حکایت: اوہ لالٹیناں کٹھیاں کریندا ہا۔۔۔رفعت عباس

ڈو ہزار پندھراں وچ اوہ ہک پرانڑے شہر ساکوں ٹکریا ‘ اونکوں اپنڑیاں بتیاں دے ناں سارے یاد ہَن اوہ کِتھاں کِتھاں لاتھیاں جاہیں ساریاں یاد ہَن

رفعت عباس

۔۔۔۔۔۔۔۔۔۔۔۔۔۔۔۔۔۔۔۔۔

حکایت
اوہ لالٹیناں کٹھیاں کریندا ہا
پچھلے ویڑھے توں پڑچھتی توں اوں ترے چار لالٹیناں کٹھیاں کیتیاں ‘ پرانڑیاں ایہ لالٹیناں کمرے وچ کتاباں نال اوں رکھیاں ‘ ما اوندی کوْڑیجی ” ایہ کاٹھ کباڑ توں کِتھوں کڈھ آئیں ” ہمسائیاں سنگتیاں سَکیاں دے گھروں اوہ ہَنڈیاں پرانڑیاں لالٹیناں منگ آوے ‘ فریم کوں چمنیاں کوں دھووے چمکاوے ‘ ما اوندی کْوڑیجے تے پیو تانڑیں گالھ ایہا پُج گئی ‘ پیو اونکوں لکڑ دی الماری ہک گِھن ڈتی شیشے پوا ڈتے ‘ الماری بہوں وڈی تے ڈو سو لالٹین پورے ما گئے ‘ الماری وچ ساوے رتے کٹھے گلابی نیلے لالٹین ‘ اوہ وَٹ گھتے تیل پاوے کہیں کہیں ویلے لالٹیناں روشن کر ڈیکھے ‘ لوک اونکوں لالٹیناں آپے ہُنڑ ڈے ونجن ‘ الماری دے اُتے وی لالٹیناں ‘ پیو اونکوں بئی الماری گِھن ڈتی ‘ اوہ شہر دے کباڑیاں تانڑیں ونجے ‘ مقامی انگلینڈ دیاں فرانس دیاں جرمنی لالٹیناں گِھن آوے ‘ سَئہڑ جیڈیاں بطخاں جیڈیاں نِکے نِکے بالیں جیڈیاں لالٹیناں کٹھیاں اوہ کر گھنے ‘ وچوں کوئی لالٹین بھیڈ جیڈی پِچھوں اوندے ٹُر پووے ‘ اوہ جتھوں لنگھے لالٹیناں پِچھوں اوندے وَگ پوون ‘ پیو اونکوں بئی الماری گِھن ڈتی وت بئی الماری گِھن ڈتی ‘ الماریاں کمریاں توں برانڈے تانڑیں ویڑھے تانڑیں آ گیاں ‘ وت اونکوں لالٹیناں رکھنڑ دا ڈا عجب ہک آ گیا ‘ اوہ اَنڑ ڈِٹھیاں جاہیں تے لالٹیناں رکھ گِھنے ‘ جنگلاں دیاں جالیاں , دریاواں دیاں درازاں , پانڑی دیاں پوڑیاں , ہوا دے ہتھ تے بدلاں دیاں باریاں لالٹیناں رکھنڑ دی جاہ ‘ ایہ دنیا اوندے کیتے ہک بتی خانہ بنڑ گئی
ڈو ہزار پندھراں وچ اوہ ہک پرانڑے شہر ساکوں ٹکریا ‘ اونکوں اپنڑیاں بتیاں دے ناں سارے یاد ہَن اوہ کِتھاں کِتھاں لاتھیاں جاہیں ساریاں یاد ہَن تے اِتھاں وی اوہ لالٹیناں گِھنڑ کیتے آیا ہا
( کُنجیاں دا گُچھا )
%d bloggers like this: