زلفی دی ہٹی(قسط6)۔۔۔ ذوالفقار علی

کاروبار دا فیصلہ تھی ڳیا تے ساڈے دل اچ ہیک نویں امنگ ترنگ جاڳ پئی۔اویں تاں میں زندگی اچ ڈھیر سارے کم کیتن پر اے کم ایویں لگدا پیا ہا جیویں جو زندگی دی کایا پلٹ ڈیسی۔
چنگے مستقبل دا احساس ہی تہاکوں ہیک ان سونہی طاقت کولو لبا لب کر ڈیندے۔ اے بہوں ہی ظالم قسم دا احساس ہوندے جو بندہ اپݨے جوگا تھی ویسی کہیں دی متہاجی نہ راہسی ۔جتھاں ہر چیز مل دی ہووے اتھاں تہاڈی آزادی دی وی ہیک قیمت ہوندی حے خاص کر اݨ پھر بندہ شودا ایں آزادی پاروں ٻہوں زیادہ قیمت ادا کریندے۔
اساں ہیک جگ پھرندڑ یار بنی خان کوں آکھیا ساڈے کٹھے کراچی جل اساں تاں کراچی کوں جاݨ دے نسے۔تے نال نال کراچی اچ راہوݨ آلیں کجھ دوستیں نال وی رابطہ کیتا۔ ہیک میڈا فیس بک دا دوست جیکوں میں کڈاہیں ملیا وی کائینا ہم جیندا ناں مظہر ہائی اوندو فون کیتا تے اوں آکھیا ا ونجو سائیں تے ہیک ڈوجھے سنگتی نال وی حفظ ما تقدم دے طور نال رابطہ کروایا جیکوں میں جاݨدا نہ ہم او میڈے ہیک دوست دا دوست ہا جیندا ناں نصراللہ ہائی۔
اساں بس دی ٹکٹ کرائی بنی تے میں کراچی روانہ تھی پیوسے۔بنی ہیک واہمی تے تھوڑا جیہاں سر پھرا بندہ حے جیندی زندگی اچ ڈو ڈر بہوں گہرے ہن۔ہیک او سمجھنیدے جو اوندی موت دل دا دورہ تھیوݨ نال تھیسی تے ڈوجھا او آھدے اگر دل دا دورہ نہ تھیا تے میں روڈ ایکسیڈنٹ اچ مر ویساں۔ایں ڈر دی کیفیت اچ اساں سفر کیتا تے اساں ٻارہ گھنٹے دے سفر بعد کراچی ونڃ پڃے۔
کراچی میڈے واسطے ہیک نویں دنیا ہائی۔ کراچی بارے جیرھا میڈا تصور ہائی اوندے اچ ایم کیو ایم، تشدد، گندگی، چوری ڈکیٹی تے بے ہنگم ٹریفک ایندے نال نال سمندر کوں ڈیکھن دی وی چاہ ہائی کیوں جو آھدن انسانی تہذیب کوں ودھاوݨ تے اڳاں ٹورݨ واسطے سمندریں دا ٻہوں اہم کردار رہ ڳئے۔
کتھائیں میں پڑھا ہائی جو سمندر دا کنارہ تے اماں دا پیٹ ہیکو جہیں ہوندن تے اگر ڈھلدے سجھ ویلھے ننگے پیریں سمندر دی کندھی کھڑ کے سجھ دیوتا کوں ڈیکھو کھڑے تے تہاڈے اندر دے ڈکھ دھویج ویندن۔ تساں بالکل ہاولے پھل تھی ویندے ہاؤ۔
ایں تصور اچ جڈاں میں کراچی پجیا تے پہلے پہلے جیرھی شے میں ڈٹھی او ٻہوں ہی عجیب ہائی۔
کراچی دے آس پاس میں جنگلی کبوتریں دے غول دے غول ڈٹھے جیرھے سڑکیں تیں بے نیاز چگدے وڈے ہن۔ول میڈا اے یقین مزید پکا تھیا جو ایں دھرتی تیں اڃاں وی صوفیا کرام دا اثر باقی حے کیوں جو کبوتر تے صوفی دا صدیں پرانا تعلق حے ایں تعلق دیاں رمزاں صوفی جاݨدے ہوسن۔
اساں کراچی کتھے تاں ساکوں اے پتا کاینا ہووے جو اساں کتھاں ونڃڑے۔ ساڈے کراچی آلے ڈوہیں سنگتی اپنی اپنی گزران دو ڳئے ودے ہن تے بنی تے میں شیر شاہ مارکیٹ دی گول شروع کر ڈتی۔ پچھدیں گچھدیں ویندیں وگدیں اساں شیر شاہ دے نیڑے پڃ ڳیوسے پر جتھاں کنٹینر لاہندن تے باہر دے نال دی ٻولی تھیندی حے او جاہ نہ لبھے۔ اساں اوں ڈہیہں کوئی ترائے گھنٹے ٹردے ریہیے تے ول کتھائیں ونڃ کے اساں شیر شاہ دی اوں جاہ تیں پجے جتھاں باہر دے مال دی ٻولی تھیندی حے۔ اساں ہیک لمبی جہیں لسٹ جیب اچو کڈھی تے ہیک پٹھان کوں ڈے ڈتی تے اوکوں آکھیا پٹھان وائے پٹھان ایں لسٹ کوں پڑھ تے ساکوں ڈس اے سارا سمان کتھوں ملسی۔او ساڈے منہ دو ڈیکھے تے اساں اوندے منہ دو ۔ایں حیرانی دے عالم اچ ول ساکوں پتا لڳا جو پٹھاݨ کوں پرچی پڑھݨ دا ڈا وی نہ آندا ہا۔ اے پٹھاݨ وی کوئی عجیب مٹی دے بݨے ہوئے ہن۔اے اکثر چٹے اݨ پڑھ ہوندن پر کروڑاں دا بزنس سنبھالی پائے ہوندن تے خوب سمبھلیندن۔
ول ساڈے یار بنی اوکوں پرچی تیں لکھیاں چیزاں ڈسیاں تے آکھیا خان صاحب اے کتھوں ملسن۔خان صاحب کوں پتا لڳ گیا جو اساں نویں آئے ہیں او ساکوں ڈیکھ کے کھل پیا تے آکھس ہالی اڳاں ونجو میکوں تہاڈے مسئلے دی سمجھ ای نئیں آندی پائی۔
اساں وت اگاں ٹر پیوسے تے اگوں حیرت دا جہان ملیا۔وڈے وڈے کنٹینر ، ہیک ہیک ایکڑ دے گودام تے انھاں گوداماں اچ وڈیاں وڈیاں سمان نال بھریاں ہوئیاں لاٹاں۔ شیر شاہ دا اے بازار بہوں وڈا یونیک تے کمال دا بازار حے۔بجلی دے سمان دیاں لاٹاں، مکس سمان دیاں لاٹاں، جتی کپڑا، جیولری، لنڈا، کراکری، کاسمیٹکس ، لکڑ دا سامان الغرض اتھاں سب کجھ وڈے گودامیں اچ بھریا لاتھے۔
بنی تے میں اے سب کجھ ڈیکھ کے حیران تے پریشان جو کیا گھنوں تے کیا نہ گھنوں۔ایں کشمکش اچ اساں پاگلیں آلی کار ایڈو پھروں اوڈوں پھروں ساکوں کجھ سمجھ نہ آوے جو کروں تے کیا کروں؟
کیوں جو ایں مارکیٹ اچ سمان لاٹ اچ ہوندے تے اوندے ارد گرد پلاسٹک ویڑھی ہوئی ہوندی حے تساں اندر ڈیکھ نیوھے سگدے جو حے کیا۔ ٻس تہاکوں اپنی قسمت تیں بھروسہ کر کے بولی ڈیونی پوندی حے جو اے لاٹ تول ڈیوو اگوں تہاڈی قسمت جو پیا نکلے۔اساں ایں کنفیوژن اچ ودے ہاسے تے ساڈا فیس بک فرینڈ اظہر ساکوں گولیندا گولیندا اتھائیں آ ڳیا۔
اظہر تیلی مار نو جوان حے اتھاں نیوی اچ چھوٹی جہیں جاب کریندے۔ ایں نو جوان دی کہانی بہوں دلچسپ حے او ول اڳلی قسط اچ۔۔

زلفی دی ہٹی(قسط5)۔۔۔ ذوالفقار علی

زلفی دی ہٹی (قسط1)۔۔۔ذوالفقاعلی

جاری ہے ۔۔۔۔۔

ویب ڈیسک

See author's posts