ڈیرہ کا ٹی ہاٶس||گلزار احمد

ڈیرہ میں ادیبوں اور شاعروں کے لیے کوئی ہال نہیں ہے اس لیے ڈیرہ کے ادیب اپنی بیٹھک کے لیے یونائیٹڈ بک سنٹر میں جمع ہوتے ہیں جو ان ادیبوں شاعروں کے لیے ٹی ہاٶس کا درجہ حاصل کر چکا ہے۔ جب دامان آرٹس کونسل کی تنظیم زندہ تھی تواس کا ایک دفتر بھی تھا جس میں ادیب و شاعر بیٹھا کرتے تھے مگر پھر ہم سب نے ملکر اس کا مَکُو ٹھپ کے رکھ دیا اور تنظیم بھی گئی اور دفتر بھی چلا گیا۔ اب ادب کے متوالے شھر کی گلیوں میں پھرتے رہتے ہیں کہ منجی کتھے ڈھاواں ۔ آج صبح جب میں یونائیٹڈ بک سنٹر پہنچا تو خوشحال ناظر اور ذیشان پہلے سے یہاں موجود تھے۔ لطیف صاحب تیز بخار کے باوجود سنٹر کھول کے بیٹھے تھے کیونکہ ادیبوں کی میزبانی کرتے رہتے ہیں۔ اس کے بعد انجمن ترقی پسند مصنفیں کے صوبائی صدر ثنا اللہ شمیم گنڈہ پور اور تنظیم کے سرپرست اعلی ارشاد حسین شاہ پہنچ گیے۔ پھر عنایت عادل اور ڈاکٹر اخلاق احمد آگیے۔ ممتاز شاعر رحمت اللہ عامر ۔سعد الدین ۔ علمی ادبی اور سماجی شخصیت ریحانہ فردوس ڈومرا ۔ پروفیسر طارق ۔ ابوالمعظم ترابی صاحب بھی آ گیے۔ تو جناب ڈیرہ کے ادیبوں کاخود بخود ایک خوبصورت اکٹھ ہو گیا۔ اس کے بعد اچانک ڈیرہ کی معروف ادبی و علمی شخصیت ایڈیشنل کمشنر ایف بی آر جناب سلطان محمد نواز ناصر صاحب پہنچ گیے اور اپنی گفتگو سے غیر رسمی سی تقریب کو چار چاند لگا دیے۔ انہوں نے ڈیرہ کے ادیبوں شاعروں اور فنکاروں کی خدمات کے حوالے سے بڑی علمی باتیں کیں ۔ وہ خود بہت بڑے شاعر ۔ادیب اور چار کتابوں کے مصنف ہیں۔ ان کی پہلی تصنیف ۔ شھید عشق ۔ کے نام سے ہے۔