سچ دا اوکھ تے لیبلنگ دا سوکھ || ذلفی

آج دے وقت ویلھے اچ اگر کوئی بندہ کوڑ تے جہالت دے خلاف واقعی کم کرݨ چاہندے تاں اوکوں ہیک تاں جُرات مند ہووݨا جاہیدا حے تاں جو او سچ آکھ وی سڳے تے لکھ وی سڳے، کہیں دے دباؤ اچ نہ آوے، ہوشیار ہووے اور گالھ کوں خوبصورتی نال ورتاوݨ دا ہنر جاݨدا ہووے، اپݨے فن اچ ماہر ہووے، فیصلہ کرݨ اچ کنفیوز نہ ہووے تے اوندا اظہار مؤثر طریقے نال کر سگے۔
فاشسٹ حکومتین اچ سچ آکھݨ اچ بہوں مشکلات ہوندن ایں وجہ واسطے اٹکل دی بہوں لوڑھ ہوندی حے. ظاہر حے جیرھا بندہ سچائی کوں لکھدے او نہ تاں کہیں دا دباؤ قبول کر سگدے نہ ہی چُپ رہ سگدے۔ ایں واسطے سچ آکھݨ تے لکھݨ آلے واسطے اے ضروری ہوندے جو او اپݨے سچ نال قابض مافیا ، طاقتور اشرافیہ تے جبر قائم رکھݨ آلے اداریں کوں نہ صرف ننگا کر کے چیلنج کرے بلکہ اپݨے عمل نال کہیں کمزور کوں دھوکہ وی نہ ڈیوے۔۔!
اوکوں چاہیدا حے جو او کمزور تے پسے ہوئے طبقات دے حق دی خاطر ڈٹ ونجے تے اُنہیں دے محرومیں دے ذمہ دار طبقات دے خلاف ہر دستیاب فورم تیں اپݨی آواز چیندا رہ ونجے۔
مثال دے طور تیں جڈاں مزدور یا کسان کہیں مشکل اچ ہووے تاں اوندی مشکل دے حل واسطے اپݨے وزڈم دا استعمال کرے، مستقبل دی امید ڈیوے تے مقتدرہ دے مفادات کوں چیلنج کرے۔
جیرھے ویلھے اے آکھیا ویندے جو تعلیم یافتہ آدمی ان پڑھ بندے کولو بہتر حے تاں ایں وقت وی جرات مندی دا مظاہرہ کر کے اے پُچھݨا چاہیدا حے جو او کیویں سائیں؟؟ تعلیم یافتہ بندہ کیویں تے کیندے مفادات واسطے بہتر حے؟؟؟
ساڈے معاشرے اچ لوک عمومی انصاف تے عمومی آزادی دی گالھ تاں کریندن پر انہاں آپ ایں انصاف تے آزادی واسطے عملی طور تیں کُجھ وی نئیں کیتا ہوندا۔او سچائی اوکوں سمجھدن جیرھی اُنہاں واسطے چنڳی تے خوشنما نظر آندی پائی ہووے۔ حالانکہ سچائی کوئی گݨتری آلی چیز نئیں بلکہ اے وقت ویلھے نال گنڈھیل واقعات تے نتائج دا مجموعہ ہوندی حے. اینجھے لوکیں نال المیہ اے ہوندے جو انہاں کوں پتہ وی کائینی ہوندا جو اصل سچائی ہوندی کیا حے!!! سچائی تاں جرات تے مطالعہ منگدی حے۔
ساڈے اکثر دوست بغیر مطالعے دے سچو بݨ کے اپݨے ادھورے سچ کوں ڈوجھیں دی لعنت ملامت واسطے ورتیندن۔ میکوں اے تجربہ اوں ویلھے بہوں نشابر تھیا جڈاں میں تھر اچ ماحولیات دے حوالے نال کجھ ویڈیوز بݨایا تے اُتھوں دے تل وطنی لوکاں دا موقف بیان کیتا تے بہوں سارے وڈے وڈے دانشور تے لیفٹ دی سیاست کرݨ آلے دوست میڈے خلاف صرف ایں بنیاد تیں کٹھے تھی گئے جو اے کہیں این جی او دا ایجنڈا حے تے تُساں حقائق ہوں مسخ کر کے این جی او دے ایجنڈے تیں عمل پیرا ہاؤ۔۔! انہاں ساریں دوستاں اچوں کہیں بندے کوں اے پتا وی کائینا ہا جو تھر اچ تھیندا کیا پائے، کتنے پلانٹ لگدے پائین، کتنا لوگ ہجرت کر گئین ، کتنا زمیناں کمپنی کوں الاٹ تھائین، کتنا پکھی پرندے تے ڈوجھے جاندار متاثر تھائین، کتنا لوک کمپنی دے تشدد دی وجہ کولو مر گئین تے کتنے لوک روزانہ رینجرز دے چوکیں تیں سیکورٹی دے ناں تیں اپݨی آزادی کولو محروم تھیندن۔۔! بغیر مطالعہ تے علم آلا بندہ دلیل نال گالھ کرن دی بجائے فورا الزام لا کے عجیب بیوقوفانہ قسم دی رویہ جاتی اپروچ پاروں مخالف فریق کوں دشمن تصور کریندیں ہوئیں اوکوں فورا پورے قضئے کولو انج تصور کر کے اوکوں فتح کرن دی خوشی منیسی۔۔!
اجکل اگر اساں ڈیکھوں تاں ساڈی وسوں دی سیاست اچ سرگرم کجھ لوک ایں خاص فنومنا دا بہوں زیادہ شکار ہن تے اپݨے آپ کوں سرگرم لیڈر سمجھݨ دے زعم اچ مبتلا ہن تے باقی کجھ پڑھݨ، سکھݨ، دنیا دے وڈے ایشوز بارے جانݨ دی کوئی سِک وی کائینی۔۔!
جڈاں ایں ٹائپ دا مزاج بݨ ونڃے ول دلیل دے آوکھے بھوگ کوں ورتݨ دی بجائے ساؤکھا تے جزباتی طریقہ یعنی لیبلنگ تے الزام تراشی دا طریقہ ورتیا ویندے۔۔!
لیبلنگ تے الزام تراشی انفرادی سطح کولو گھن کے ادارہ جاتی سطح تک کمزور ریاستیں اچ بہوں سفاک طریقے نال ورتی ویندی حے جیرھی ڈڈہپ دی ہیک اینجھی تہہ کوں فروغ ڈیندی حے جیندا حتمی فائدہ غیر جمہوری رویہ رکھݨ آلے لوکاں تے اداریاں کوں تھیندے۔۔!