کیا سچ دا سامݨا کرݨ ضروری ھے؟(پہلی لڑی)|| ذلفی

او کالی دھوں ہائی۔ اوندی سر دے وال چٹے کھیر ھن، اوندیاں اکھیں کہیں وڈے ڈیڈر آلی کار پُھڑکیاں ہویاں ہن، آؤندے تھوڈ کہیں مڑیچی ڈاچی وانگوں لڑکدے ودے راہندے ہن، قد لمبا ہائی پر جسم موٹا تے بے ڈھنگا ہووݨ دی وجہ کولو او پریں آؤ کوئی روت آلی کار لگدی ہائی۔ او اکثر میکوں خواب اچ ملݨ آندی ہائی۔ خواب اچ میکوں آ کے آہدی ھے او چھوہر آ تیڈا دماغ تاں ٹھیک ھے کیرھے کم کوں لڳ گیا ہیویں۔۔! میڈے واسطے تیڈے کولو ٹائم کائینی؟ میں اوندو آنے پٹ کے ڈٹھے تے بس ڈیہداں ہی رہ ڳیاں۔ اوں ول میکوں دھڑکے دے انداز اچ آکھئے تیکوں میڈی فکر کائینی، میں اے شریر تیڈے کیتے سنبھال کے رکھیا ہویا ھے۔۔! میڈی روح دے سُر توں سُݨدا کیوں نیوہیں۔۔! ایں کولو پہلے میں کُجھ آکھاں او میڈا کن مروڑ کے آکھݨ لڳی تیڈی جمالیاتی حِس کڈیں مر ڳئی ھے؟؟ توں تاں رنگیں دی گالھ کریندا ہاویں ، روح رہاوݨ تیں خوش تھیندا ہاویں؟ کیا میڈے رنگ تے روح دی کوئی اہمیت کائینی، ایکوں توں آدُر کیوں نیوہیں ڈیندا۔۔! کیا خوبصورتی صرف اوہا ہوندی ھے جیرھی مروجہ معیاریں دی متہاج ہووے؟. وڈے تُساں حساس لوک ہاؤ۔ میں تباہ تھائی لاتھی ہاں، کئی وقتیں کولو تیڈے ناویں لڳ کے جیندی پائی ہاں، تیکوں کڈاہیں ایندا احساس وی نئیں تھیا۔۔! مُنافقت تے بے حِسی دی کوئی تاں حد بناں ہوندا ہوسی۔۔!!!

میں کجھ آکھݨ واسطے ایویں ٻوتھی بݨائی ھے تاں اوں میڈی ٻوتھی تیں اپݨا ہتھ رکھ کے آکھئے میں تیڈی کوئی بکواس سُݨݨ نئیں آئی میں تیکوں اپݨا آپ سمجھاوݨ آئی ہاں۔ توں وڈا جوان بݨیا پھردیں، ساری حیاتی اچ سوائے ڈرامیں دے تئیں کیتا کیا ھے؟ توں روز ہیک نواں ڈرامہ گھݨیدیں تے روز اوکوں ایں اندھے سماج اچ پرفارم کریندیں۔ اندھیں دے اڳوں توں وڈا پھنے خان بݨیا ودیں اج میڈو ڈیکھ، ایں حقیقت دا سامݨا کر تے ڈس حقیقت تے فکشن اچ کیا فرق ہوندے۔ حقیقت کولوں تُساں بچ نیوھے سگدے او جینجھی وی ہووے ہیک نہ ہیک ڈیہنہ تہاکوں آ کے پکڑیسی۔تہاڈے اگوں آ کے کھڑی تھی ویسی۔۔! پچھیں بھاویں تہاڈے ہتھ پیر سُڃ کیوں نہ ونڃن تُساں اوندے کولوں بچ نیوھے سگدے۔ اڃ تیکوں میڈا سامݨا کرݨا پوسی تے میڈے سوالیں دے جواب وی ڈیوݨے پوسن۔ !

میں ڈردیں ڈردیں پُچھیا توں اپݨے سوال رکھ میں جواب ڈیوݨ واسطے تیار ہاں۔۔! اوں فورا غُصے دے انداز اچ آکھیا تُساں جیہیں لوک سوالیں دا جواب ڈیندیں ویلھے ہر گالھ اچ لُکی چھپی کھیڈدن۔ لوظ ورتیندیں ویلھے تہاڈی گالھ دے کئی مطلب ہوندن۔ تُساں لوظیں کوں جاݨ بجھ کے انہاں دی معنویت کوں کئی رُخا کر ڈیندے ہاؤ، تُساں لوکاں دے دماک نال کھیڈدے ہاو، اپݨی کمیونیکیشن دے انگ رنگ اچ اُنہاں کوں سراب اچ پا کے اپݨی کنڈ بچا ویندے ہاؤ، ول تہاڈی عادت تھی ویندی ھے کہیں عالم فاضل آلی کار اپݨی جون اچ لُک لُکا کے ہیک خیالی دُنیا اچ وسدے ہاؤ۔۔! میں اڃ اے نہ تھیوݨ ڈیساں۔۔! میڈے کشٹ کِشالے کہیں وی تیڈے دا کوں تیڈی عقل دی پِھرکی کوں رد کریسن۔ لِہذا اپݨے اظہار دے طریقے اچ کوئی تصفیہ یا قضیہ دا کھیڈ نہ پیا کھیڈیں تے سدھی تے کھری گالھ کریں۔۔! نہ تاں میں تیڈی چُت بند کر ڈیساں۔۔!!

میں ایں گفتگو دے دوران ہیک عجیب بے بسی اچ پھس ڳیاں تے پہلی واری میکوں ایویں لڳا جیویں میڈی ہر شے کہیں کھس گھدی ہووے۔۔گنڈھو خالی، عقلو پیدل تے چٻل۔!

میں ول وی اوکوں آکھیا اچھا توں کیا پُچھݨ چاہندی ہیویں؟

اوں آکھیا میکوں اے ڈس توں جیرھیاں گالہیں کریندیں یا جنہاں کوں توں مہان سمجھیندیں اُنہاں نال تیڈا رشتہ کینجھا ھے؟

اے عجیب سوال ھے میں آکھیا۔

سوال اوں ویلھے عجیب ہی لگدے جیرھے ویلھے تُساں کہیں مخصوص جواب ڈیوݨ جوگے نہ ہوو، یا تُساں اوکوں اپݨے بیانئے اچ کتھائیں فٹ نہ پائے کر سگدے ہووو۔ او ہر سوال تہاکوں تنگ کریسی جیرھا تہاڈی فلاسفی یا تہاڈے ایجنڈے اچ فٹ نہ آندا پیا ہوسی۔ اوکوں تُساں بے وقوفانہ سوال سمجھیسو یا تُساں اوندا ولدا ڈیوݨ گوارہ نہ کریسو اے سمجھ کے جو اے سوال ھی عجیب ھے۔۔! اچھا اگوں ٹُر میں بیا سوال پُچھدی ہاں!

میں اوندیں اکھیں اچ اکھیں پا کے ڈٹھا تے میڈے اندروں احساس تھیا جو اے تاں اج میڈے کپڑے لہا کے راہسی۔۔! اُکا الف دا الف کرݨ تیں تُل گئی ھے۔۔!

اکھیں اچ اکھیں ملاوݨ دی دیر ہائی او چُپ کر کے لڳی ڳئی تے صرف اتنا آکھس جو بس اکھ نال اکھ ملݨ دی دیر ہوندی ھے اوندے بعد دلیل ، فلسفے، وزڈم تے کرودھ سب بے معنی تھی ویندے۔۔فعل حال میں ویندی پائی ہاں ول ولساں باقی گالھ بعد اچ کریساں۔۔!

جاری ھے۔۔!