کیا ڈیرہ اسماعیل خان میں خالص دودھ ملتا ہے ؟۔۔۔||گلزار احمد

آج شام میری کینیڈا میں اپنے بیٹے سے بات ہو رہی تھی جو وہاں سرکاری محکمے میں انجینیر ہے اور آج کل سڑکیں بنا رہا ہے۔ اس نے بتایا کہ کینیڈا میں قانونی طور پر نہ آپ درخت کاٹ سکتے ہیں اور نہ کسی پرندے یا جانور کو کچھ کہ سکتے ہیں۔ سڑک بنانے کے دوران ایک درخت کی شاخ فٹ پاتھ کے اوپر آ رہی تھی تو میں نے محکمہ جنگلات کو اس کی شاخ کاٹنے کی اجازت کے لیے لکھ دیا۔ چند دن میں اجازت تو آ گئی لیکن اس دوران رابن Robin پرندے نے اس شاخ پر گھونسلہ بنا دیا۔ جنگلات والے شاخ کاٹنے پہنچے تو گھونسلہ دیکھا اور فورن اجازت منسوخ کر دی کہ اب یہ شاخ کبھی نہیں کٹے گی۔ میں نے ان سے بات کی کہ یہ عوام کے چلنے میں رکاوٹ ہے تو انہوں نے کہا پرندے میں شعور نہیں اس لیے اس نے گھونسلہ بنایا ہے انسان میں شعور ہے اس لیے وہ دیکھ کر اس جگہ سے احتیاط سے گزر جائینگے یہ کہ کر وہ چلے گئے۔ میرے بیٹے نے درخت اور گھونسلے کی تصاویر مجھے اس لیے بھیج دیں کہ ہم لوگ سوچیں ہم درختوں اور پرندوں کے ساتھ کیا سلوک کر رہے ہیں ۔کچھ تو ترس کھائیں اور درختوں اور پرندوں کی بقا کے لیے کوشش کریں ۔