لارڈ بُدھے:۔۔۔احسن واگھا

یارو, پڑھنڑ جیرھا ئے, كئی كئی ماہ-و-سال پرائے سوچیئے۔لِكھیئے ئِچ غرق راہونڑ,

وَت آپنڑی ذات دے كھولے ئچ خوش وَسَنڑ, دا كَم ئے۔ ۔ ۔

دَر كھڑكے تاں زال كوں پَٹھ ڈیونڑ, آكھ ڈے كوئے نی بیٹھا ۔ ۔

۔۔۔۔۔

اینویں ئی لكھنڑ دی كھیڈ ئے۔ ۔

پَنئیں دے پَنے جَھریٹ سَٹنڑ, وت اونھیں كوں كَٹ پَھٹ كیتی ركھنڑ, اگو پِچھو كرنڑ, وت سَٹ گھتَنڑ, ہَمجو وساری رَكھنڑ, حتا جو سَہی سَچٔك وِسِر وَنجین ۔ ۔ ۔

وَت كہیں وِچھڑیئے سَجنڑ آلی كار آپنڑیئے لِكھیئے پَنئیں دی مونجھ آوَنڑ,

وَت اونیں كوں گولَنڑ, مَنَاوَنڑ, اونھیں دا مونہہ پٔونج كیں سامھنڑیں میز تیں جوڑ بِلھاوَنڑ, ۔ ۔ ۔

پَنئیں نال اَلاونڑ,

آپ ئچ رٔجھیا رَاہوَنڑ,

بارھو دی كئو كنوں بَھئو كھاوَنڑ,

انٹرویو كیتے میڈیا آلے كالاں كرِن تاں تہاكوں بخار چڑھ ونجے ۔ ۔ ۔

آپنڑیاں كتاباں شیلف وچ پیاں راہوِن, ریكوئسٹاں آنوِن تاں

وی۔پی۔/پارسل كرنڑ دا اہر نہ تھیوے۔

اكثرا لِكھاری, شاعر, راگ۔سٔر آلے لوك آیا ایویں نَہن ہوندے !؟ ! !

آپنڑےآپ ئِچ, آپنڑی كار ئِچ رٔجھیئے لوك ۔ ۔

تیں اے كیجھیں لوك آ گئین !

چار لائناں لكھ كیں, جٔتی چاڑ كیں آڈیئنس گولنڑ ٹٔر پیا۔

تٔوتڑی آوے نہ آوے, دول وَجاوَنڑ شروع ۔ ۔ ۔

میكوں آہدِن توں مردم بیزار ئیں,

كلھا ریہہ ریہہ مَر ویسیں !

آپنڑے نال راہونڑ, كجھ لوكیں كوں ایتلا ائوكھا كیوں ہوندے ! ؟

اے كہیں ہِك سرائیكی أپدیشَك دی گالھ نِمھی چائی بیٹھا,

ایكوں ہك ایشو سمجھ كیں سوچیجیے۔

ہر مہینے كئی گَنڈھڑی كتابیں دی ڈاك راہیں پٔج وئیندی ئے۔

كجھ تاں واكِییی پڑھنڑ لائق ہوندِن۔ عزیز شاہد, اسلم جاوید یا رفعت, اَشو, زٔبیر ۔ ۔ ۔ چھیكڑی فِرعَون لیكَھك دی كتاب كہیں كنوں منگ۔پِن كیں پڑھی ہائی ۔ ۔ ۔ چلو پڑھنڑ لائق تاں ہوندِن,

ایجھیں ایجھیں سرائیكی كتاب وی آن پٔجدی ئے, پیلھے صَفے تیں بندہ مَتھا نَپ باہندے۔

یار, ۂنڑ تاں دل آہدی ئے,

لِكھتاں ٹَھپ, انسانیں كوں سٔنڑوں ہا,

سنگت كے نی, تاں آسپاس۔گوانڈھ دے نِكے نِكے بائیسِز سونڑیجِن بیٹھے,

مِڈل۔وے ہووے تاں اے كم وی كہیں علمی مطالعئے كنوں گَھٹ نئیں ہوندا ۔

تیں اَج جیكوں ڈیكھوں, كتاب چھاپ كیں ٹٔریا ودے۔

اے ایویں ہے جیویں آپ چِٹھی لِكھی, وت جٔتی چاڑھ كیں آپ پَڑھ۔سٔونڑاوَنڑ ٹٔر پیا۔

گوتمے۔بٔدھے كوں وی ایویں خیال آندے ہئین۔ سادھیں كوں سونڑیندا ہا, وت آہدا ہا:

"سبھ نِروان ئے!

سَبھ بھابَھسَم !

میڈا اے سنیہا وی بھا بَھسَم!

بس اے سنیہا وی كہیں كوں نہ ڈیواہے, ڈیو تاں میڈا ناں نہ گِھناہے,

سِبھ نِر وان, سَبھ بھا بَھسَم !”

تیں ساڈے آسیو پاسیو اے كیجھِیں تریہہ پئے گئی ئے, لكھارئیں كوں !

پانڑی پیوِن نہ پیوِن, ألٹی كرنڑ دی تریہہ لاہندی ئی نِینھیں !

اے وی پڑھو: سرائیکی تحریک دی کہاݨی۔۔۔احسن واگھا