عوام تے ریاست دا رشتہ|| ذلفی

اجوکی دنیا اچ زیادہ تر ریاستاں کہیں کاروباری فرم آلی کار چلدن۔ جیکوں چند سرمایہ دار ، بیوروکریسی تے ملٹری دے گٹھ جوڑ نال چلایا ویندے۔ اے طبقات اپݨے مفادات واسطے ریاست دے باقی ماندہ اداریں کوں استعمال کریندن۔ قانون سازی کولوں گھن کے طاقت دی تقسیم تک انہاں دا آپت اچ ہیک اݨ لکھت ڈیل ہوندی ھے۔ موجودہ سرمایہ دارانہ نظام اپݨی سفاک شکل اچ عام لوکیں دا خون دا آخری قطرہ وی چوس گھندے۔ انسانیں کوں کوموڈٹی سمجھ کے اُنہاں کوں سہولیات دے ناں تیں لُٹیا ویندے۔

سہولیات تے بنیادی ضروریات کوں پورا کرݨ سانگے عوام دی اکثریت ہیک ڈوجھے نال ریس لائی پائی ھے تے ایں ریس کوں جتݨ واسطے ہر بندہ جائز و ناجائز کم کرݨ واسطے تیار ہوندے جیندی وجہ کولو سوسائٹی دی اجتماعی اخلاقیات تباہی تے تنزلی دا شکار ہن۔ اخلاقی اقدار مُتوں سوسائٹی اچ ڈاڈھے دے خلاف مزاحمت دی ریت ہی ختم تھی ویندی ھے۔ جیندی وجہ کولو کہیں وڈی سیاسی تبدیلی دی توقع رکھݨ غیر منطقی ھے۔ لہذا اے توقع نہ رکھو جو ساڈی ریاست اچ کوئی وڈی تے مثبت سیاسی تبدیلی آ سگدی ھے