قید چنگی یا آزادی؟۔۔۔ مالک اُشتر

انوی سو سنتالی دی پارٹیشن دے بعد آہستہ آہستہ پنجاب پاکستان بنڑدا گئے تے پاکستان پنجاب وچ ضم تھیندا گئے۔تاریخ دی عجب گالھ ہے جو پورا ملک ہک صوبے وچ گھٹیج گئے تے ہک صوبہ پورے ملک تے پھیل گئے۔

( ایں گالھ دا اندازہ مولانا عبدالکلام آزاد،باچا خان، غوث بخش بزنجو، صمد خان اچکزئی، نواب خیر بخش مری،جی ایم سید تےپلیجو سئیں جھئیں سیاسی سوجھوانیں تےقوم پرستیں کوں پہلے دا تھی چکیا ہا)۔

ستاوی رمضان دی بابرکت رات کوں مملکت خداداد دی وجودیت دے اسمانی احکامات تا قیامت جاری رہون واسطے نازل تھئے لیکن تھوڑے عرصے بعد ادھا ملک چٹ تھی گیا۔

بنگال دی جدائی دا صدمہ نہ سہہ سگدے پئے ہن تہوں توپیں دا رخ مکمل طور تے بلوچستان، سندھ تے سرائیکی وسیب دو تھی گیا۔

پنجاب دی توسیع پسندی وچ جتھاں گوادر، چاغی، سوئی،تھر، پشاور تے فاٹا روحانی طور تے زد وچ آگئین اتھاں قلعہ ڈراوڑ،چولستان، روجھان،ماڑی، فورٹ منرو،بارتھی،ڈھوڈک تے رمک جسمانی قید توں کیویں بچ سگدے ہن۔

جتھوں دی بولی،کلچر،ورتارے،گانون، شاعری،سیاسی سماجی سٹرکچر دا پنجاب نال دور دور دا وی واسطہ نئیں۔او پورا خطہ جسمانی روحانی طور تے اوندی قید وچ ہے۔

زمیناں،رقبے،فصلاں، پھل،جنگلات، دریا،پہاڑ،ریگستان، معدنیات تے تمام وسائل تے اوں دہ دا قبضہ ہے۔

اتھوں جان چھڑانون کیتے ول کہیں مقامی اساطیر وچوں نویں دور دے تقاضیں دے مطابق اپنا قصہ جوڑنا پوسی۔

اے سائینسی تے جمہوری سیاست دا زمانہ ہے،ایں قید دی رہائی کیتے چابی جمہوریت دی صندوق وچ لاتھی ہے۔گلگت بلتستان،کے پی تے فاٹا والیں اے چابی گول گھدی ہے،سندھ کول چابی ہتھیانون دی ہر ویلھے کوشش کیتی ویندی ہے پر او چنگا بھڑدا پئے۔

بلوچستان دا مسئلہ ساڈے کنوں کجھ مختلف ہے ۔ہک سرائیکی ہن جیرھے ایں چابی کنوں محروم ہن۔

بہوں عرصے توں چابی بنڑاون دی کوشش تھیندی پئی اے لیکن حالی صرف کاغذ تے بنڑی ہے،جڈاں لوہے دی چابی بنڑا گھنسن تالا کھل ویسی۔

لوہے دی چابی جمہوری ووٹاں نال بن سگدی ہے۔سیاسی شعور نال بن سگدی اے ۔تے پارلیمنٹ دے منتخب ممبران دی مدد نال بن سگدی اے ۔
قید چنگی یا آزادی؟ اے ہر کوئی سوچ سگدے!!!!!

ویب ڈیسک

See author's posts