سرائیکی ناول ’’وساخ‘‘||اسلم رسولپوری

نذیر لغاری ہمہ صفت لکھاری ہن۔اوکئی کتابیں دے مصنف ہن۔پچھلے ڈینہ انھیں دا سرائیکی ناول وساخ آئے

ایں ناول دے ہزار پہلو ہن۔ایہ سرائیکی وسیب کنوں پوری عالمی دنیا دا گھیرا کریندے۔ایہ سرائیکی دی ماضی تے قریب حال دی تاریخ ہے۔ایندے وچ مردود کرداریں دا ذکر وی ہے اتے اساڈے محبوب ہیرو دا وی۔

اتھاں احمد خان کھرل وی ہے تے بھٹو وی۔اتھاں جبر دے خلاف مزاحمت دے ہزار رنگ ہن اتھاں ضیاء دے خلاف مزاحمت وی ہے اتے غلام رسول ڈڈا دی یڑک پاڑٹی دے جاگیرداریں دے خلاف ننگے جلوس وی ہن۔اتھاں فلسفے دے پروفیسر اختر دے فلسفے دے بنیادی مسائل اتے چینی فلسفے تے لیکچر وی ہن۔اتھاں سسلی تے اٹلی دے جرائم پیشہ گروہیں داجنوبی امریکہ تک کاروائیاں دا تزکرہ وی ہے۔ایہ ہک رات دی محفل ہے ۔اتھاں موسیقی وی ہے تے کھاونڑ پیونڑ دے وقفے وی۔

اتھاں فرضی کردار وی ہن۔اتے جیندے جاگدے کجھ کردار وی جیھرے کجھ عرصہ پہلے گزر گئین۔اتھاں استاد فداحسین گاڈی دیاں کاکا دے ناں نال سرائیکی قومی مسئلہ تے تقریراں وی۔تھاں اسماعیل احمدانی وی ہے تے اختر علی بلوچ وی

ایہ کافی محنت مشقت تے مطالعے دی بنیاد تے لکھیا گیا ناول ہے۔

ایندا اسلوب اپڑاں ہے۔اتے ناولیں وچ سنگ میل دی حیثت رکھدے۔ایہ کہیں گارشیا مارکیز بنڑنڑ دے خبط وچ لکھیا گیا ناول نہیں بلکہ اعتماد نال اپڑاں رستہ بنڑایا گئے۔جیرھا اپڑیں فالورز پیدا کریسی