سرائیکی لوک سانجھ میٹنگ رپورٹ|| ذلفی

سرائیکی لوک سانجھ دی پاسیوں کوٹ سلطان دے سرائیکی صوبہ چتاوݨی مارچ پچھوں سنگت دا ہک کٹھ  4اگست کوں سِتریا ڳیا جیندے وچ صفدر کلاسرہ، ذوالفقار علی لنڈ ، مختیار بھٹہ، نعیم چشتی، ملازم حسین قیصر، مشتاق گاݙی، یعقوب نتکاݨی، فضلِ رب، اظہار شاہ، نعمان کلاسرہ، خادم حسین کھر، شکور حسین رَلت کیتی۔

ایں کٹھ دا ے ترائے ایجنڈہ پوائنٹس اے ہَن۔

1۔ سرائیکی صوبہ چتاوݨی مارچ دی کمی بیشی دی پرکھ

.2لوک سانجھ دی سلہاڑ ۔ اَݙ اݨ

3۔ اڳونہے کم دی چیتے کاری

میٹنگ وچ چتاوݨی مارچ کوں ہک ویلھے سِر دا چنڳا تے کامیاب اَہر منیا ڳیا۔ اینجھے اَہریں کوں ودھیک چنڳاں بݨاوݨ کیتے ہیٹھلاں تجویزاں ݙ تیاں ڳیاں۔

• اینجھے کہیں پبلک پروگرام کنیں پیلھوں علاقے وچ پمفلٹ ونڈیجن۔

• ریلی یا مارچ دے روٹ دی سوچی سمجھی سنُڄاݨ ہووے۔

• سرائیکی وسیب دے ݙوجھیں شاہریں اچ کارنر میٹنگز تھیوݨا چاہیدن تاں جو وَدھ لوک ٻانہہ ٻیل تھی سڳن

• تریمتیں تے شاگردیں دی رَلت کوں ودھاوݨ دی لوڑھ ہے تے ایں سانگے تریمت سانجھ کوں ٹھہایا ونڄے تے شاگردیں نال سانجھ ودھائی ونڄے۔

• کم دی اڳیتی ونڈ ہووے تے ہر کہیں کوں اپݨے کم کار دی پوری ڄاݨ ہووے

• موسم دا دھیان رَکھیجے

چتاوݨی مارچ دی پَرکھ پچھوں ݙ وجھے ایجنڈہ پوائنٹ "لوک سانجھ دی سلہاڑ ۔ اݙاݨ "سانگے ڳالھ مہاڑ تھئی۔ مشتاق گاݙی لوک سانجھ دے دریگھے پندھ دا ہک لُنڈا حال ݙسیا۔ اوں آکھیا جو 1994 پچھوں لوک سانجھ ہک ڈِھلی ڈھالی رِیت تے نیٹ ورک وانگ کم کریندی ریہی ہے۔ اڄ کمیونیکیشن دے ودھارے نال سلہاڑ تے سانجھ دے ننویں وَسیلے تے ڈھنگ ڈھالے آڳئین جنہیں دے ورتارے نال کم ٻہوں اڳونہاں تھی سڳدے۔ پراݨے سنٹرلائزڈ سٹرکچر نئیں چل سڳدے۔ لوک سانجھ جے اپݨی سَلہاڑ تے سانجھ ودھاوݨی ہے تاں وت اڄوکے ویلھے دے لوڑھیں تے وسیلیں کوں چیتے وچ رکھیا ونڄے۔

ایں ایجنڈہ پوائنٹ تے ہک بھراویں ڳالھ مہاڑ پچھوں کُجھ منڈھلیاں ڳالھیں اے متھیاں ڳیاں۔

• کہیں ننویں مستقل سلہاڑ کنیں پیلھوں ہک سال کیتے عبوری۔ عارضی سلہاڑ کیتی ونڄے جیڑھی اوں مستقل سلہاڑ کیتے راہ پَدھرا کرے۔

• ایں عبوری۔ عارضی سلہاڑ دے ݙو پوکھوں ہوون۔ ہک دا ناں ” سلہاڑ اَہر” تے ٻئے دا ناں ” پرچول پُکھ ” ہووے۔

انہیں دی ودھیک ڄاݨ کاری ہیٹھوں ݙتی ڳئی ہے۔

سلہاڑ اَہر

• سلہاڑ اَہر دا کم پورے وسیب وچ لوک سانجھ دی سنگت کوں جوڑن ٹھہاوݨ ، ہر ڈسٹرکٹ، ٹاؤن سنگت نال صلاح مشورے کرݨ، سلہاڑ اہر دے ممبریں وچ ودھارا کرݨ، چَلدڑ کم کوں اڳونہاں کرݨ تے سال پچھوں ہک وسیبی کٹھ کرݨ تاں جو مستقل اݙاݨ یا سلہاڑ کوں قائم کیتا ونڄے۔

• ایں سلہاڑ اَہر دے ممبریں دے ناں اے ہن۔ صفدر کلاسرہ ( کوٹ سلطان)؛ فضل رب ( شادن لُنڈ)؛ اظہار شاہ ( پہاڑ پور)؛ مختیار بُھٹہ ( کوٹ ادو)؛ خالد خان میراݨی ( لیہ)؛ عمران کہاوڑ ( بھکر)؛ راول گنجیرا تے آصف مجتبی( میانوالی)؛ شوکت شوری ، ساجد دمانی ( ڈیرہ اسماعیل خان) ؛ جُنید بزدار ( راجن پور) ؛ سید منصور شاہ ( ملتان)؛ میاں زبیر تے خلیل بخاری( رحیم یار خان)۔

• ہک سال کیتے ایں سلہاڑ اَہر دا ” مَہا اَہری” صفدر کلاسرہ کوں بݨایا ڳئے۔ ایں سلہاڑ اَہر وچ پورے وسیب دے ٻنہیں سبھے علاقیں کنیں آپت دے صلاح مشورے نال ممبریں دا ساندوڑاند ودھارا کیتا ویسی تاں جو ایندا اݙاݨ دریگھا تھیوے۔

• سلہاڑ اَہر کنیں وادھوں ݙ و انج پرچول پُکھ بݨائے ڳئے۔

بھوئیں تے پاݨی پرچول پُکھ

اے پُکھ سرائیکی خطے اچ تھیون آلی الاٹمنٹ، قبضے تے زمین دے سٹیٹس ( سٹیٹ لینڈ، جنگل واسطے مختص زمین، رکھوک وغیرہ) پاݨی دی ونڈ ، دریا جنگل دی رَکھ تے ایکالوجیکل سسٹم تیں ریسرچ دا کم کریسی ۔ ایں پرچول پُکھ وچ اظہر لاشاری، مشتاق گاݙی، خادم کھر ، یعقوب نتکاݨی کم کریسن۔

ٻولی کلچر پرچول پُکھ

اے پُکھ سرائیکی ٻولی تے کلچر دی پرکھ پرچول تے ودھارے دا کم کریسی ۔ سرائیکی لینگوئیج تے کلچر دی ریسرچ دے نال نال اے پکھ "اینٹی۔ نیٹو لینگوئیج تے کلچر پالیسی ” دے وٹاندرے کیتے اَہر کریسی۔ لوک سانجھ دے سنڄاݨ جرنل دی چھپائی ایں پُکھ دا کم ہوسی۔ ایں پُکھ دے ممبر ڈاکٹر احسن واگھا، اون گورماݨی، وقار ملغاݨی ہوسن۔ ایندی ممبر شب وچ آپت دے صلاح مشورے نال ودھارا کیتا ویسی۔

میڈیا پُکھ

ایندا کم میڈیا ، خاص کر سوشل میڈیا دا سُلھڑا ورتارا ہوسی۔ ایں سانگے سوشل میڈیا پلیٹ فارمز بݨاوݨ چلاوݨ، ڈاکومنٹیشن کرݨ، ٹرینڈ بݨاوݨ، ڈیجیٹل میٹنگز تے ویبینار سترݨ ، سرائیکی لوک سانجھ دی ڈیجیٹل لائبریری تے ویب سائٹ ڈویپلمنٹ دے کم اہم ہوسن۔ ایندے ممبرز ذوالفقار لُنڈ، اسد بُزدارنعمان کلاسرہ، اسد ڄوتا تے رانجھا جوگی ہوسن۔

چھیکڑ وچ اڳونہیں اَہریں کیتے چیتےکاری تھئی۔ کئی تجویزاں سامہݨے آئیاں۔ ایں سانگے کَتیں وچ سرائیکی صوبہ سَنگ، ملتان بکھ ہڑتال، پورے وسیب اچ کارنر میٹنگز جہیں انجو انج ڈھنگ ڈھالیں دی پرکھ تھئی۔ اڳونہے پروگرام کوں فائنل کرݨ کیتے اڳلے مہینے دے پیلھے ہفتہ ہک ٻئے کٹھ کوں سترݨ دا مِتھیا ڳیا۔