"سائیں دا مونہہ حے” ۔۔۔زلفی

کل میں تونسے استاد فدا حسین گاڈی دی کتاب سنجاݨ دی گھنڈ کھلائی آلی تقریب اچ گیا ودا ہامیں تے میکوں ٻہوں مزے دار قسم دے تجربے تھائین۔بہوں ساریں مہان دوستیں نال ملیاں سرائیکی وسوں دے وڈے وڈے بندے آئے ودے ہن۔۔میڈے ذہن اچ بہوں سارے سوال ہن تے انھاں سوالاں کوں میں اپنی سمجھ بوجھ نال حل کرن دی کوشد وی کیتی حے تے بہوں ساریں لوکیں دے ایں تحریک دے حوالے نال کردار تے سرائیکی سنجان دے پندھ کوں سمجھݨ دا آھر وی کیتی۔۔میں ایں تجربے کوں انہاں لوکاں دے شخصی خاکیں سمیت بہوں سارے نویں انگ رنگ نال ” سائیں دا مونہہ حے” دے عنوان نال لکھت لکھدا پیاں جیندا پہلا حصہ ڈیلی سویل تیں چھپ ڳئے تے اگاں وی ایکوں ٹوری رکھسوں۔۔دوستیں کوں ارداس حے جو اپنی رائے وی ڈیسن تے انہاں لکھتاں کوں پڑھسن۔۔

پہلا حصہ
شاکا ڳاڈی ہیک وکھرا کردار حے ساڈی وسوں دا، میکوں جڈاں ملے ہیک نویں رنگ روپ اچ ملے، ایکوں سمجھݨ یا ایندے بارے کوئی حقیقت دے قریب ترین رائے قائم کرݨ لڳ بھڳ ناممکن حے۔
پوری سرائیکی وسوں اچ جتنا متنازعہ کردار اے حے شئئت کوئی کائینی۔میکوں اے وی لڳدے ایکوں شئیت جاݨ بجھ کے متنازعہ بنایا ویندا پائے (اے اگوں جل کے حال ڈیساں جو اےمتنازعہ کیوں حے) میں وی ٻہوں ساری سنگت نال ملدا رہ وینداں تے میڈے ٻہوں سارے سنگتی شاکے دی وی یار ہن پر اڃ تک کوئی وی سنگتی ایندے تل تک نئیں پجا تے ہر سنگتی تے سرائیکی تحریک دے اگواݨ ایکوں وکھرے وکھرے انداز اچ ایکسپلین کریندن۔
کوئی ایندے اتیں کاوڑ کیتی ودا ہوسی تے کوئی ایکوں مہان دیوتا ٹائپ چیز سمجھی ودا ہوسی، کوئی ایندے نال توقع دے پہاڑ کھڑے کیتی ودا ہوسی تے کہیں کوں ایندے کولو ککھ دی امید کائینا ہوسی۔
اے وت او نا مراد حے جو کجھ نہ کجھ اینجھا اپݨی ڳنڈھ ٻدھی ودا ہوسی جیندا ادراک کرݨ سانگے وی ہیک ٻہوں وڈا پس منظر ہوسی۔

اے جتنا گپت کار حے اتنا وڈا چتر کار وی حے، کڈاہیں کڈاہیں میکوں تاں لڳدے جو اے شدید قسم دا سرائیکی بھگت حے جیندے اندروں کمیناں کمیناں خواہشاں ہن، مدھر مدھر خیال ہن، اݨ چتاں چتاوݨیاں ہن، جرات بھریاں جلالیاں ہن تے بیمان قسم دیاں بجھارتاں ہن۔ایں کولو ڈر وی ٻہوں لڳدے تے اے بھاندا وی ٻہوں حے، ایکوں ملݨ واسطے دل وی ڈاڈھا آھدے تے ایں کولو بھڃ ونجݨ دی خواہش وی ٻہوں تکڑی ہوندی حے پر ہیک گالھ بہوں نشابر حے جو اے کہیں دا اینجھا متر کائینی جیکوں اپݨے من وچ اتار کے جذباتی قسم دا ڳانڈھا ڳنڈھیا ونجیجے۔
ایویں کل دی ڳالھ حے جو اے استاد فدا حسین گاڈی دی لکھتیں دے حوالے نال ہیک کتاب ” سرائیکی سنڃاݨ "دی گھنڈ کھلوائی دی تقریب تونسے شریف اچ ستری کھڑا ہا۔
میڈی ہٹی دی عجیب روٹین حے جو میکوں سرو واندا نئیں تھیوݨ ڈیندی پر ایں پروگرام دا سݨ کے میں بڑا اتاؤلا ہامیں تے سویل سویل نال ہٹی بند کر کے میں سائیکل موٹر تیں تونسے دو روانہ تھی پیاں۔پالا وی ہا تے ٹھڈی ہوا وی گھلی کھڑی ہائی پر دل وچ اینجھی چھک ہائی جو نہ پالے دی پرواہ تھائی حے نہ ہوا دا ڈر لڳے بس اساں ویلٹیج کے پورے دے پورے وقت کولو ٻہوں پہلے پروگرام آلی جاہ تیں ونڃ پجوسے۔
سنگھڑ دی مݨ تیں رومان شادی ہال اچ اے پروگرام ہائی تے میں جیرلھے بڃیاں اوں ویلھے اتھاں کتے بھونکدے پائے ہن۔اساں سنگھڑ تے تل اچ ونڃ بیٹھے تے وقت ٹپاوݨ سانڳے ریت دے گھر بݨا بنا ونڃیندے رہ ڳیوسے۔آخر تھک کے اساں سب کولو پہلے خالی ہال اچ ونڃ بٹھوسے ایویں تھوڑی دیر گزری تے ڈو چار ٻئے بندے وی آ ڳئے پر ساڈا سونہاں کوئی کائینا ہا۔ایویں ہیک دفعہ جاݨی سنڃاݨی آواز کنیں اچ پائی تاں سامݨے شاکا کھڑا ہا۔

ایکوں ڈیکھ کے میں وت کنفیوز تھی ڳیاں جو اے اتنا وقتی کلھے دا کلھا کیوں پڃ ڳیا ہوسی تے ول ایندے نال دعا سلام وی کرݨی پوسی۔میڈی ہیک عجیب جہیں کیفیت…. اچھا الویساں تے کیا الویساں، پچھساں تے کیا پچھساں…. خیر میں ونڃ کے سلام کیتا تے ایں وی میکوں سلام دا ولدا ڈتا ہلکی جہیں کھل تے ہلکا جیہاں اپݨا پن وت ایں میڈا ہتھ چا پکڑا تے سدھا ٻاہرو گھدی ڳیا تے میکوں اپݨی گڈی اچوں استاد دی کتاب چا تے ڈے ڈتس۔سمبھلݨ دا موقع ہی نہ ڈتس ، بھلا کوئی اتنا ظالم وی ہوندے!!
میں تاں سدھی ڳالھ حے ایویں کھیرو کھانڈ تھیا ڳیاں میکوں سمجھ وی نئیں آئی جو ڈوچار رسمی ڳالہیں دے علاوہ ایندے نال کیا الاواں۔
میکوں اپݨے اندرو احساس تھیا جو ایں ویلھے کہیں تراویں ایں کولو پٹوا ونڃاں تے میں ایویں ہی کیتا۔میں فورا سگریٹ کڈھی تے کنفیوزڈ انداز اچ ایندے کولو بھا دی دٻلی منگی تے سڳریٹ بکھا گھدی۔
تھوڑی دیر بعد ڈو چار ٻئے نو جوان وی آن پڃے تے انہیں اچو ہیک شفقت بزدار دا پتر سرمد وی ہائی۔ انہاں کوں ڈیکھ کے میڈی جان اچ جان آئی تے شاکے دی توجہ انہیں دو ونڈیڃ ڳئی۔انہیں پچھیا بینر کتھاں لاؤں تے کیویں لاؤں۔شاکے انہاں کوں کوئی واضح صلاح نہ ڈتی بس ایویں ڈو چار آپشن ڈے ڈتن سی۔وت میڈے کن کیرھے تھائے جو اے کیرھا رویہ حے حالانکہ ایکوں پتا وی حے جو کتھاں بینر لاوݨے ول وی اے چھوہریں تیں سٹ کے اپݨے آپ کوں پورے قضئے اچوں اٹے اچ وال آلی کار کڈھ کے ہیک پاسے تھی ڳئے۔
ایں دوران میں تھوڑا جیہاں بھاری بھار محسوس کیتے تے فورا شاکے کولو پچھم جو ٻیا وی کوئی آیا ودے حالانکہ اے ٻہوں ہی لا تعلق جیہاں سوال ہائی۔شاکا تاں نا مراد حے آھدے ہا آئے ودن پر پڑ تیں ٻہوݨ واسطے تکھیں کوئی نہ آسی او ٻیٹھے ہوسن کتھائیں ڳپاں شپاں لائی۔
میں دل اچ آکھے اتھ کھڑ۔–

وت میں ایویں خواہ مخواہ ڳالھ کوں اگاں ٹورݨ واسطے پچھیا جو ایویں کیوں حے اساں سرائیکیں نال جو اساں کہیں سیریس کم کوں بالکل سیریس نسے گھندے۔شاکے ولدا ڈتا جو اے وی ساڈا کلچر حے۔ڳالھ شروع تھیوݨ کولو پہلے مک ستی۔اساں وت بھجݨ دی سوچی ۔ایں دوران ڈو چار سڳریٹ مزید پھوک کے اساں اپݨے آپ کوں کٹھا کیتا تے کیا ڈیہدے ہیں جو فضل رب لنڈ تے صفدر کلاسرہ وی آ وڑن۔
انہاں کوں ڈیکھ کے میڈی جان اچ جان آئی تے میں فضل تے کلاسرے کوں ملیاں دعا سلام کیتم تے فضل میڈے ڈو چار کھل دے ٹھکارے کڈھوا چھوڑے تے ہیک لقمہ وی عطا کیتس جو توں ہٹی بند کر کے آ ڳئیں بس ہݨ نسے اڑدے۔اساں پھکی کھل کھلے ۔ اتو شاکے میڈو ڈیکھ کے آکھیا ہݨ توں قابو ہائیں۔میں وی آکھے ہا قابو ہاں تے کھل دا ٹھکارا مار چھوڑیم۔اے کھل وی ٻہوں وڈا ہتھیار حے یار۔
ول ہولیں ہولیں بئے دوست وی کٹھے تھیوݨ پائے ڳئے، پراݨی شاگرد سانجھ دے سنڳتی میڈے سونہے اݨ سونہے آندے ڳئے تے دعا سلام تھیندی ڳئی۔
ولدیں پھردیں میں صفدر کوں ولھیٹݨ دی کوشد کیتی پر اوں میکوں ولھیٹ ڈتا۔ صفدر جتنا چپ چپاتا تے فقیر لڳدے اتنا حے کائینا۔ایویں لڳسی ساریں دا یار حے ،ایکوں کہیں سیاسی اٹکل دی چس دی سمجھ کائینی پر ایویں حے کائینا۔ایویں فضل رب کوں ملو تے لڳسی اے ٻہوں تکھا بندہ حے کوئی نہ کوئی سٹ مار چھوڑیسی پر اے گالھ وی سچ کائینی۔

خیر ایویں گپ شپ تھیوݨ لگ پائی تے ہال بھریجݨ لڳ پیا میں صفدر کولو پچھیا جو ابھے دیرے وچوں وی کوئی آیا ودے اوں آکھیا ہا امیر زادہ آیا ودے تے مظہر تابش دی وی ڈس حے۔میں آکھیا اچھا دیرے آلے تے سرائیکی لوک پارٹی آلیں دوستیں تیں بالعموم تے شاکے تے واگھے تیں بالخصوص صوبے آلے موقف تیں نراض ہن ۔ او وت کیویں آئے ودن؟ ایں شریف آدمی فورا جواب ڈتا جو انہاں کوں اشو سمجھائے جو پوری میہاڳ کواہوݨ کولو بہتر حے جو ہیک کٹے کوں قربان کر چھوڑیجے۔میں پچھے انہاں اے گالھ من گھدی؟؟ صفدر آکھیا جی ہا انہاں کوں سمجھ آ گئی ہوسی۔ایں ادھورے تے معنی خیز جملے دے بعد میں ول ایڈیں اوڈیں تھی ڳیاں۔
وت ایں میل اچ تریہہ چالہیہ بندہ ٻیا وی آ ڳیا جیندے اچ ڈاکٹر احسن واگھا وی شامل ہا۔
ڈاکٹر صاحب کوں اساں ملیے تے ایویں تھوڑی جہیں گالھ بات تھائی ۔ڈاکٹر صاحب میکوں ڈیکھ کے فورا آھدن میں تیکوں ایویں شادن لنڈ دے ہیٹھو آلے ٻیٹ تے کچھی دے اتو آلے پاسے دا بندہ سمجھی وداں تیڈا گھر متاں اتھائیں کتھائیں حے۔ڳالھ کوں میں وی سمجھ ڳیاں تے میں آکھیا جی ہا تساں ٹھیک آھدے پائے ہاؤ۔
واگھا صاحب دے بارے مشہور حے جو اے کہیں کوں سدھی ڳالھ نئیں ڈسیندا تے زیادہ تر لوکیں کوں اکا گھاہ نئیں سٹیندا۔پتا نئیں اے ڳالھ سچ حے یا کوڑ اے اللہ بہتر جاݨ دے۔
اساں ایویں تھوڑی جہیں وقفے بعد ہال آلے پاسے ول ایوسے تے ٻہوں سارے ٻئے سنڳتی وی مل پائے۔کوٹ ادو اچو ، چوٻارے اچو، لیے اچو، راجن پور آلے پاسو ٻہوں سارے سرائیکی اگواݨ اتھاں ان پجے۔
مختلف لوکیں نال گپ شپ تھائی تاں میکوں ایویں لڳن لگا جیویں سارے ہیک ڈوجھے کولو مایوس تے بد گمان ہوون۔
ٻیا حال وت اڳلے حصے اچ۔

ویب ڈیسک

See author's posts