ڈیرہ گُھوکدا پے ||گلزار احمد

سرائیکی میں۔ گھوکدا پے۔ کا مطلب ہے شھر میں ادبی علمی ثقافتی تجارتی سرگرمیاں زوروں پر ہیں۔

(گھوکدا کا صحیح معنی مسلسل گونج ہے جو کریم نواز صاحب نے کوئٹہ سے فون کر کے بتاے ۔شکریہ کریم نواز صاحب)

آج جمعتہ المبارک زیارت کا دن مشھور ہے بلکہ پشتو میں تو جمعرات کو کچھ دوست ۔۔زیارت پہ اورز ۔۔ کہتے ہیں۔ تو آج صبح ڈیرہ کے مورخ ۔ادیب ۔ڈرامہ نگار۔شاعر۔مصنف مرشد حفیظ گیلانی کے دربار پر حاضری دی اور اپنے دماغ کو علمی مجلس میں تازہ وٹامنز مہیا کیے۔ سید ارشاد حسین شاہ نے مرشد گیلانی کے چرنوں میں حلوے کا ڈبہ پیش کیا ۔دو گھنٹے کی میٹنگ تھی۔ میں تو گیلانی صاحب سے ڈیرہ کے کلچر کے روٹس پر بات کرتا رہا البتہ ارشاد شاہ صاحب مر شد گیلانی سے کوئ شادی وادی کا تعویز اور ھُدا لینے کے چکر میں تھے۔ دیکھیے پاتے ہیں عشاق بتوں سے کیا فیض ۔اک برہمن نے کہا ہے یہ سال اچھا ہے۔ ارشاد شاہ صاحب کے ولولے اور جذبے ساون کے مہینے میں جوبن پر ہیں۔

گزشتہ رات مفتی محمود کالج میں پروفیسر شھاب صفدر صاحب کی نئی کتاب گم گشتہ کی تقریب رونمائی میں شرکت کی جس میں لاہور اور ڈیرہ کے ممتاز ادبی ستارے جمع تھے۔ بہت مزہ آیا۔ موسم بھی دو دن سے سہانہ اور عاشقانہ ہے اور رات کو کنڑ منڑ یا رم جھم ہوتی رہی۔