دیرہ خاں پی ڈی ایم دے جلسے وچ وت ول اوھو تماشہ||اکبر ملکانی

اکبر ملکانی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

دیرہ خاں پی ڈی ایم دے جلسے وچ وت ول اوھو تماشہ۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔
سرائیکی وسیب کوں باربار جنوبی پنجاب دے ناں نال پکاریا گئے۔اخر کیوں۔۔۔۔۔ساڈے گھر وچ ساکوں گالہیں کڈھنڑ دا کیا مقصد اے۔اساں ہینڑیں ہیں۔کمزور ہیں۔کلھے ہیں۔اتفاق کئینی۔کھیرو کھانڈ ہیں تہوں۔
ایندا مقصد اے وی تیں کئینی اگر اساں کٹھے کئینی۔کھیرو کھانڈ ہیں۔ جیندی مرضی اوے۔ او اوے ساڈے گھر وچ ساکوں مونہوں تیں مندے کڈھے۔اینکوں اساں کیا سمجھوں۔
اے بے عقل ان۔ان پڑھ ان۔جہل ان۔ انہیں کوں کہیں شئے دا علم کئینی۔اساں دیرے دے لوک ایں سارے وسیب دے لوک جنوبی پنجابی ہیں یا سرائیکی ہیں ؟ جے جنوبی پنجابی ہیں تیں کیویں ہیں۔ایندی کوئی لاجک۔۔۔۔۔۔؟
یا جیویں کہیں دے مونہوں وچ ید بد اوے۔او انویں الائی ونجے۔اساں چپ رھوں۔
مگر ہک گال میڈی یاد رکھو۔خدا دے گھر وچ بیشک دیر ضرور اے۔اندھیر کئینی۔ہک نہ ہک ڈیہنہ فاصلیں دے فیصلے ضرور تھیسن۔
پاکستان عوامی سرائیکی پارٹی دا کہیں وفاقی پارٹی نال کوئی لئینڑاں دئینڑاں نئیں نہ جھیڑا اے۔کمپین۔جلسے۔احتجاج انہیں دا آئینی حق اے۔او ضرور کرن۔مگر کہیں دی شناخت تیں حملے نہ کرن۔ شناخت خطے۔ وسیب۔وطن دی اجتماعی عزت ھوندی اے۔جڈاں کوئی کتلا طاقتور وی کیوں نہ ھووے اونکوں اے حق کوئی وی نئیں ڈے سگدا او کہیں دے گھر وچ ونج کیں او گھر آلیں کوں ودھ گھٹ الاوے۔
کیرھا سر چپ کریسوں۔کے تک سر نہ چیسوں۔ہر شئے دی ہک حد ھوندی اے۔
اساں سرائیکی ہیں۔ ساد مرادے لوک ہیں۔ساڈی شرافت ڈیکھو۔ اساں گھر آئے مہمان کوں کتلا عزت ڈیندے ہیں۔
اج کنوں 3 سال پہلے مختلف شکلیں دے ٹھگباز لوک ساڈے وسیب وچ ووءٹ گھننڑ آئے ہن۔اساں کملیں بھولیں لوکیں انہیں کوں ووٹ وی ڈتے ہن۔اپڑیں ثقافتی علامت اجرکاں وی پوایاں ہن۔الیکشن دے بعد انہیں نہ ووٹیں دا لحاظ کیتا ھا۔نہ اجرکیں دا خیال کیتا ھا۔او حکومت بنڑانونڑ دے بعد وی ساکوں آج تئیں انویں جنوبی پنجاب ودے اہدن۔ہیں گال دا ارمان تھیندے۔ڈکھ لگدے۔تہوں دھاں کڈھدے ہیں۔
اجاں او زخم چھٹے نہ ہن۔ڈوجھی ڈو ہتھڑ ڈانگ رات پی۔ ڈی۔ایم دے جلسے وچ وت ساڈے سر وچ مار ڈتی گئی اے۔
ہنڑ سمجھ آئی اے حکومتاں کھیڈنڑ آلے لوک ساڈے کڈاہیں وی خیر خواہ نئیں تھی سگدے۔
انہیں کوں ہیں گال دا چنگیں طرانویں پتہ اے۔سرائیکی گکڑیں دے بھا وکنڑ آلے لوک ان۔انہیں کوں وخت انونڑ تیں صرف سنہری خواب ڈکھالو۔ووٹیں دی واردات کرو۔ووٹ گھنو۔جلاوڑے ڈیوو۔
پتہ نئیں کڈاں عقل اوسی ایں اندھی تیں بے عقل مخلوق کوں۔کڈاں کہیں نال اپڑیں حقوق اور شناخت دا مطالبہ کریسن۔۔۔۔۔
بھرپور جلسیں دا مقصد اے ھ۔اساں سرائیکی لوکیں وچ اپڑیں گال پچاونونڑ وچ حالی تک کامیاب نسے تھی سگیئے۔اے گال کہیں المئیے کنوں گھٹ کئینی۔ہر کہیں کوں پتہ اے ۔دیرہ غازیخاں پورے ملک دا گیٹ وے ھ۔دیرہ غازیخاں تیں گجھیں الی کار ہرکہیں دی نگاہ اے۔ دیرہ غازیخاں ڈویثرن دے لوکیں کوں ہیں ہک گال احساس ھونونڑاں چاہیدا اے۔دیرہ غازیخاں ہر حوالے نال بہوں حساس علاقہ اے۔تہوں ایں شھر تیں ہر کہیں دی نگاہ اے۔کوئی اہدے دیرہ غازیخاں بلوچستان دا حصہ اے۔کوئی اہدے اے جنوبی پنجاب اے۔اخر کیوں ؟۔ایں ضلعے کوں ملک دی صدارت وی ملی اے۔صوبے دی گورنری وی ملی اے۔صوبے دی وزارت اے اعلی وی اکثر ملدی آندی اے۔چیف سیکرٹری دی سیٹ وی ملی اے۔ڈویثرن کوں وزیر اعظم وی ملئیے۔ڈھیر وڈے عہدے ان جیرھے ڈو ڈو واری ہیں ضلعے کوں ملین۔ایندے باوجود وی
بے روزگاری سبھ کنوں زیادہ ہیں ڈویثرن وچ اے۔تمام برگزیدہ عہدیں ملنڑ دے با وجود وی پچادھ ۔پہاڑ لاوارث اللہ دے حوالے ھ۔لوک ڈنگریں دے کٹھے اجاں تک دبیں دے پانڑیں کھڑے پیندین۔تعلیم دے ریشو کوں چا ڈیکھوں اجاں تک کالی کالے دے فیصلے بھا پانڑیں تیں پئے تھیندن۔
اگر ساڈے ایں وسبے وچ تعلیم ھوندی رات پی ڈی ایم دے جلسے وچ حقوق دے دے نعرے لگن ھا۔صحت دے نعرے لگن ھا۔۔تعلیم دے نعرے لگن ھا۔شناخت دے نعرے لگن ھا۔سنجانڑ دے نعرے لگن ھا۔سرائیکستان دے نعرے لگن ھا۔وارداتی نعرے نہ لگن ھا۔ثقافت۔سنجانڑ ۔کلچر دے دشمنیں دے گل وچ سرائیکی اجرکاں نہ ھونون ھا۔بیشک انہیں کوں پوایاں کہیں نئیں۔توڑے جو خود گھن پاتین نیں۔انہیں کوں پتہ ھا۔سرائیکی اجرک تیں ڈان تھیندن۔
بھلا نال ایمان دے ڈسو جنہیں کلھ جاگ پنجابی جاگ دے نعرے مارین۔انہیں دے گل وچ سرائیکی اجرکاں اپڑیں سنجانڑ نال بد نیتی نئیں۔
رات اے سارے لوک جیرھے سٹیج تیں ہن۔یاجیرھے انہیں دے اینٹی حکومت وچ ہن۔انہیں وچو کہیں ہک دا ناں گھن کیں ڈسو۔جئیں سرائیکی قوم نال واردات نہ کیتی ھووے۔دوکھا نہ کیتا ھووے۔حکومت آلے ھونون تیں بھانویں اپوزیشن آلے ھونون اے سارے دے سارے وارداتی لوک ان۔جیرھے ہمیشہ کہیں نہ کہیں شکل وچ سرائیکی قوم نال واردات کریندے رھ ویندن۔اخر کیوں؟
وگرنہ اے کوئی گال اے۔وسیب دے بہوں وڈے شھر۔ ضلعے وچ جلسہ ھووے۔سٹیج تیں سرائیکستان صوبے دی گال نہ تھیوے۔پنڈال وچو سرائیکی صوبے سرائیکستان دے حق وچ ہک نعرہ وی نہ لگے۔
پنڈال وچ جیرھے لوک 5 ہزار تیں بھانویں 10 ہزار کٹھے ہن۔کیا اے پنجابی ہن۔کیا اے پختون ہن۔ کیا اے بلوچ ہن۔کیا اے سندھی ہن۔اگر اے ایں نہ ہن تیں وت کون ہن ؟
اے سارے سرائیکی ہن۔ہیں ضلعے دے لوک ہن۔جنہیں ساری زندگی سرائیکی مشاعرے سنڑین۔سرائیکی گلوکاریں کوں سنڑیئے۔سرور کربلائی کوں سنڑیئے۔جانباز جتوئی کوں سنڑیئے۔مہجور بخآری کوں سنڑیئے۔اقبال سوکڑی کوں سنڑیئے۔نورمحمد سائل کوں سنڑیے۔محسن نقوی کوں سنڑیئے۔احمد خاں طارق کوں سنڑیئے۔عزیز شاھد کوں سنڑئیے۔نور محمد فیضی کوں سنئیے۔کیف انصاری کوں سنڑیئے۔خاور جسمانی کوں سنڑیئے۔سعید راشد کوں سنڑیئے۔شاکر تونسوی کوں سنڑیئے۔اقبال نصرت کوں سنڑیئے۔ریاض عصمت کوں سنڑیے۔مصطفے خادم۔سیف اللہ آصف کوں سنڑییے۔قربان کلاچی کوں سنڑیئے۔اللہ وسایا شرر کوں سنڑیئے۔عاشق بزدار۔جمشید کمتر۔اشاد ناصر۔پنل جتوئی۔نزیر فیض مگی۔فیض علی فیض فقیر۔عبدالمجید ذوق۔خلیل فریدی۔عبدالکریم محسن۔عشرت لغاری۔انہیں دے علاؤہ پٹھانے خاں۔منصور ملنگی۔فاروق محرم۔خادم ڈیروی۔عنصر کھچی۔اعظم لشاری۔سراج بھٹہ۔اعظم عادل انہیں شاعریں گلوکاریں دے بارے جناب دی کیا رائے ھ۔اے سارے پنجابی شاعر۔گلوکار ان یا سرائیکی شاعر تیں گلوکار ان۔ اے جیڈے وڈے سرائیکی مہان شاعریں یا گلوکاریں دے ھونونڑ دے باوجود وی کوئی ساکوں جنوبی پنجاب اکھے۔ آوندا مونہوں مکالا نئیں تیں بیا کیا ھ۔ جڈاں سرائیکی عوام کوں عقل ایا۔پائی پائی دا حساب گھنسن۔
ساکوں جامپور الی صوبائی سیٹ وی کئینی بھلی او وی ساکوں چنگیں طرانویں یاد کھڑی اے۔سرائیکی ووٹیں نال جیتنڑ آلے شہباز شریف نیں لاھور ونج کیں آکھیا ھا۔میں سرائیکی مقدمے کوں سرائیکی دھاڑ دھاڑ کوں جامپور وچ دفن کر ایاں۔ایں بیان دے بعد میں جھوک اترا۔کوٹ چھٹہ الی سیٹ تیں اتھو دے غیرت مند سرائیکیں کوں سرخ سلام پیش کرینداں۔جنہیں جامپور دا تازہ پور چاتا ھا۔کوئی پچھے شہباز شریف کنوں واہ جو سرائیکیں دی عزت کیتی۔انہیں جناب کوں ووٹ ڈتن۔جناب لاھور ونج کیں اہدیں میں سرائیکی تحریک کوں جامپور وچ دفن کر ایاں۔سرائیکی غیرت مند قوم ان۔جڈاں انہیں وچ دشمنی جاگدی اے۔ اے پور گھندن۔پور چیندن۔ ہیں گال کوں پلے بدھ ایں وسیب وچ پیر پاتا کر۔اے سبق آموز نصیحت اے۔
اجاں جناب کوں شئیت سمجھ نئیں ائی۔ انویں ہیں میڈے وسیب وچ اجاں تک جنوبی پنجاب دے نعرے مرویندا ودیں۔مہربانی کرو جناب۔ساکوں جنوبی پنجاب کوئی نہ اکھے۔جئیں وی ساکوں بھانویں حکومت اے تیں بھانویں اپوزیشن اے جنوبی پنجاب اکھیا۔کوٹ جھوک آلے رزلٹ کوں ضرور سامہڑیں رکھنڑ کار اے۔
ایں رات آلے جلسے وچ ہک گلہ جناب مولانا فضل الرحمن کنوں وی ھ۔او وی سرائیکی صوبے دی گال نئیں کریندا۔او وی ساکوں جنوبی پنجاب اہدے۔ساڈا ادھار قرض مولانا صاحب تیں وی ھ پیا۔ہیں دیرہ غازیخاں۔تونسہ الی قومی اسمبلی الی سیٹ تیں دیرہ تونسے دی سرائیکی عوام نیں جناب دے والد مولانا مفتی محمود صاحب کوں جتوایا ھا۔رات جناب دی پارٹی جلسے دی میزبان ھئی۔بکھ ننگ دی گال کریندی رھی اے۔مہنگائی دی گال کریندی رہی اے۔نئیں گال تھئی تیں صرف محکوم مظلوم سرائیکی قوم دی نئیں تھئی۔ کم از کم جناب دی جماعت تاں ساکوں جنوبی پنجاب نہ آکھے ھا۔ساڈی تاں شناخت دی گال ھئی۔حق سچ دی گال ھئی۔شناخت تاں رسول پاک کوں وی پیاری ھئی۔رسول پاک جڈاں مکے پاک ھوندے ہن۔جناب آپ کوں مکی سڈویندے ہن۔جڈاں مدینے پاک ھوندے ہن۔اپ کوں مدنی سڈویندے ہن۔اساں شناخت دا مطالبہ سنت اے رسول سمجھ کیں کریندے ہیں۔ہیں ہک گال دی میکوں سمجھ اولو نئیں اندی۔
اخر اے ساریاں وفاقی جماعتاں جناب دی جماعت سمیت ساکوں ساڈی شناخت کنوں کیوں محروم رکھیندین۔ساڈاجرم؟
اساں جنوبی پنجابی نسے۔نسے۔نسے
ساکوں پنجابی نئیں اندی۔نئیں اندی۔نئیں اندی۔
ساڈے سر تیں جنوبی پنجاب کت واسطے تھپیا کھڑے۔اخر اے کیندی سازش اے۔وچلی گال ساکوں کیوں نوھے ڈسیندے۔ساکوں ساڈے وسائل کنوں کیوں محروم کیتا ویندا پئے۔
کیا ساڈے وڈکے کتھائیں کرپشن دا شکار تیں نئیں۔پنجاب دے ہتھ وچ وکئیے تیں نئیں کھڑے۔تہوں اے پنجاب دے اکھیئے لگ ساکوں جنوبی پنجاب اہدے کھڑن۔میں سمجھداں اے انہیں دے نال ایں جنوبی پنجاب آلے لعنتی لوظ وچ برابر دے شریک ان۔جے اللہ نیں بھڑایا جڈاں حساب تھیا اے وی برابر دا حساب ڈیسن۔اور اساں اے حساب ضرور گھنسوں۔شکریہ۔

آخر وچ ہک وضاحت کرنڑ ضروری سمجھداں۔مکمل تحقیق دے بعد ایں گال دی وڈی خشی تھئی اے۔ جیرھیاں سٹیج تیں رات وارداتی قایدین نیلیاں اجرکاں ووٹیں گھننڑ واسطے گل وچ پائی بیٹھے ہن۔اے اجرکاں انہیں کوں نہ سرائیکی عوام نیں پوائین۔نہ کہیں سرائیکی رہنما نیں پوائین۔اے اجرکاں ووٹیں دی واردات کرنڑ سانگے دوکانیں تو آپ مل گھن کیں پائی بیٹھے ہن۔ساڈے واسطے اے بہوں خشی دی گال اے۔ساڈے سارے وسیب وچ اے ہنڑ نیلی اجرک دے بغیر جلسے نئیں کر سگدے۔حکومت اور اپوزیشن دی نیلی اجرک گچی دا تاڑ بنڑ چکی اے۔ایں اجرک دے بغیر کوئی جلسہ جلسہ نئیں ھوندا۔ہیں گال دی پورے وسیب کوں بلخصوص ظہور دھریجہ کوں ڈھیر ڈھیر مبارخ ھووے۔

توھاڈا اپڑاں۔محمد اکبر خاں ذات ملکانڑیں۔قوم سرائیکی۔چیرمین پاکستان عوامی سرائیکی پارٹی ۔
سرائیکستان ھاوس دیرہ غازیخاں۔

About The Author

dailyswail

See author's posts