حکایت معاہدہ : پکھی واس||رفعت عباس

معاہدہ : پکھی واس

ایہ ہک اینجھے معاہدے دی ڈَس اے جیں وچ اساں جاہ ویلے تے لوکیں دی سانجھ دا نواں ہک سوب کڈھیا ‘ ایہ بے شک ایں دھرتی دے رُل گئے ماہنڑواں دا قصہ ہا ‘ جنہاں دے کاگتاں دے رنگلے گھوڑیاں تے کُجھ لوک آئے ہن ‘ کجھ شئیں تے نشانیاں کہانیاں وچوں ڈُسیاں ہَن ‘ شمیم عارف قریشی سال پہلے ٹُر گیا ہا موجود ہا ‘ راما پیر کاسبو توں چٹے اپنڑے گھوڑے تے آیا ہا تے فرسا رام مِٹھی توں رکشے تے ‘ ہک شاعر تے ڈو بئے جنڑے ریل گاڈی تے پُجے ہَن ‘ تہوں اساں آکھے ایہ معاہدہ جاہ تے ویلے وچوں نواں ہک سوب پیا کڈھیندا ہا ‘ ایں ویلے سامنڑے ساڈے کنول دے پُھلیں تے ڈوڈیاں دی ڈھنڈ ہئی ‘ اُتھاں کاٹھ دیاں چھتریاں ہَن تے نکا نکا مینہ پیا پوندا ہا ‘ پچھوں چنانہہ دا دریا پیا وہندا ہا تے گالھ ایں معاہدے دی ٹُری ہئی :

1) ایہ پکھی واس ایں دھرتی دے سائیں ہِن

2) اِنہاں کوں کہیں ویلے دے دروہ وچوں ماریا تے شہریں توں کڈھیا گئے

3) ایہ دھرتی واس دھاڑل دے بَھو وچوں ہمیشاں پندھ وچ ہِن

4) ایہ دھاڑل دے مخبر تے دلال توں ڈردن

5) ایہ پکھی واس واپس ول سگدے ہِن

6) ہر شہر دے اُبھے لمے چڑھدے لاہندے پاسوں انہاں دیاں نویاں کالونیاں سِتریجن

7) گھر نویں تے سوہنڑے نقشے وچوں ہووں جنہاں تے جنگل تے شہر ڈوہیں دی جھال پووے

گھر گھٹ توں گھٹ پنج مرلیاں وچ تے ترے ترے کمریاں دے ہوون

9) ہر گھر وچ ہک پوڑی چھت تانڑیں ونجے تے چھت تے وت کمرہ تے برانڈا ہووے

10) در وڈے تے تاکڑیاں ہوا دار ہوون

11) سڑکاں چوڑیاں تے ڈوہیں پاسوں ونڑ ہوون

12) ہر گھر دے پچھواڑے پَھل دار درخت ہوون

13) ہر کالونی دے ادھ وچ پنج ہزار کانا درگھا تے چوڑا جَل پُھلیں تے مچھیاں دا تلا ہووے

14) ہر کالونی وچ ہک ہزار کانا درگھا تے چوڑا پوڑی در پوڑی دا حمام ہووے

15) انہاں دے قصیاں تے شام دے جھیڑیاں کیتے ڈو ہزار مربع کانا دا وڈا ہال ہووے

16)اِنہاں دیاں ما بولیاں وچ تل وطنی سکول ہووے اگوں ایں سکول توں شہر دے سکولاں وچ بال ونجن

17) ہر کالونی دا رنگ انہاں دی مرضی موجب گوڑھا بھانویں پِکھا ہووے

18) انہاں دیاں کال کڑچھیاں, نیل کنٹھ ‘ رِچھ بھولوں نانگ اِنہاں دے نال ہوون

19) اوہ تئیں کہیں نکے وڈے شہر دا نقشہ منظور نئیں جے تانڑیں تَل وطنیاں دے گھر نہ ہوون

20) جیڑھے جیڑھے شہر پرانڑے وس گئے ہِن اُُنہاں وچ اِنہاں سائیاں سانگے نقشہ نواں تھیوے

21) اِنہاں تَل جائیاں کوں اُنہَیں دے کم کار وچوں رزق دا آدر ڈِتا ونجے

22) جیڑھی ریاست دھرتی دے اِنہاں سائیاں کولوں اوپری ہے اوہ ساڈے کیتے نئیں

اج 4 جولائی 2019 کوں ست وجے شام اساں دریا چناب دی لاہندی مَنڑ (چناب ویسٹ بنک) تیں شمیم عارف قریشی دی پارت , تھر پارکر دے سنگتیاں….. کارونجھر جبل , کاسبو دے مور ‘ راما پیر ‘ بُگھار دی جنگل جلیبی , فرسا رام ‘ کانٹیو دی بیر, تارا چند…..دی ہوند ‘ ان ڈِٹھی ان گَنڑی مخلوق دی جھال تے مظفر بخاری , مرتضے زاہد دی گواہی وچ ایہ گالہیں ستھیاں