کہیں کہیں ویلھے انسان کہیں اینجھی پکڑ اچ ہوندے جیرھا کم کریندے او اُلٹا تھی ویندے۔میڈے نال وی کجھ عرصے کولو ایویں ہی تھیندا پائے سمجھ نئیں آندی جو ایں سارے اُلٹ پلٹ کوں کیندے کھاتے اچ پاواں۔پچھلے چار پنج ڈیہنہ کولو ساڈے نصیب نال کوئی تکڑا رولا مچا ودے۔بھا لڳس کجھ وی نئیں سمجھ پیا آندا جو ایویں تھیندا کیوں پائے۔
ہفتہ کھن پہلے ابے دی طبیعت خراب تھائی حے او آھدے سارا قصور تیڈا حے ، تیڈی وجہ کولو میڈی طبیعت خراب حے میکوں نئیں سمجھ آندی جو میڈا قصور کیوں ہوسی، ایویں ترائے ڈیہنہ پہلے ہیک جاہ تیں ریکارڈنگ کرن گیاں ہیک شاعر دا انٹرویو کرݨا ہا تے ہیک آوی آلے کمبھار دی ریکارڈنگ وی کرݨی ہائی۔
اُتھاں سویل نال ونڃ پُجاں ریکارڈنگ کیتی حے تے شام کوں گھر واپس ولا آندا ہامیں تے رستے اچ سائیکل موٹر پچ تھی پائے، گھیل گھول سائیکل موٹر پنچر دی دُکان تیں گھن گیاں اُنہیں آکھے ٹوپ نویں پوسی اے ختم حے۔
اچھا میں آکھے پاوو۔اُنہیں ٹوپ پاتی حے میں پیسے کڈھن واسطے جیب اچ ہتھ مارے تے جیب خالی ہائی ، ہزار کھن جیب اچ ہا او کتھائیں ڈھائے گیا ہا۔۔آو سائیں میں آکھے چنڳے پھسے ہیں۔۔ہیک ادھ سنگتی دو فون کر کے اتھوں کہیں تراویں جان چُھڑوائی۔
گھر آیاں تے بالیں آکھے بابا ساڈی کزن دی سالگرہ حے ماموں دے گھر ونجݨے ساکوں کیک گھن ڈیوو۔۔ول ہزار روپیہ جیب اچ پاتے کیک آلی دکان تیں گیاں اتھاں کیک دا آرڈر ڈتے وت جیب اچ ہتھ ماراں تاں پیسے کائینی۔۔بس اُتھاں ہرٹ اٹیک تھیندا تھیندا بچے۔اُتھوں کہیں تراویں جان چُھڑوائی حے گھر ول آیاں تے ذال دا اے ٹی ایم چا کے سدھا این آر ایس پی دے اے ٹی ایم مشین تیں لگا گیاں چلو میں آکھے ڈو چار ہزار ودا ہوسی ایکوں کڈھواواں چا تے کوئی گھر دا خرچہ کراں۔اے ٹی ایم جونہی مشین اچ ڈتے ، مشین کارڈ کوں نڳل چھوڑے ۔
فضل کریں خُدا ایہو کجھ آکھ تے لہذا مشین دو تکی کھڑا رہ گیاں ہیک دل آکھے ایں تیتل کوں پتھر نال بھن کے اپݨا کارڈ کڈھ گھناں پر اوڈو مُچھیں آلا ریٹائر فوجی ڈیکھ کے حوصلہ جواب ڈے گئے۔ سیکورٹی گارڈ کوں آکھم چاچامیڈا کارڈ پھس گئے۔اوں ایویں میڈو ڈٹھے جیویں کھاندا ہووے۔۔گھٹے آلی کار تکیندیں تکیندیں فرمائیس میں کیا کراں بینک کُھلسی ول کڈھوا گھنیں۔۔اساں محمود دا منہ بݨا کے گھر ول آئے ہیں۔
سویلے ناؤں وڃے بینک پُڃے تاں ہیک بیا سیکورٹی گارڈ کھڑا ہائی اوں کولو پُچھے جو بینک کائینی کُھلا۔۔اوں آکھے لگدے کہیں دیہات اچوں آیا ودیں۔۔میں اپݨے آپ دو ڈٹھے، اپݨے کپڑیں دو غور فرمائیم تے ڈٹھم چولے دا ہیک بٹݨ ترٹا ودا ہا۔میں تھوڑا جیہاں شرمشار تھیاں ول حوصلہ کر کے پُچھم جو بینک کیرلھے کُھلدے اوں آکھے اڃ تیکوں پتا کائینی پہلی جون کوں پاکستان بھر دے بینک بند ہوندن۔۔میں آکھے اچھا میکوں پتا کائینی ہا جو اج جون دی پہلی حے۔وت گھر ول آیاں تے اتھاں ذال کوں فون کیتم جو بالیں دی مآ حال ایویں حے۔او شودی پریشان تھی ڳئی ۔ اوں اے وی اکھیا کارڈ تاں میڈا حے ہݨ بینک آلے شالا تیکوں ڈیون سہی۔میں وی سو کلو میٹر گھر آؤ پریں ہاں۔میکوں وی اتھوں چھٹی نہ ملسی تے ڈیوٹی اجکل سخت حے کم دا بہوں برڈن حے۔
ساری رات دل اچ خُت خُت جو پتا نئیں بینک آلے کارڈ ڈیسن وی سہی یا نہ ڈیسن۔۔پہلی تریخ آندی حے تاں شودا چھوٹی موٹی نوکری آلا قہر تے پائے ویندے۔بجلی دا بل، کھیر آلے دے پیسے، دکان دا کھاتہ، سبزی آلے دا کھاتہ پتا نئیں کون کون پیسیں دے چھالے اچ ہوندے۔۔۔میں ما فوق الفطرت چیزیں تیں یقین نئیں رکھدا پر اوں رات میں بہوں سوچیا جو اے کیا ہوسی ایویں کیوں تھیندا پائے؟؟؟ صدقہ ڈیواں ؟
ول سوچیم ایہو آپ ہی صدقے تھی پوواں درداں دی ماری جان چُھٹ پوسی۔۔ایویں دماغ چکرا گئے تے میں سدھا اللہ سائیں نال ڈاریکٹ تھی ڳیاں۔۔اینجھے موقعے تیں جیرلھے بیا سݨݨ آلا کوئی نہ ہووے ول مولا ڈاڈھا کم آندے۔۔کتھارسز تھی گیا رات کوں ہاولی ڈاڈھی نندر وی آ گئی۔سویلے بینک گیاں بیلی کارڈ چا آواں۔اُتھاں ڳیاں تے ہالی بینک بند ہا۔۔سجھ دو ڈٹھم تے او چنگا بھلا اُتیں آیا کھڑا ہا ایویں لگدا ہا جیویں دوپہر ہوون، گرمی آو چ بند ہائی۔
ول موبائل تیں ٹائم ڈٹھم تاں ناؤں وجدے پائے ہن۔ بینک دے شیشے آؤ جھاتی پاتی میں تاں فورا ہیک سیکورٹی گارڈ نکلے تے اوں سمجھے میں کوئی مشکوک بندہ ہاں۔ایں کولو پہلے جو او کُجھ آکھے ہا میں اوکوں سنڃاݨ گھدے تے آکھے چاچا میں اوہو دیہاتی ہاں میڈا کارڈ پھس ڳیا ہا بینک کیرلھے کُھلسی۔اوں ٹکا سا جواب ڈتے جو ڈاہ وڃے۔ میں ول گھر دو ول آیاں تے ہݨ دماغ کم کرݨ چھوڑ گیا ہا۔
میں آکھے گھر اچ کوئی نہش شے تاں نئیں لاتھی ول میکوں خیال آئے جو جڈاں میڈی دکان ہوندی ہائی ہیک اُلو میں گھر چا آیا ہامیں۔او اُلو میکوں بہوں بھاندا ہائی۔اوکوں چا کے باہروں بُھکا آیاں تے ایویں دل کوں تھوڑا جیہاں سکون ملیا جو ہݨ مسئلہ حل تھی ویسی۔
خیر ڈاہ وڃے بینک پُڃ گیاں او ہالی بوہاری ودے ڈیندے ہن۔کمپیوٹر آن کریندے پائے ہن تے اندرو ست اٹھ بندے بیٹھے ہن۔میں پہلے بندے کوں آکھیے میڈا کارڈ پھس گئے اوں ہیک ٻائے بندے دو ہتھ نال اشارہ کیتے میں اُتھاں پُڃیاں تے اوں انکوائری شروع کر ڈتی۔ کیرحے بینک دا کارڈ حے؟ کیندا کارڈ حے؟
میں آکھیا جے ایس بینک دا حے تے میڈی ذال دا حے۔اوں آکھیا اساں کارڈ اونر کوں کارڈ ڈیسوں تیکوں نئیں ڈیندے۔اوکوں لحظہ منتاں ترلے کیتے جو سوتر آ میڈی ذال نوکری کریندی حے او علی پور ہوندی حے نئیں آ سگدی مہربانی کر کارڈ ڈے چا۔ اوں آکھیے میں نئیں ڈے سگدا بھاویں توں جو وی کریں۔
آھدے میں کارڈ کوں اپݨے ہیڈ آفس بھجیساں اُتھوں ولا او مطلوبہ بینک بھجیسن تے تُساں ول جے ایس بینک ویسو تہاکوں کارڈ مل ویسی۔ وائے میں آکھے اللہ دا بندہ ایں کم کوں ہفتہ کھن لگ ویسی کارڈ ڈے چا میڈے مسئلے بہوں گھمبیر ہن پر او انسان گھٹ تے روبوٹ زیادہ لگدا ہا آھدے میں نئیں ڈے سگدا۔ میں آکھے اے ڈاڈھی گالھ حے، کارڈ وی ساڈا حے پیسے وی ساڈے ہن ، مشین تہاڈی چِھتی تھائی کھڑی ہائی اوں کارڈ چٻ چھوڑے، قصور تہاڈی مشین دا حے اساں بے گُناہ کیوں دپھیندے پائے ہیں؟؟؟
اوں جوان دے پُتر وت وی احساس نئیں کیتا چُپ کیتی بیٹھا رہ گئے۔ میں آکھیے میں تہاڈی اونر نال گالھ کرا ڈینداں تساں کارڈ ڈے ڈیوو انہاں آکھیا ساکوں کیا پتے او اونر حے یا کائینا۔۔ہر تہاڈی آکھیا ہائی سرو بندیں دا اعتبار کوئی نئیں کریندا۔ اساں چٹی ڈاڑھی نال کوڑ مریندے بیٹھے ہوسوں۔ خیر آدھا گھنٹہ بحث تھیندی رہ گئی اساں ٹھڈے ساہ وہ کڈھے ول وی اُنھاں کوں ترس نئیں آیا۔ ول میکوں پتا لگا جو کیپٹلزم کیا ہوندے۔ اساں لحظہ احتجاج کیتا ول فورا احساس تھیا جو انہاں کولو ریٹائر فوجی سیکورٹی گارڈ ہوندن۔انہیں دے دماک دا ساکوں پہلے کولو اندازہ ہائی پیا تے اساں تھوڑی باڑی عزت کھیسے اچ گھت کے گھر ول آئے ہیں تے ھݨ کھیسے خالی ہن عزت مونڈھے تیں لڈی کھڑے ہیں۔ڈیکھو ہݨ مونڈھے کہے تک تڈ چایندن۔۔
یہ بھی پڑھیے
”””عشق ٻاجھوں جیوݨ کوڑ کہاݨی “ (وسیب یاترا :17)||سعید خاور
”خیرپور تے ہیرا منڈی لہور دا سانگا“(وسیب یاترا :16)||سعید خاور
[سرائیکی تحریک سانگے سئیں عامر حسینی دی ہک پوسٹ دا ولدا|| مشتاق گاڈی