تھل گریٹر کینال تھل کہانی(3)۔۔۔فضل رب لُنڈ

اساں ہک ٹبے تیں پہنچے تاں اتھاں چھیڑو آ جڑی اپنڑی کچاری لائی بیٹھے ھن مارکے نال خیر ست کیتی تیں نال بہہ گئے ہک ڈوجھے کوں جانڑ سنجانڑ کرائی تیں گپ شپ ٹر پئی تھل دا حال احوال چاتا گزر گزران دا پچھیا مارکے بہوں کھل کے حال احوال ڈتا ڈسیا جو نال ساڈی وستی ھے جنیدا ناں وستی چھکن ھے اتیں اے رکھ چھکن دے رقبے وچ ھے

ساڈی وستی دی وڈی گزران ڈھور ڈنگر تیں بھیڈ بکریاں ھن جیرھاں اساں پورا سال ایں رکھ وچ چریندے ھیں بور پیٹر دے پانڑی نال مال منی دا تھوڑا بہوں گھاہ رہا گھندے ھیں تیں اپنڑی گزران جوگی کنڑک وی کاشت کریندے ھیں اساں اپنڑی گزران وچ بہوں خوش ھیں

اساں پچھیا مارکہ تھل وچ نہر آ ندی پئی ھے اوندے بارے کیا خیال ھے نال بیٹھے ہک پکی عمر دے چھیڑو چاچے نورے ٹھڈا ساہ کڈھ کے آ کھس بچڑا اے نہر سئیں موی ساڈے کیتے تاں نہی آندی پئی اساں تاں پہلے ڈھیر سارے ذلیل تھنیدے پائے ہاسے جڈاں رکھیں دی ڈھیر ساری زمین فوجیں کوں الاٹ کر ڈتی ہانے او ہنڑ ساڈے نال جھیڑا تماشہ کریندن ساڈا مال کھلا نہی چرنڑ ڈیندے جیکر اتھاں باقی رقبے تیں نہر آ گئی تاں اساں کڈیں مرسوں ساڈے مال ڈنگر بھیڈاں بکریاں کتھاں چرسن اساں تاں بہوں اوکھے تھی ویسو

انہاں وچوں ہک نوجوان منور وی ہا اونہہ حال ڈتا ساڈی وستی دے کجھ مکان وی نہر وچ آ ندے پئین تیں ساڈے نال اگلی وستی جنیدا ناں وستی تھند ھے پوری دی پوری نہر وچ آ ندی پئی ھے تساں میڈے نال ساڈی وستی جلو اتھاں میں تہاکوں چاہ وی پلویندا تیں باقی لوکیں نال وی تہاڈی میل ملاقات وی کرویندا اساں اوندے نال اوندی وستی لگے گئے اساں اوندے دیرے تیں بہہ گئے او چاہ دا آ کھنڑ گھر لگا گئے وستی دے باقی لوک وی ساکوں ملنڑ آ گئے

جانڑ سنجانڑ تھئی تھل تیں نہر دے بارے گالھیں شروع تھی گیا ایں دوران منور ساڈے کیتے چاہ تیں ابلے انڈے گھن آ یا منور نال مزید گپ شپ تھئی تاں منور ڈسیا میں پڑھدا پئیا کورونا دی وجہ کینے کالج بند ھے ات گالھوں میں ڈینہہ کوں اپنڑا مال رکھ وچ چرا امدا

میں پچھیا کیرھی جماعت وچ پڑھدے ہاؤ انہاں ڈسیا میں منکیرہ کالج وچ ایف اے کریندا پئیا

منور ڈسیا میڈا ہک سوتر ھے او نہر دے بارے ڈھیر جانڑدے اوندی روڈ تیں دوکان ھے اوندے نال ملدے ھیں اساں آ کھے ٹھیک ھے اوکوں ملدے ھیں اساں اوندے کولوں پج گئے اوندے نال حال احوال شروع کیتا

اونہہ ڈسیا جیرھے ساڈے ملکیتی رقبے نہر وچ آ ندے پئین سرکار انہاں دا معاوضہ پنتالی ہزار فی ایکڑ ڈیندی پئی ھے اساں پچھیا ایں ویلھے رقبے فی ایکڑ مارکیٹ ریٹ کیا ھے انہاں ڈسائے مارکیٹ ریٹ فی ایکڑ اڈھائی لکھ کینے ترائے لکھ تک ھے

ول پچھیا لوکیں کوں معاوضہ مل گئے انہاں ڈسائے کجھ لوکیں گھن گھدے تیں ڈھیر ساریں لوکیں اتنا تھوڑا معاوضہ گھنڑ کینے انکار کر ڈتے

دوکان دے نال وستی تھند ھئی جنیدی آ بادی تقریباً ڈاہ کینے پندرہ گھر ھن نہر ایں وستی دی ادھ وچوں گزدی پئی ھئی پوری وستی تھند بیدخل تھنیدی پئ ھئی لیکن نہر دے کہیں کاغذ پتر وچ ایں وستی دا کوئی ذکر کائینا ھا جول انہاں کوں ولدا کتھاں وسایا ویسی پوری وستی وسوں اجانڑ دا کیا معاوضہ ڈتا ویسی لوکیں شودیں کوئی سدھ کائینا ھئی اساں کیڈیں ویسو ساڈا کیا بنڑسی وستی دے لوکیں نال تھل دی وادھوں جانڑکاری کیتے گالھ اگوں ٹوری ہک نوجوان جنیدی لونڑی تیلی دی دوکان ھئی آ کھیا پورے تھل وچ زیر زمین پانڑی چھی کینے ست فٹ تک آ گئے او وی مٹھا اے ول نہر کیرھے مقصد کیتے آ ندی پئی ھے ایں نہر نال تاں تھل دا مقامی بندہ تھل کینے بیدخل تھی ویسی زمیناں ریٹائر فوجی تیں غیر مقامی بندیں کوں الاٹ تھنیدیاں پئین

نہر نال پورا تھل سیم تھی ویسی پورے تھل دا حسن تباہ تھی ویسی

لوک ایں نہر دے حوالے نال بہوں مونجھے ماندے ھن بہوں ڈکھی ھن

مارکے نال حال احوال کرنڑ دے بعد اساں پٹی بلندہ آ لے پاسے روانہ تھئے پٹی بلندہ دے ہک سنگتی سئیں قلب شاہ نال فون تیں رابط کیتا تاں پتہ لگا شاہ صاحب لیہ ہک شادی وچ گئے ودن شاہ جی معذرت کیتی تیں ہک ریٹائر پٹواری دا فون نمبر ڈتا جو اے تہاکوں رکھ بابا ہوندا لال بارے مکمل معلومات ڈیسن

پٹواری صاحب دے فون تیں رابطہ کیتا تاں پٹواری لہور گیا ودا ھا لیکن پٹواری صاحب آ کھیا تساں جو وی پچھنڑے فون تیں پچھ گھنوں میں تہاکوں رکھ بارے سب کجھ ڈسا ڈیندا