ہک لغاری سب تے بھاری(پہلی لڑی)|| زلفی

( اے کہانی بہوں لمبی حے تے ایندے اچ بہوں نازک موڑ ہن، بے اعتنائی حے، قصے ہن، ڈُکھ حے ، میں حے، لبرلزم دے خلاف مہمان دے وڈے زور دے وچار ہن، گاندھی تے نیلسن مینڈیلا کوں ایجنٹ ثابت کرݨ دا فلسفہ حے تے وساخ ناول دا قضیہ حے لہذا ایکوں ہیکی قسط اچ جاری نئیں کیتا ونج سگیندا۔ کہانی دیاں پݨجاں کریندے ہیں کچاوے دے نال راہسو تاں جو منزل تک پُج سگوں)

پہلی لڑی
ڈاند تے ڈاند ہا پر پیا موئے اے اکھاݨ شئیت تُساں سُݨا ہووے۔۔اچھا کائینوحے سُݨیاں تاں خیر حے۔۔!
20 اکتوبر دی رات سرائیکی وسوں دے جڳ مشہور بلکہ مایہ ناز صحافی سئیں نذیر لغاری دے ناول ” وساخ” دی تقریب رونمائی کوٹ ادو اچ قیصر صاحب دی جاہ تیں منعقد تھائی۔
قیصر صاحب کم دا جوان حے ، ساریں دوستیں کوں عزت ڈیندے، پیار کریندے تے کہیں کہیں ویلھے چس وی چوایندے۔
برقی قُمقمے ، ڈیوے تے بھوئیں تیں دریاں وچھیاں پیاں ہن۔ کتیں دی چاندݨی رات دی خُنکی دے ماحول اچ نذیر لغاری دا پینا فلیکس ایں جادوئی ماحول اچ ڈونگھی سنجیدگی دا استعارہ بݨ کے اوپرے پن دا احساس ڈیویندا کھڑا ہائی۔
سنگتی ساتھی آوݨ لڳے تےٹولیں اچ بہہ کے گپاں لاوݨ پائے ڳئے۔ ہر ٹولی اچ ہیک وکھری ڈسکشن ، وکھرے وچار تے مہمان دی آمد دا انتظار۔۔!!
اٹھ وجے دے قریب اطلاع ملی جو نذیر خان بس پُجݨ آلا حے ۔ میزبان شودا لوکیں دو فون کریندا جو آ ونجو یارلغاری صاحب آوݨ آلا حے۔۔

میکوں ایویں لڳا جیویں کہیں دربار اچ بادشاہ سلامت دا انتظار ہووے تے سائلین ظلِ الہی دی راہ تکیندے بیٹھے ہوون۔ تھوڑی دیر بعد ہیک وڈی ساری یورو گڈی باہروں آ کے رُکی تے لغاری صاحب اپݨے مُشیریں دے جھُرمٹ اچوں نمودار تھائے ۔ چہرے دے تاثرات کولو ایویں لگدا ہا جو جیویں اوندی توقعات تیں پاݨی پھر گیا ہووے۔۔نہ کوئی بانہیاں، نہ کوئی نوکر،نہ پُھل سٹݨ دی روایت تے نہ ہی جِھک نوائی تے نہ کوئی نعرہ ۔۔ایں کسمپُرسی دی حالت اچ سرکار پنڈال اچ تشریف گھن آئین تاں اگوں لوکیں دا جمِ غفیر وی کائینا ہا۔۔! بس چیدہ چیدہ لوک آئے بیٹھے ہن ۔ ہیک چیکڑ ڈوجھا بھیڈیں چا مُترے دے مصداق لغاری صاحب دل برداشتہ جہیں تھی گئے۔ خیر چیدہ چیدہ لوک لغاری صاحب کوں ملے سلام دعا کیتی تے اپݨی اپݨی جاہ تیں سارے بہہ ڳئے۔۔!
میزبان شودا اڈیں ونڃے اوڈیں ونڃے پر آوݨ ونجݨ نال کیا تھیوݨا ہا ۔۔!!! پھاتی دا کیہاں پھتکݨ۔۔
ڳالہیں گالہیں اچ ظلِ الہی میزبان کوں وارننگ نُما انداز اچ آکھیا جو تُساں جتنا بندے آکھے ہن میں گِݨساں ۔۔!
میکوں اتھاؤں اندازہ تھیا جو آوݨ آلا کیا کیا ارمان دل اچ لُکا کے اتھاں آیا ودا ہا۔۔!
لغاری صاحب ادھ اچ پلتھری مار کے بہہ ڳئے تے ٹانواں لوک وی بے ترتیب شکل اچ اپݨی اپݨی جاہ تیں بیٹھے ہوون۔۔! کہیں ویلھے گہری خاموشی تھی ونجے تے کہیں ویلھے کوئی ہیک ادھی ڳالھ کوئی کرے ول خاموشی۔۔! محفل دا نہ کوئی ربط، نہ کوئی تنظیم تے نہ کوئی فارمل آدُر۔۔!
اے لمحے میزبان تے مہمان ڈوہیں واسطے کافی بھاری بھرکم ہوندن تے ڈوہیں اندری اندر ہیک ڈوجھے کوں چنگے لوظیں اچ یاد تاں نہ کریندے ہوسن۔۔!!!
خیر گھنٹے کھن دے بعد اتنا لوک تھی گئے جو کہیں آوݨ آلے دا دل جھل تھی پووے۔۔!

مختیار بُھٹے صاحب مائیک ہتھ اچ پا کے ساریں دوستیں کوں آکھیا جو تہاڈی اجازت ہووے تاں پروگرام کوں فارمل رنگ اچ شروع کروں۔۔! لوک سٹیج دو منہ کر تے بہہ ڳئے۔ لغاری صاحب دے کٹھے آوندی فیملی وی ہائی تے کُجھ مقامی تریمتیں وی میزبان دے گھر تشریف فرما ہن او وی آ ڳئیاں تے پروگرام دا باقاعدہ آغاز تھیا۔۔!