آفتاب نواز مستوئی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہک اطلاع دے مطابق محترمہ بے نظیر بھٹو صاحبہ دی برسی دے موقعے تے پہلی دفعہ انہاں دے مزار دے سامنڑیں پیپلز کلچرل ونگ سرائیکی وسیب دی طرفوں پہلی دفعہ باضابطہ طور تے نویکلا سرائیکی ثقافتی ادبی کیمپ لایا ویسے جیندے ءچ وسیب دے مہاندرے شعراء کرام تے فن کاریں کوں شرکت دی دعوت ڈتی ویندی پئی اے ۔۔۔اشو لال ‘ جہانگیر مخلص یا راشد عزیز بھٹہ پیپلز پارٹی دے عہدے تنظیم دا ناں سرائکستان یا سرائیکی وسیب دے بغیر کیوں گھدن ؟
” مہربانیں ” ایں اعتراض نال انہائیں دی تکڑی پنجا ڑ کڈھی اے ۔۔تنقید تعریف ‘ اختلاف حمایت ‘ پسند ناپسند ‘ ہر کہیں دا بنیادی انسانی تے آئینی حق اے ۔کوئی کہیں دا بدھل کوئے نی ‘ ایں دنیا ءچ ہر کوئی اپڑیں آپ کوں ہی سچا تے حقیقت پسند سمجھدے ” میں جو آکھداں صرف اوہو سچ اے باقی سب کوڑ اے ” اور ایہا کوڑی انا تے ضد پوری سرائیکی قوم کوں کھا لتھی اے ۔
بجائے ایندے جو جہڑا ذرا ایڈے اوڈے تھڑکدا تے کھسکدا پئے اوں کوں آپڑیں نال ٹورنڑ دی بجائے ہو ہا تے دھو دھا کر تے اگوں تے دھکا ڈے چھوڑئیے نتیجہ اے ہے جو چالہی سال گزر ونجنڑ دے باوجود نہ اج تک ہک سرائیکی پارٹی بنڑائی ونج سگی اے ناں کوئی متفقہ سرائیکی لیڈر اگوں تے آسگئیے ۔خبر نہیں اے ” کوکلا چھپاتی جمعرات آئی اے ۔۔۔” والی راند کے تئیں ٹرسی ۔اگر ایمانداری نال ڈٹھا ونجے تاں سرائیکی زبان دی اہمیت افادیت کوں منواونڑ ءچ سب توں وڈا تے اہم کردار شاعریں تے گلوکاریں دا ہے ۔وسیب ءچ سرائیکی مشاعرے ‘ موسیقی دا محفلاں دا نتیجہ اے جو سرائیکی ادب تے ثقافت کوں ودھارا ملئیے ایں سلسلے دا جیندا جاگدا ثبوت مہرے والے دا میلہ ہر کہیں دے سامنڑے اے ۔
اشو لال تے جہانگیر مخلص تے تنقید کرنڑ والے خود کئی دفعہ انہاں نال شام منا چکئین تے کئی دفعہ آپڑیں پروگرامیں دی صدارت کروا چکئین سبھو کجھ ریکارڈ تے موجود اے ۔۔۔پیپلز پارٹی سمیت ساکوں کہیں وی ملکی سیاسی جماعت نال ہمدردی کوئے نی جہڑیاں جو سرائیکی وسیب دے الگ تنظیمی یونٹ تاں بنڑائی کھڑئین بھل ناں ” اوپرا ” ڈتی کھڑئین ۔۔۔۔
البتہ اے ضرور آکھسوں ( میڈا ذاتی خیال تے بنیادی انسانی آئینی حق اے اختلاف رائے دا تمیز دے دائرے ءچ ہر کہیں کوں حق حاصل اے ) جو اشو لال جہانگیر مخلص تے راشد عزیز بھٹہ ساڈے وسیب ساڈی زبان ساڈی ثقافت دی سنجانڑ ہن او اگر پیپلز پارٹی دے کلچرل ونگ دا حصہ بنڑئین تاں انہاں دا بنیادی انسانی آئینی جمہوری حق ہا جہڑا انہاں استعمال کیتے لیکن اے وی تاں ڈیکھو جو او تاں سرائیکی وسیب لکھدے کھڑن ‘ ول او جیہڑا نواں قدم چئیندے پئین تے گڑھی خدابخش ءچ باضابطہ طور تے سرائیکی وسیب دا ہک نویکلا تے نشابر پروگرام کریندے پئین کیا ایندے نال سرائیکی زبان ادب تے ثقافت کوں ودھارا نہ ملسی ؟ ۔۔
کوئی منے یا نہ منے اساڈے نزدیک اے عمل قابل تعریف تے حوصلہ افزائی دا مستحق اے سرائیکی دے جہڑے دانشور شاعر ادیب قلمکار گلو کار تے آڑٹسٹ آپڑیں وسائل نال گڑھی خدا بخش پہنچ سگدن او ضرور ایں پروگرام کوں سوہاون تے جنہاں دے وسائل کوئے نی اور ونجنڑ وی چاہندن او اپڑیں اپڑیں علاقے دے پارٹی عہدیداریں نال رابطہ کرن ایں موقعے تے وسیب دے سارے پارٹی عہدیداریں دا وی فرض اے جو او پارٹی یا محترمہ بے نظیر نال عقیدت رکھنڑ والے شعراء کرام تے فن کاریں کوں عزت احترام نال گڑھی خدابخش گھن ونجنڑ تے آنونڑ دا انتظام کرن ۔۔۔جیوے سرائیکی جیوے سرائیکی وسیب ‘ سب دی خیر سب دا بھلا
آفتاب نواز مستوئی کی مزید تحریریں پڑھیں
About The Author
اے وی پڑھو
اسلم انصاری :ہک ہمہ دان عالم تے شاعر||رانا محبوب اختر
موہری سرائیکی تحریک دی کہاݨی…||ڈاکٹر احسن واگھا
فیمینسٹ!!!۔۔۔۔۔|| ذلفی