فضل رب لُنڈ
۔۔۔۔۔۔۔۔۔۔۔۔۔۔۔۔۔۔۔۔۔
20نومبر 2020دی شام کوں سئیں اسد فاروق تیں میں وستی کیسل کلاسرہ ضلع لیہ تھل جنڈی صضدر کلاسرہ دے گھر پج گئے اے رات اساں صفدر دے گھر گزاری صلاح مشورے بعد اے طئے تھیا سویرے نران کرکے تھل گریٹر کینال دے کمانڈ ایریا وچ آونڑ والے چار وڈی رکھوک کوں ڈٹھا بھالا ونجے اتھاں ونج کے تل وطنی تھلوچڑ آجڑی جٹ نال سانجھ جوڑی ونجے سوجھا محکمہ مال تیں محکمہ جنگلات دے لوکیں نال وی ملاقات کیتی ونجے
اے پیرا کھرا کڈھا ونجے تھل دی رکھوک دی کیویں بھولوں ونڈ کیتی ویندی پئے۔۔ونڑ بوٹے پکھی زناوریں ایں بھولوں ونڈ وچ کیا حال حشر تھیسی
رکھوک دے جنگلات نال کیا کیتا ویسی ایندے کہتے اے طئے تھیا جو اساں اپنڑی ڈیکھ بھال دا پندھ رکھ خیرے آلے کینے شروع کریسوں
سویرے نال اساں کیسل کلاسرہ توں رکھ خیرے الی دو پندھ شروع کیتا اساں اپنڑی پہلا ساہ رکھ خیرے آلی انگودا گوٹ فارم تیں ونج کڈھا جیرھا جو پنجاب حکومت کڈاہیں تھل دی بکری بھید دی نسل ودھاونڑ کیتے بنڑایا ھا
ایں ویلھے جیرھا پورا اجڑ تیں برباد تھی چکا ھا دفتر رہائشی کوارٹر بکریں بھڈیں دے چھپرے اجڑے کھولے ڈینڑ دے جھٹکے ڈیندے ھن
اے کندھیاں جاہیں اپنڑی اجڑنڑ دے نوحے خود پڑھدا کھڑا ھن اساں وی کافی دیر اپنڑی اجڑی وسوں کوں روندے رہے
ول رکھ دے اندروں ٹر پئے
رکھ دے ہک ٹبے ساکوں اپنڑی آم شام وچ گھن گھدا جالیں دے ونڑ ہک خاص پر اسراریت رکھدن جنہاں ساکوں اپنڑے جادو وچ چھک گھدا
ٹبے تیں ونڑیں پتہ نہیں کیا جادو کیتا لگا جال اپنڑا نوحہ کریندی کھڑی ھے کیا میں مقامی ہا یا غیر مقامی کیا میڈا ایں دھرتی تیں وسنڑ دا کوئی حق ھے یا کائینا تھل گریٹر کینال دے کہیں پنے تیں میڈا قصہ وی ھے یا کائینات میڈا کیرھا مل پیسن میڈا کتنا مل پیسنے یا وت میں ایویں مفت اجائی بھٹ تھی ویساں
میڈے نال میڈا وسدا بھرا جنڈا کن تیں ویسی میڈی بھینڑ نمانڑی بیر دا کیا تھیسی
کترنڑ آلی خوشبو دا سودا کہیں سنڈی مار سپرے دی بدبو دے بدلے تھیسی
تھل دیاں تتلیاں کتھ لڈ ویسن انہاں کوں کیتھے ڈیس آباد کریسوں کپ جو خودی ست ہزار ورہیں کینے تھل وسوں دی ہر چھت کوں چھاہ بخشی ھئی ایندی قمیت کیا لیسو
ہر وبا وچ ہرمل شودا دکھدا رہ گئے تھل دی ہرہک سالھ تیں جھنبرے اندر۔۔ جو بال تہاڈے سکھ تیں سوہنڑی صحت نال حیاتی ہنڈاون تھل گریٹر کینال دے کہیں پنے آتیں ایندا مل کیا پیندے پئے ھن۔۔۔ بھکڑا ۔لائی۔سینوار تیں اک دا مل وی لگسی کائینا ؟
ڈاچی شودی کوک ڈتی میں جو ست ہزار ورہیں کینے تھل اپنڑے نال وسدی آندی ہا میڈا وسنڑ مفت آجایا ویسی میڈا لانڑا اجڑ گیا تان میں کیا چرساں یا سرمائے دی ایں کھیڈ وچ ہر حق صرف آدم دا ھے ساڈا جیونڑ اوترا اپنڑی دھرتی جیونڑ دا کوئی حق کائینی
ساڈے حق وچ کوئی سوجھوانڑ عالم فاضل گالھ نہی کرسگدا میں وگ ڈاچیں دے روندے ڈٹھے۔
گاوڑی وی بہوں مونجھی ھئی میڈے چرنڑ دی کوئی جاہ نہ راہسی گم۔گنڈھیل۔دربھ نہ راہسی
بکری بھیڈ دو تر تر ڈیکھ کے آکھے بھینڑ پیاری تھل مکدا پئے جھر مکدا پئے کوئی نہ بچسی سانجھ سہیلی کال کڑچھی کتھاں ویسی تیڈے میڈے چیچڑ کیڑے کون ان چنڑسی۔
تیتر تلور تیں کونجاں آکھے پہلے عربیں ھاب کیتے وے پر ول وی تھل دے جھر وچ لکھ ویندے ہاسے کجھ تھوڑے تان بچ ویندے ہاسے تھل کوں پدھرا کرکے ساکوں ننگا کر کھڑائے وے
ھالی وی تہاڈی بکھ نہی مکی ساڈی بولی ویچ چھوڑیسو تسبیح لولی ویچ چھوڑیسو ۔۔۔۔۔
بالیں جیکر کل کوں اے پچھ گھدا تان تیتر دی بولی کیا ہوندی ھئی کونج کیویں کرلاندی ھئی گیرا کیویں گھوکدا ھا ول کیا ولدا ڈیسو۔۔۔؟؟ ہر شئے مار مکا کے تھل وچ سیم تیں سوما ہوسی زہریں بھریا فصلیں ہوسن تھلوچڑ نال گولنڑ دے وی لبھسی کائینا۔
تھل دا جھر بلا غورکا سیہڑ چوکڑی مار کے آکھیا ساڈے ناں وی درج کراؤ تھل وچ نہر کھٹاونڑ والے ساڈے ڈکھ دا قصہ سنڑن ساکوں وی کجھ جیونڑ ڈیون تھل دی ریخ تیں کھڈینڑ ڈیون
ٹاواں ٹاواں ہرن وی تھل دے جھر وچ لکدا ڈٹھا
گیدڑ یار وی نوک کے کوکیا مائی لومڑی وی مونجھی ھئی گیدڑ نوک کے آہدا ریہا میں تل وطنی میڈے حق دی گالھ کرو کہیں عالم کوں آکھو ہا میں تیں سنسکرت ایں وسوں تیں سینگھے ھیں ساڈے حق وچ کوئی سنسکرت وچوں اکھر۔ شبد لبھے ہاں متاں اساں وی بچ پووں ہا۔۔۔۔
بھاری پیریں ٹبہ چھوڑیا پندھ اگونہاں کیتا
رکھ خیر ألے چھوڑ کے اساں تحصیل چوبارہ دو روانہ تھئے تان صضدر کلاسرہ دا روح ہا تھل جیپ ریلی تھنیدی پئی ھے ایندا چکر لائی جلو ول اساں جیپ ریلی دی مکنڑ آلی جاہ تیں پج گئے اتھاں جیپ ریلی ریلی کینے ہٹ کے ہک انج میلہ لگا کھڑا ہا
جیندے وچ ہوٹل بازار سرائیکی لوک گاونڑیں تیں جھمر لگی کھڑی ھئی تیں جیپ ٹریک کینے ہٹ کینے تل وطنی لوکیں دے کپڑے دے تمبو لگے پئے ھن ریت دے ٹبیں تیں رنگ برنگ کپڑیں دی رنگیں دی ہک بہار ھئی
ڈوجھی پاسوں گھڑ سوار تیں نیزے بازی دے مقابلے ھن لوک وڈی چس رس نال نیزے بازی مقابلہ ڈیہدے کھڑے ھن
اساں وی گھنٹہ دو میلے دے رنگ وچ رنگیج گئے
ول خیال آیا جو اپنڑا پندھ اگونہاں کرو میلے دی عارضی ہوٹل تیں چاہ پیتی
ول اے فیصلہ تھئیا جو آج دی رات تھل نواں کوٹ سنگتی سئیں کمیل مگسی دے ڈیرے تیں گزریندے ھئیں باقی دا سفر اگلے ڈینہہوار شروع کریسوں
اتھاں پنے تان رات تھی چکی ھئی پورے ڈینہہوار دی تھکاوٹ بچ تیں خیرے آلی دی مونجھ ساڈے نال نال ودی ھئی
یار بیلی تازہ دم تھیونڑ کیتے منہ ہتھ دھونڑ پئے گئے تھوڑی دیر بعد رات دی روٹی آگئی چسولی روٹی دے کھاونڑ دے بعد مارکے دی صلاح بنڑی کجھ دیر ٹر پھر گھنوں،
جاری ھے۔
اے وی پڑھو:
حملہ آور یا ایں دھرتی دے پتر۔۔۔ فضل رب لُںڈ
تونسے دا ملک شفیق جعفر یا میر جعفر۔۔۔فضل رب لُنڈ
فضل رب لُنڈ دی چئیرمین پیپلز پارٹی بلاول بھٹو نال ملاقات
سرائیکی صوبہ حقیقت یا میڈا خواب یا ول پنجابی یاری دی لاج؟۔۔۔فضل رب لُنڈ
About The Author
اے وی پڑھو
ملتان کا بازارِ حسن: ایک بھولا بسرا منظر نامہ||سجاد جہانیہ
اسلم انصاری :ہک ہمہ دان عالم تے شاعر||رانا محبوب اختر
موہری سرائیکی تحریک دی کہاݨی…||ڈاکٹر احسن واگھا