” ڈھیر دھمچر نہ پا”|| ذلفی

پاکستان زندہ باد۔۔وت سوال اے حے پاکستان کون حے؟ کوئی ملک حے کوئی خطہ حے، ہیک زمین دا ٹُکڑا حے۔۔ول سوال اے وی حے جو اے خطہ، زمین دا ٹُکڑا یا مُلک کیندا حے، ایندے مالک کون ہن؟ سیاہ و سفید دے مالک۔۔۔!!!

کُجھ مُسلح جتھے ہن۔۔کُجھ مولبی ہن، کجھ بے وطن گُھس بیٹھئے ہن تے کُجھ دلال ٹائپ فیوڈلز تے سرمایہ دار ہن۔۔!!

وت سوال اے پیدا تھیندے جو اے ” سیاہ و سفید ” دے مالک لوک ایں خطے، مُلک یا ٹُکڑے تیں قابض کیوں ہن یا قابض کیوں تھائین؟؟؟

اے بہوں وڈا سوال حے پر ایندا جواب اتنا وڈا کائنی کیوں جو کجھ سوال ہوندے بہوں اہم ہن پر انہاں دے جواب لکھ کے ڈیوݨ ساؤکھا نئیں ہوندا کیوں جو ” قابضین” دی ہیک کامن نفسیات ہوندی حے جو او ” سچ” سُݨݨ دی روایت کوں نیست و نابود کرݨ تیں ہر ویلھے تُلی راہندی حے۔۔!!

جیرھا بندہ سچ کوں ٹُریسی، یا سچ دی روایت کوں ودھیسی یا سچ کولو پردہ چائیسی او فورا ” قابضین” جیرھے ڈاڈھے وی ہوندن اُنہاں دی اکھ اچ آ ویسی۔۔ول اکھ دا کٹر کڈھݨا تاں پوندے ۔۔مسنگ پرسنز، دہشت گردی، جبری گُمشُدگی، کوڑے کیسز، غداری دے الزامات، مُلک دُشمن عناصر، را دے ایجنٹ تے کافر کافر دے بھاری بھرکم الزامات چا کے جیوݨا پوسی ۔۔اے جیوݨ خاک جیوݨ ہوندے بلکہ پل پل دی اذیت ہوندی حے۔۔!!

ہݨ اگلا سوال اے پیدا تھیندے جو اے ” قابضین” کتنا عرصہ ایں ملک دے سیاہ و سفید دے مالک راہسن؟؟؟

ساڈے ہیک پاسوں افغانستان حے، بئی پاسوں انڈیا حے، پچادھوں ایران تے اُبھوں چائنا حے۔۔! ساڈے مالک انہیں ہمسائیں مُلکیں اچوں کیندے یار ہن؟؟؟ تُساں ذرا سوچو تاں پتا لڳے ویسی۔۔افغانستان اچ پاکستان دے مالک ہر قسم دی مداخلت وی کریندن تے اپݨا سامراجی ایجنڈا وی پھیلیندن۔۔! مطلب افغانستان دا کمزور راہوݨ یا اُتھاں جمہوریت دا نہ آؤن پاکستان تے ایندے اصل مالکیں دے شدید مفاد اچ حے تے اے صورتحال اتھاں انہیں دے قبضے کوں مزید پکا کریندی حے، پاکستان اچ راہوݨ آلیں تل وطنیں دی خُلاصی اوہ تک نا ممکن حے جہہ تک ساڈیں گودیں دا کنٹرول افغانستان اچ حے پیا۔۔ایندی ہیک وجہ اے وی حے جو ایں کنٹرول پاروں اے اپݨے وڈے وڈے ٹارگٹ حاصل کریندن تے اپݨے دُشمنیں کوں یعنی ایں مینٹیلٹی آلے تھیسز دے لوک اینٹی تھیسز عناصر کوں رستے اچوں ہٹا ڈیندن۔۔جیویں بے نظیر نال کیتے نیں، جیویں عثمان کاکڑ نال کیتے نیں، جیویں اے این پی دی قیادت نال کیتے نیں۔۔! آکھݨ دا مطلب اے حے جو ڈیپ سٹیٹ دا ہیک اہم ہتھیار افغانستان اچ کمزور حکومت دا قائم راہوݨ ضروری حے تے اے ” وڈے گودے” تل وطنیں کوں ایں ہتھیار نال ڈرائی وی رکھسن، ٹرکائی وی رکھسن تے ماری وی رکھسن۔۔

ڈوجھی پاسوں ساڈے سیاہ و سفید دے مالک قبضہ گیراں دا تعلق چین بادشاہ نال حے۔۔چین دنیا دی ہیک نویں تے بہوں رُکھی سامراجی طاقت بݨ کے سامݨے آئی حے جیرھی اپݨے مفادات دے تحفظ پاروں کہیں وی مُلک دی ایلیٹ رولنگ کلاس کوں ڈھیر سارے پیسے ڈے کے اپݨا ” ٹٹو” بݨا کے کالونیل فلاسفی کوں ترقی دی چمک دمک نال لاگو کر کے تل وطنیں دا شدید استحصال کر کے اپݨی وڈی آبادی دا نہ صرف پیٹ بھریندی حے بلکہ اسلحہ سمیت ماحول دُشمن سرگرمیں کوں پروان چڑھیندی حے۔۔اے دُنیا دا دہہہ ڈیہوں ڈیہنہ مزید موٹا تے تکڑا تھیندا ویندے ۔ ایندے تکڑے تھیوݨ دا مطلب حے جو ساڈی ایلیٹ رولنگ کلاس نہ صرف مزید تکڑی تھیسی بلکہ رویے اچ سفاک تے اینٹی پیپلز وی تھیسی۔۔لہذا سنکیت اے حے جو ” کوئی امید بر نہیں آتی”..

وت بیا سوال اے پیدا تھیندے جو مقامی یا تل وطنی لوک کہے تک اے برداشت کریسن ؟ کوئی آواز وی چیسن یا ایویں مپ مار کے پائے راہسن۔۔؟؟

اجوکی دنیا دی رولنگ کلاس بہوں منظم ، جدید ٹیکنالوجی کولو لیس، بے تحاشا وسائل دی مالک تے چالاک حے۔۔جتھاں وی کوئی تل وطنیں یا مقامی لوکیں دی تحریک اُٹھݨ لگدی حے اے اوکوں کرش کر ڈیندن۔۔! ریاست دے تھمبے ہی عام لوکیں دے سر پاڑ گھتدن۔۔عدالتاں، فوج، میڈیا تے مقننہ سارے عام بندے دے خلاف یا جینوئین تحریک چلاوݨ آلیں دے خلاف ہیکے پیج تیں آ ویندن تے رزلٹ تہاڈے سامݨے حے کیا تھیندے۔۔! ہزارہ، بلوچ، سندھی، پُرامن پشتون تے سرائیکی سارے یا تاں مردے پائین یا وت وسائل کولو بالکل محروم ہن۔۔! ڳالھ اوہا حے جو ” کوئی صورت نظر نہیں آتی "..

وت بیا سوال اے پیدا تھیندے جو ایں حال نال تاں اے ریاست زیادہ عرصہ کیویں قائم رہ سگسی۔؟؟؟

اے بہوں فضول سوال حے ایندا جواب بنگلہ دیش آلیں کوں پتا حے اگر کوئی تہاڈا بنگالی سونہاں ہووے تاں پُچھ گھنائے۔۔!!!

ویسے وی قائم راہوے یا نہ راہوے ایلیٹ رولنگ کلاس دی اے سر دردی حے وی نا۔۔او تاں باہرلی دنیا نال گنڈھی ہوئی حے انہاں دے باہروں وڈے وڈے جزیرے وی ہن شہریت وی حے تے گھر وی ہن پائے۔۔ہا البتہ جتنا مقامی طور تیں ان ریسٹ ہوسی اُتھاں انہاں دا فائدہ تھیسی۔۔!! اے کھیڈ ہی ” ان ریسٹ” دی کھیڈدن تے ایں کاروبار آؤ خوب نفع چائیندن۔۔!!

وت بیا ہیک سوال حے جو آخر ایں صورتحال آؤ نکلݨ دا کوئی تاں حل ہوسی۔۔؟؟؟

اوں شودی آکھیا ہائی ” جیویں ہوویں ویندا اویں نئیں ڈھیر دھمچر نہ پا”..