تھل گریٹر کینال تھل کہانی(2)۔۔۔فضل رب لُنڈ

اساں باہروں نکھتے تیں ڈہلائی پاسے ٹر پئے فرلانگ ڈو دی واک کیتی بٹ شٹ وی لگدی راہی واپس وساخ تیں پج گئے تیں ساڈے میزبان دی وساخ مہمانیں کینے بھری پئی ھئی لیکن ساڈے بسترے ول وی خالی پئے ھن اساں اکے بستریں تیں لیٹ گئے کھل بٹ وی لگی رہی بسں جیکوں جیویں نندر امدی گئی او سمدا گئے

سویرے ویلھے نال اٹھی کے تیاری کیتی نران پانڑی کرکے اساں اپنڑے میزبان کینے اجازت گھدی تیں رکھ چھکن دو ٹر پئے تیں چھکن آ لیں جانڑو سنگت نال فون تیں رابط کیتا

اساں تھل اندرون دی سڑک گھدی جیرھی جو نواں کوٹ کینے رکھ چھکن وچوں تھنیدی پٹی بلندہ کوں ملنیدی ھئی تھل دا منظر کہیں جادو کینے گھٹ نہیں قدرت دی اپنڑی ہک رنگا رنگی ھے تھل وچ عجب مراقبے آ لی چپ ھے

تھل دا منظر تہاڈی اکھ نہی جھمکنڑ ڈیندا مستقل تہاکوں ہک حیرت دے جہان وچ رکھدے قدرت دی ایں ڈرائنگ تیں بارانی چنڑے دی فصل دی چتر کاری ایں منظر کوں وادھوں سوہنڑا کر ڈیندے ایویں لگدے ریت دے اچے ٹبیں تیں جھکیں وچ ایویں لگدے جیویں کوئی ساوی قالین سٹ گیا ہووے

اندرون تھل وچ پکی رابط سڑک تیں سفر کریندیں تہاکوں اے تجربہ لازمی تھنیدے جو تھل وچ ٹبے کیویں ٹردے رہ ویندن پکی سڑک تیں ویندے ویندے ہک دم منظر تبدیل تھیا ویندے سڑک تیں ریت دا ٹبہ آ ویندے جیرھا 50فٹ تک اچا ہوندے تیں سڑک کوں وی کراس کرگیا ہوندے ایویں لگدے بس پکی سڑک اتھاں ختم تھی گئی ھے لیکن تساں ول جو ٹبہ پھر کے آ ندے ہاو ول منظر تبدیل وت پکی روڈ تیں تھل دا بئیا رنگ

تھل دے اتنے رنگ تیں انگ ھن جیرھے بندے کوں ہک دفعہ گالھا کر ڈیندن

ایویں ہک دم ساڈے سفر دے دوران تھل اپنڑا رنگ بدلے چنڑے دی فصل ختم صاف ٹبے ختم ہک جھر شروع تھی گیا بھیڈاں بکریاں گائیں ڈاچیاں چردیاں نظر آ یاں تیں ہر ٹبے دی چوٹی تیں پنج ست چھیڑو آجڑی اپنڑی کچاری لائی بیٹھے ھن میں سنگت کوں ڈسیا جو رکھ چھکن شروع تھی گئی ھے