مارچ 29, 2024

ڈیلی سویل۔۔ زمیں زاد کی خبر

Daily Swail-Native News Narrative

رفعت عباس نال بیٹھک|| مرتضی زاہد

دانشور احسن واگھا سئیں ناول وچ زبان دے ورتارے بارے گالھ کیتی۔ انہاں آکھیا جو ایں ناول وچوں پتہ لگدے جو دنیا وچ جنگ کوں کیویں روکیا ونج سگدے۔اے ناول انگریز دی استعماری طاقت کوں ناٹک دی جنگ وچ گھن آئے۔
مرتضی زاہد
۔۔۔۔۔۔۔۔۔۔۔۔۔۔۔۔۔۔۔۔
ایں بیٹھک دا اہر سرائیکی لوک سانجھ کیتا۔ اے بیٹھک پاسٹورل انسٹیٹوٹ ملتان اچ منعقد تھئ۔ ایں بیٹھک دا مقصد سئیں رفعت عباس دے ناول "لونڑ دا جیونڑ گھر ” تیں گالھ مہاڑ کرنڑ ہا۔ جیندے وچ دانشور اکرم مرانی سمیت بہوں سارے دانشور تے شاعریں شرکت کیتی۔
گالھ مہاڑ اچ انگریزی زبان تے ادب دے دانشور پروفیسر محمد سعید اختر سئیں آکھیا جو ایں ناول نے سرائیکی نثر کوں نواں اعتبار بخشے۔ ایں ناول کوں پڑھ کے سرشاری تے حیرت دے نال نال میکوں سک تھئ جو کاش اے ناول میں لکھیا ہوندا۔
دانشور تے نقاد مشتاق گاڈی سئیں اپنڑے ہک درگھے مضمون دا کجھ حصہ پڑھیا۔ انہاں آکھیا "لونڑ دا جیونڑ گھر ” دی جیوت کاری ناٹک وہانڑی ہے۔ ایں ناول وچ فینسٹی ریلٹی توں ودھ کر سامنڑے آندی ہے۔ ایں ناول وچ لونڑی مابعد استعماریت کوں نویں وہاروں ڈٹھا گئے۔ جیں وچ لونڑی دے عام جنڑے انگریزیں دے عام جنڑے سونہہ بنڑائ ہے۔
دانشور احسن واگھا سئیں ناول وچ زبان دے ورتارے بارے گالھ کیتی۔ انہاں آکھیا جو ایں ناول وچوں پتہ لگدے جو دنیا وچ جنگ کوں کیویں روکیا ونج سگدے۔اے ناول انگریز دی استعماری طاقت کوں ناٹک دی جنگ وچ گھن آئے۔ اگر قوماں ہروں بھروں لڑنڑاں وی ہے تاں او اپنڑے ہتھیاریں باجھوں کہیں علم دی ڈکھالی وچ لڑ سگدن۔
دانشور محبوب تابش سئیں آکھیا جو سرائیکی وچ ایں ناول تیں بہوں مد تانڑیں گالھ مہاڑ جاری راہسی۔
ناول دی ایں بیٹھک وچ گالھ مہاڑ چار گھنٹے تک جاری رہی تے حاضریں پوری توجہ نال گالھ مہاڑ سنڑدے رہیے۔
آخر تیں سئیں رفعت عباس نے ایں بیٹھک دا اہر کرنڑ تیں سرائیکی لوک سانجھ تیں حاضریں دا شکریہ ادا کیتا تے اے بیٹھک اختتام پذیر تھئ۔
اے وی پڑھو:

%d bloggers like this: