر سیاسی منظرنامے اچ کہیں ناں کہیں شکل اچ سُنڃاݨی تاں ونڃ سڳدی حے۔
دُنیا اچ سینٹرلائزڈ پاور سٹرکچر رکھݨ آلیاں ریاستاں کرونا دی وبا دے بعد جتھاں کہیں حد تک کامیاب تھائین اُتھاں گُریز مرکز یا ڈی سینٹرلائیزڈ پاور سٹرکچر آلیں ریاستیں دے فیصلہ سازی آلے مرحلے تیں گورننس دے ریسپانس پاروں ٻہوں سارے سوالیہ نشان وی کھڑے تھائین۔ ایں موضوعی ڳالھ دا تعلق ساڈی ریاست دے سٹرکچرل پیراڈائم نال وی جُڑیا ہویا ضرور حے۔
اٹھارویں ترمیم دے بعد فیڈریشن کولو اختیارات دی ونڈ ہیٹھلی سطح تیں مُنتقل تھیوݨ نال مرکزیت پسند مقتدر حلقے جتھاں کمزور تھائئن اُتھاں ایں وبا دے بعد اُنھاں کوں ہیک موقع وی ملے جو او اپݨے آپ کوں تکڑا کر گھنن۔
ایں عرصے اچ اُنہاں اپݨے ڈڈھ دی پُراݨی پِیڑ کوں نیب دی پھکی نال دور کرݨ دی کوشد تاں ٻہوں کیتی پر اے پِیڑ موئی نیئں۔ول اُنہاں اپݨے پیغام رسا قاصدیں دے توسط نال ہیک وڈی سودے بازی واسطے راہ ہموار کرݨ دی کوشد کیتی جیندے اچ اقبال ظفر الدین احمد کوں استعمال کرݨ دیاں خبراں ہن۔
ہݨ جیرحے سوال پیدا تھیندن او اے ہن جو کیا پنجاٻ دے علاوہ باقی ترائے صوبے اٹھارویں ترمیم کوں واپس کرݨ واسطے تیار ہن؟
کیا پیپلز پارٹی اٹھارویں ترمیم دے بُنیادیں اچ شامل بے نظیر دے خون کوں بُھل سڳدی حے؟
کیا کے پی کے تے بلوچستان دیاں قوم پرست جماعتاں تے پریشر گروپ ایں سودے بازی اچ اپݨی قُربانی ڈے سگدن؟
کیا عمران خان کوں کُھڈے لائین لا کے اسٹیبلشمنٹ ہیک نواں جوا کھیڈ سگدی حے؟ تے آخری سوال اے حے جو کیا مُقتدر حلقے نواز شریف تے زرداری تیں اعتبار کر سگدن؟
جہے تک پہلے سوال دا تعلق حے تاں اوندا جواب اے حے جو پنجاب دے علاوہ ترئیے صوبے کڈاہیں نہ چاہسن جو اُنہاں دے اختیارات اُنہاں کولو واپس گھن گھدے ونڃݨ کیوں جو ایں ویلھے قومی سطح تیں ہیک وی سیاسی پارٹی اینجھی کائینی جیرھی پورے مُلک اچ الیکشن جیت کے مرکزی حکومت بݨا سڳے، ایں ڈر پاروں ترئیے وڈیاں پارٹیاں اپݨے اپݨے قلعے چھوڑݨ واسطے تیار نہ تھیسن تے او صوبیں دے اختیارات تیں کمپرومائیز نہ کریسن۔
ڈوجھے سوال دا جواب اے حے جو آصف زرداری عمرا دے جیرحے حصے اچ حے او ہݨ بی بی دے خون نال غداری دا سوچ وی نئیں سگدا تے نہ ہی زرداری پہلے کڈاہیں ایں ٹائپ دی سیاسی غلطی دا مُرتکب تھائے۔ او ہُݨ اسٹیبلشمنٹ دے ڳاٹے اچ او کنڈا بݨ ڳئے جیرھا نہ نڳلیندے تے نہ ہی اُڳلیندے۔اوکوں راضی کرݨ واسطے وڈے مارکا ہݨ تݨ ٻہوں مریندے رہ ڳئین تے مریندے وی پائین جو ٻیا کُجھ نہ تاں کُجھ اختیارات مرکز کوں واپس کرݨ سانگے زرداری زہر دا گُھٹ بھر گھنے تاں ایندے بدلے اچ اوندے اُتیں قائم کوڑے سچے مُقدمے ختم کر ڈتے ویسن بلکہ نیب دے ادارے کوں ہی جون آلے بجٹ کولو پہلے پہلے آئینی ترمیم دے ذریعے بے اختیار کر ڈتا ویسی مگر زرداری ہالی تک ہا نئیں کیتی بلکہ ڈوہیں فریق لکھت شُدہ مسودے کوں سٹڈی کریندے پائین۔ڈیکھو مُستقبل قریب اچ کیا تھیندے۔پیپلز پارٹی دے بارے اے تاثر حے جو اے جڈاں اقتدار اچ کائینی ہوندی تڈاں اسٹیبلشمنٹ دے نال کمپرومائز کر کے اپݨی جان چُھڑاوݨ دی کوشد کریندی حے کیوں جو پیپلزپارٹی دے اندرونی حلقیں اچ اے سوچ پاتی ویندی حے جو کلہیں اسٹیبلشمنٹ نال پنگا گھنݨ دا مطلب حے جو روز ہیک نویں آفت ڳچی اچ پا گھنوں تے انھیں حالات اچ پارٹی شئیت کمزور تھی ویسی جبکہ اقتدار اچ آ کے اساں جمہوریت مضبوط کرݨ واسطے تے اسٹیبلشمنٹ کوں کمزور کرݨ واسطے چنڳے انداز اچ کارگر ثابت تھی سڳدے ہیں۔ ڈوجھے پاسوں پیپلز پارٹی کوں اے ڈر وی کھادی ویندے جو اسٹیبلشمنٹ دے نال مل ونجݨ دے تاثر پاروں جیرھا انٹیلجینشیا اُنھاں دے نال کھڑے او تاں بِدراہ تھی ویسی تے پیپلز پارٹی دی ساکھ کوں شدید نُقصان پہنچسی۔ ایں صورتحال اچ پیپلز پارٹی ڈو مونہی تلوار دی زد اچ حے لہٰذا میں نئیں سمجھیندا جو اٹھارویں ترمیم اچ تبدیلی دی حامی بھر کے پیپلز پارٹی پیچیدہ تے مُشکل ترین صورتحال اچ اپݨے آپ کوں دھکیل چھوڑے۔
جہے تک تریجھے سوال دا جواب حے او اے حے جو قوم پرست جماعتاں اگر ایں ترمیم اچ ودھ چڑھ کے حصہ گھندن تاں اُنہیں دی اپݨی بقا دے بہوں وڈے سوال کھڑے تھی ویسن جیرھا تھوڑا ٻاڑا رول اُنہاں دا حے او وی ختم تھی ویسی تے اُنہاں کوں اسٹیبلشمنٹ دی کاتی نال کووھݨ ٻہوں اسان تھی ویسی لہٰذا او وی ایں کھیڈ اچ پھوک پھوک کے قدم چائیسن۔ چوتھی گالھ جو کیا نواز تے زرداری اسٹیبلشمنٹ واسطے اڃاں تک قابل اعتبار ہن تے ایندا جواب اے حے جو انہاں دے علاوہ اسٹیبلشمنٹ کولو ٻیا کیرھا آپشن حے؟ عمران دی حکومت ہر محاذ تیں بُری تراویں پِٹ ڳئی حے تے اوندی مقبولیت ڈیہوں ڈیہنہ گھٹ تھیندی ویندی حے جیندی وجہ کولو عالمی اداریں نال ڳنڈھ تروپ کرݨ تے چین نال سی پیک دے حوالے نال ڳالھ اگاں ٹورݨ ٻہوں آوکھا تھی چُکے تہوں اندری اندر اسٹیبلشمنٹ اپݨے روزی روٹی بارے پریشان حے۔
ایں سیاسی پس منظر تے مجبوریں اچ پاکستان دے مقتدر حلقے، سیاسی پارٹیاں تے پریشر گروپ سارے پریشان ہن تے ہر فریق اپݨی اپݨی بقا واسطے اُٻھالے اُٻھالے ہتھ پیا مریندے۔ ہُݨ ڈیکھو کون کتنا چنگی کھیڈ کھیڈ کے ایں شدید سیاسی بحران کولو فائدہ چا سگدے۔۔!! پر ہیک گالھ طے حے جو اے ریاست ہݨ اوں سٹیج تیں پہنچ ڳئی حے جتھاں ہیک بحران دے بعد ٻیا بحران جنم گھنسی تے ہر آوݨ آلا بحران پچھلے بحران کولو زیادہ گُنجلک تے خطرناک ہوسی کیوں جو ہیک بحران کوں حل کرݨ واسطے ہیک نواں بحران پیدا کر گھݨݨ آلا کھیڈ اپݨے آخری تجزئے اچ شُتر بے محار ہوندے تے اوکوں پھاٹک دے در ونڃ جھلیندن۔

About The Author

ویب ڈیسک

See author's posts