پاکستان کے کن کن وزرائے اعظم کو اپنے قتل کیے جانے کا خدشہ رہا؟||احمد اعجاز

پاکستان کے سابق وزیرِ اعظم ذوالفقار علی بھٹو کو پھانسی دی گئی مگر اُس پھانسی کو آج بھی اکثریت پھانسی نہیں بلکہ قتل قرار دیتی ہے اور اُن کے قتل کو اندرونی و بیرونی سازش کا شاخسانہ قرار دیا جاتا ہے۔

سابق وزیرِاعظم عمران خان بھی سابق وزیر اعظم بھٹو کے حوالے سے کہہ چکے ہیں کہ اُن کے خلاف سازش کی گئی۔

سابق وزیراعظم عمران خان نے 27 مارچ کو پریڈ گراؤنڈ اسلام آباد میں جلسے سے خطاب کرتے ہوئے اپنی حکومت کے خلاف بیرونی سازش سے متعلق خط لہراتے ہوئے کہا تھا کہ ’آج وہی سازش ہو رہی ہے جو بھٹو کے خلاف ہوئی تھی۔‘

ذوالفقار علی بھٹو نے اپنی کتاب ’اگر مجھے قتل کیا گیا‘ میں لکھا تھا کہ ’18 مارچ 1978 سے میں نے چوبیس گھنٹوں میں سے 22 یا 23 گھنٹے ایک حبس زَدہ، دم گھونٹنے والی موت کی کوٹھڑی میں بسر کیے ہیں۔ میں نے طویل موسم گرما کی حدت اور گرمی اور برسات میں اس کی گھٹن اور بدبو کو برداشت کیا، روشنی کا انتظام ناقص ہے۔ میری بینائی بدتر ہو چکی ہے۔ میری صحت کا شیرازہ بکھر چکا ہے۔‘

جنرل ضیا کی موت کے بعد ایک خبر شائع ہوئی کہ اعتراف کرنے والے شریک ملزموں میں سے ایک کی والدہ نے یہ انکشاف کیا کہ اُن کے بیٹے سے جان بخشی کا وعدہ کیا گیا تھا۔

اس کہانی کی تصدیق جسے شائع نہیں ہونے دیا گیا، جنرل فیض چشتی کی یادداشتوں Betrayals of Another Kind مطبوعہ 1989 سے ہوتی ہے۔ جنرل فیض علی چشتی لکھتے ہیں کہ ’جب 4 اپریل 1979 کو بھٹو کو پھانسی دے دی گئی تو اخبارات میں شور مچا کہ شریک ملزمان کو کیوں پھانسی نہیں دی گئی۔‘

’جنرل ضیا پر دباؤ بڑھ رہا تھا کہ وہ کوئی فیصلہ کریں۔ مارشل لا ایڈمنسٹریٹر اور کور کمانڈرز کی ایک میٹنگ میں جنرل سوار خان (گورنر پنجاب) نے جنرل ضیا سے فیصلہ کے بارے میں پوچھا۔ جنرل ضیا نے کہا چونکہ کوئی چارہ کار نہیں رہا، اس لیے پھانسی دی جائے گی۔‘

’میں نے جنرل ضیا کو وعدہ یاد دلایا جو اُنھوں نے چاروں ملزموں سے کیا تھا کہ انھیں کچھ نہیں ہو گا لیکن انھوں نے اپنے وعدے کا پاس نہیں کیا۔ اعتراف کرنے والے ملزمان عدالت میں حاضر ہوئے تو وہ بالکل فٹ اور خوش و خرم نظر آئے، وہ اُن آدمیوں کی طرح دکھائی نہیں دیتے تھے جو موت کی کوٹھڑیوں سے لائے جاتے ہیں۔‘

کرنل رفیع الدین اپنی کتاب ’بھٹو کے آخری 323 دن‘ میں لکھتے ہیں کہ ’اگر بھٹو صاحب کی اپیل سپریم کورٹ میں منظور ہو بھی جاتی تو بھی انھیں آزاد نہ کیا جاتا۔ ‘

’پانچ فروری 1979 کو دس بجے صبح مجھے ایس ایم ایل اے کے ساتھ ڈی ایم ایل اے کے دفتر بلایا گیا جہاں ہمیں بتایا گیا کہ شاید کل مورخہ چھ فروری کو سپریم کورٹ، بھٹو صاحب کی اپیل منظور کرنے کے بعد حکم جاری کرے کہ اُن کو آزاد کر دیا جائے مگر ایسے حکم کے باوجود بھی ان کو جیل سے باہر نہیں جانے دیا جائے گا اور مارشل لا کے تحت کئی اور مقدمات میں مطلوب ہیں، جن کے تحت ان پر الگ مقدمہ چلایا جائے گا۔‘

’مجھے صاف صاف بتایا گیا کہ اگر سپریم کورٹ بھٹو صاحب کے لیے آزادی کا حکم بھی صادر کردے کہ انھیں جیل سے نکال دیا جائے تو بھی انھیں جیل سے باہر ہرگز نہیں جانے دیا جائے گا۔‘

27 دسمبر 2007 کو بے نظیر بھٹو راولپنڈی میں قتل ہوئی تھیں۔ سنہ 1997 کے انتخابات کے بعد اپنی جلا وطنی ختم کر کے بے نظیر بھٹو 18 اکتوبر 2007 کو وطن لوٹیں تھیں۔

کراچی میں لوگوں کی کثیر تعداد نے اُنھیں ’ویلکم‘ کہا مگر اس موقع پر کارساز میں ہونے والے بم دھماکوں سے کئی افراد موقع پر ہی دَم توڑ گئے۔

بے نظیر بھٹو کی آمد پر بم دھماکوں کا ہونا، اس بات کا ثبوت تھا کہ حالات اِن کے لیے ہرگز ٹھیک نہیں۔

بے نظیر بھٹو اس سے قبل اپنے قتل کا شبہ ظاہر کر چکی تھیں اور اپنے قاتلوں کے ناموں کا ذکر بھی کر چکی تھیں لیکن پھر بھی اپنے قتل کا شبہ ظاہر کرنے والے خاتون وزیرِ اعظم آخرِ کار راولپنڈی کے لیاقت باغ میں خودکش حملے میں قتل کر دی گئیں۔