پی پی پی کی قیادت اپنا "سیاسی بیانیہ” چیک کرے||عامر حسینی

مخدوم، گیلانی ، قریشی ، راجے، مہاراجے، فلاں ریٹائرڈ جنرل و فلاں ریٹائرڈ چیف، فلاں ہیوی ویٹ اور فلاں منحرف یہ سب تو پارٹی پالیسی سے منافع اٹھارہ ہیں لیکن طالب علموں، مزدوروں، کسانوں، شہری و دیہی غریبوں کے لیے اس پالیسی میں کچھ بھی نہیں ہے سوائے چند خیراتی اعمال کے….. پیپلزپارٹی نے جنوبی پنجاب میں کنگلے ہوجانے کے قریب گیلانیوں کو دوبارہ سے اشراف کلب میں طاقتور ہونے کا موقع فراہم کیا لیکن گیلانیوں اور مخدوموں کو پیپلزپارٹی کا مالک بناکر جنوبی پنجاب میں پیپلزپارٹی کو کتنا فائدہ ہوا؟ جو ترقی کی اور جو قد کاٹھ گیلانیوں نے پی پی پی کی وجہ سے حاصل ہوا اُس کا عکس پیپلزپارٹی کی تنظیمی ترقی اور ووٹ میں اضافے کی شکل میں دیکھنے کو کیوں نہیں مل رہا؟ جام پور میں ہزاروں ووٹ وہ پی ٹی آئی کو پڑا جن کے باپ دادا اور وہ بہت سارے خود پی پی پی کے ساتھ کھڑے رہے تھے، کیوں؟ یہ سوال زرا گیلانی اور مخدوم کے سینئر قائدیں اور اُن کی اولاد جونئیر لونڈے مگر پی پی پی کے وہ قد آور سیاست دان بنے بیٹھے ہیں سے پوچھیے، جن کی پی ڈی ایم کی حکومت میں پانچوں گھی میں اور سر کڑاہی میں ہے اور ان گیلانیوں اور مخدوموں کی نوجوان نسل جنھیں پی پی پی کی اگلی صفوں میں بٹھاکر کارکنوں کو ان کے قدموں میں بیٹھنے پر مجبور کیا جاتا ہے کردار کے لحاظ سے بھی گندے اور کام کے لحاظ سے بھی نکمے ہیں، ایسے میں پنجاب اور سرائیکی بیلٹ میں پی پی پی کیسے مقبول سیاسی جماعت بن سکے گی؟