فیمینسٹ!!!۔۔۔۔۔|| ذلفی

حویلی وڈی ساری ھے، ادھ اچ ہیک گھاٹی ٻٹ ٻیر ھے تے موسم اسوں کتیں دا ھے، ڈیہنہ کوں چنگی بھلی دُھُپ تے رات کوں پالڑا ہوندے۔ ڈوپہریں دا ویلھا ھے تے ٻیر دی چھاں چسولی پائی لگدی ھے۔ ٻیر دے وݨ اچ ترائے چار کھٹڑے پائے ہن تے گھر اچ نِکے ٻال کھیڈدے ودن جوان گھروں باہر لگے گئین تے گھر اچ صرف ڈو زنانیاں بیٹھیاں ہن۔

ہیک دی عمر چالہی دے پیٹے اچ ھے تے ہیک تریہہ دے پاند کوں پکڑی ودی ہوسی۔ ڈوہیں دمان دی کہیں وستی اچ بیٹھاں ہن۔ پکی عمر دی تریمت دا چہرا مُہرا شانت ڈسدے تے اوندی اکھیں اچ پیار تے دِھرتا دی ڈِکھ ھے۔

تے تریہی دے پیٹے آلی تریمت دے چہرے تیں شانتی ناں دی کوئی چیز کائینی اوندے اکھیں اچ غُصہ تے کاوڑ وٹیندی کھڑی ھے۔

پکی عمر دی تریمت جیندا ناں سُگھڑ مائی ھے تے تریہی سال دی عمر آلی تریمت دا ناں صوبیہ ھے جیکوں پیار کولو ڈولی سڈیندن۔ ڈوہیں آپو ہاݨے کھٹڑے تیں کچہری لائی بیٹھیاں ہن تے ہیک ڈوجھے نال ککھ کالے کیتی پائین۔

ڈولی۔ اڑی سُگھڑی مریں تیڈا سِر چِٹا تھی گئے ، والیں تیں کوئی خِذاب شِذاب لایا چا کر ۔۔

سُگھڑ۔ نہ خِذاب میکوں نئیں بھاندا ، میکوں گندی بو آندی ھے۔ میڈا جوان کیا آکھسی جو ایں عمر اچ میندیاں ودی لایندی ھے۔

ڈولی۔ تیکوں اپݨی فِکِر کائینی اپݨے جوان دی ڈھیر فِکِر ھے۔

سُگھڑ۔ وال کالے کرݨ نال میڈی ذات کوں کیا فرق پووݨے، میں تاں جیندے نانویں لڳی ہاں او خوش ھے تاں میکوں کِہیں فکر۔۔

ڈولی۔ تیڈا جوان تاں موچھیں کوں ہر ہفتے خِذاب لیندے بھاویں جو سِر دے وال ڈھائے گئے ہنسی ول وی جیرھے ڈو تِیلے بچے کھڑے ہن اونہاں کوں کالا کیتی ودے۔۔تے تیکوں کہیں دھاڑ ھے توں وقت کولو پہلے بُڈھی تھیوݨ چاہندی ہیویں۔ ویسے وی مرد ذات دا کوئی پتہ لگدے جو او کیرھے ویلھے تہاڈے کولو دل چا گھنے۔۔کہیں بائی جاہ تیں منہ مارݨ پائے ونجے۔

سُگھڑ۔ اڑی مریں او مثال سُݨی ہیوی جو دریا کھٹیا نہ ہا تے سِسار پہلے آ ڳیا ہا۔ تیڈے چیتے اچ اینجھیاں گالہیں کائیں بھرِن۔ کُجھ ہووے نہ ہووے اساں پہلے ایں سوچ اچ پائے مروں جو ساڈا جوان کتھائیں بائی جاہ تیں سِنڳ پھسائی کھڑے۔تیکوں پتے شک روح دا کاݨ ھے جیرھا ہاؤلیں ہاؤلیں سارے وجود کوں کھا ویندے۔۔

ڈولی۔ ہا اے مرد تاں فرشتے ہوندن انہاں کوں اپݨی تریمت دے علاوہ باقی ساریاں تریمتیں بھیݨیں جاپدن۔ تیکوں نئیں پتہ اکثر مرد مورکھ ہوندن اے ہر ڈوجھی داڑھی اچ منہ مریندن تے شوں شوں لائی ودے ہوندن ۔ انہاں کوں روز ڈیہاڑے نویں بھاڃی چکھݨ دے ڈیڈھ اچ ولوڑ اُٹھدے رہ ویندن۔

سُگھڑ۔ ڈولی میکوں تاں ایویں لگدے جیویں توں جوانیں کولو زیادہ تریمتیں بارے ڈھیر شکی ہوویں۔۔!

ڈولی۔ تیڈا دماغ خراب ھے، تیکوں ہر گالھ اُلٹی لڳدی ھے، اصل اچ توں ہیک قسم دی اینجھی غُلامی دا شکار ہیویں جیندے اچ تیکوں راہوݨ دی عادت تھی گئی ھے۔

سُگھڑ۔ اینجھیاں عادتاں جنہاں دی وجہ کولو کہیں ڈوجھے ماݨس کوں کوئی تکلیف نہ ہووے اُنہاں عادتاں سانگے تیکوں کیہاں اعتراض ھے؟

ڈولی۔ تہاڈی ذات سب کولو اہم ہوندی ھے، اگر او کہیں مرد دی وجہ کولو گُم گار تھی ونجے تاں میکوں تکلیف تھیندی ھے۔

سُگھڑ۔ اے وی توں طے کریسیں جو کہیں دی ذات گُم گار ھے؟

ڈولی۔ ٻیا کون کریسی، نام نہاد مرد کریسن؟

سُگھڑ۔ میں تاں کہیں جوان یا تریمت دی بطور جینڈر کوئی گالھ ہی نئیں کیتی تیکوں ایویں کیوں لگدے جو ساڈے ہر ڈُکھ دے زمہ وار جوان ہن۔ کُجھ عقل کوں ہتھ مار تہذیبی ورثہ، رِیتی رواج، مقامی ورت ورتارے کُجھ باہرلی ” ٹرمز” کولو زیادہ معتبر تے اہم ہوندن۔ ساڈیاں لوک کہانیاں ، ساڈے قصے کہاوتاں ساڈی روح اچ وسدیاں ہوندن ، چھڑا دماغ کوئی شے نئیں ہوندا نہ ہی اوندے کڈھئے نتیجے ہر ویلھے خوشی دا سوب بݨ سگدن۔ خوشی ہیک رِیت ہوندی ھے جیرھی ساڈی روح اچ ہیک دھاڳے دی تند آلی کار تُرپیندی آندی ھے تے اوندے تروپے دے چِتر ہی ساڈے اکھیں کوں بھلے لگدے ہن تے انہاں چِتراں اچ ساڈی روح رسدی ھے۔

ڈولی۔ چنگی بھلی پڑھی لکھی تھی کے اینجھیاں گالہیں کریندی بیٹھی ہیویں بُڈ مر۔ فضول رِیتاں رسماں تے مردانہ سماج کوں توں ” روح دا چتریا چِتر” آہدی بیٹھی ہیویں۔ تیکوں اوں ڈکھ دا اندازہ ہی کائینی جیرھا کہیں تریمت تیں مرد زور زبردستی کر کے کریندے۔ تیڈا ریپ تھیا ہووے ہا میں تیڈے کولوں پُچھاں ہا جو ” چِتر کاری” کیا ہوندی ھے۔ میں مردیں تیں تے مردانہ سماج تیں لعنت لعنت بِھجیندی ہاں۔

سُگھڑ۔ ہیک تاں توں ہر گالھ کوں ، ہر ڈُکھ کوں مردانہ سماج تے مرد دی سوچ پاروں ڈیہدی ہیویں۔ یار کُجھ گالہیں ایویں ہوندیاں نئیں جیویں اساں ڈیہدے یا سوچیندا پائے راہندے ہیں۔ وڈے ایویں تاں نئیں آکھ گئے جو ” کڈاہیں کڈاہیں اکھیں ڈِٹھا تے کنیں سُݨیاں وی سارا سچ نئیں ہوندا۔ کڈاہیں اے سوچیا ہیوی جو ساڈے سماج اچ ” ریپ ” ناں دی کوئی چیز اج کولو چالہیہ پنجاہ سال پہلے ہائی، کڈاہیں اپنا ادب پڑھ کے ڈٹھا ہیوی جیندے اچ رشتیں دے تقدس کوں کیوں بیان کیتا گئے، بِھرا ، بھیݨ، بھرجائی ، ماسی ، ٻوا، سوتر ، مُلیر ، ہمسائے ما پیو جائے، اے سب وی تاں ایں مردانہ سماج دے سچ ہن۔ اجوکی دنیا دے کُجھ باہرلی سچ لازمی تاں نئیں ساڈی سوسائٹی واسطے وی بھاگ وند تے چنگے ہوون۔

ڈولی۔ میکوں اخلاقیات دا ڈھیر بھاشݨ نہ ڈے میکوں سارا پتہ ھے پیا، جیرھے سماج اچ اے مثال عام ہووے جو ” تریمت دا دماغ اوندے ڳٹیں اچ ہوندے” اوں سماج کوں میں آئیڈئیل من کے تیڈے آلی کار صبر شُکر کر کے بہہ ونجاں ، اے تھی نئیں سگدا۔

سُگھڑ۔ ہݨ ہیک نویں کہاوت وی تاں آئی ودی ھے جو ” جوان دا دِماک چڈیں اچ لڑکدا ودا ہوندے” اے ٹھیک ھے؟ یار کہی. وی سماج اچ ایکسٹریمزم چنگا نئیں ہوندا اے سماج دیاں پاڑاں پٹ کء اوکوں بالکل کھوکھلا کر ڈیندے ، ڈو قدم اساں آگاں ٹُروں ڈو قدم مرد پچھاں ہٹے ، اے گالھ ساکوں اٹکل نال کرݨی پوسی تے اپݨی دِھرتا تے تہذیب کوں وی چیتے اچ رکھݨا پوسی نہ تاں سوسائٹی اچ چھڑی ” ابزرڈٹی” ہی بچ ویسی۔

ڈولی۔ ابزرڈٹی مائی فُٹ۔ تیڈے جیہاں باندیاں ایں سماج کوں اگاں نئیں ودھݨ ڈیندیاں۔ ڈیہوں ڈیہنہ سماج گھٹن زدہ، ریپ زدہ، چوتیا تے بزاری تھیندا ویندے۔ تیکوں پتے اجوکی تریمت نہ گھر اچ مردیں دے شر کولو محفوظ ھے تے نہ ہی باہر اوکوں تحفظ ملدے، ٹیچر، ڈاکٹرز، ڈرائیورز، بوس، مالک مکان، پنڈت ، مولبی ، سیاستدان سارے دے سارے ہیکی میٹیلٹی نال تریمت کوں کہیں ” کوموڈٹی” آلی کار تریمت کوں ورتیندن۔۔!

سُگھڑ۔ تیکوں پتے ڈُکھ کہییں وہیند ( Trance) آلی کار سفر کریندے ، کجھ سیاݨے تاں اے وی آکھ گئے ہن جو ڈکھ یا ڈکھت واقعہ کہیں موذی وبا وانگ ساڈے دماغ کوں پکڑ کریندے تے اوکوں نشٹ کر کے رکھ ڈیندے ، جیرھا ساڈی ساءیکالوجی کوں ہمیشہ دے صدمے دا شکار کر ڈیندے۔ اللہ دی بندی سارا سماج ایویں نئیں جیویں تیکوں نظردے یا توں جیرھی اکھ نال ایکوں ڈیہدی ہیویں۔ توں سوسائٹی دی بُنیادی اکائی کوں ہی نفی کرݨ چاہندی ہیویں ، جینڈر ہیک مسئلہ ھے پر ایندا حل اے قطعا کائینی جیویں تیکوں سمجھ پیا آندے۔۔! توں بطور جینڈر ہیک اکائی دے وجود دے خلاف متعصب پن دا شکار ہیویں ۔۔! ایویں نہ سوچیا کر وقت کولو پہلے بُڈھی تھی ویسیں۔

ڈولی۔ اصل اچ پتا ھے تیڈا مسئلہ کیا ھے؟

سُگھڑ۔ ڈس کیا مسئلہ ھے میڈا؟

ڈولی۔ تیڈے پائے تیڈے نال وفا دار ھے تیکوں مردیں دے حرامی پن دا اندازہ ہی کائینی۔

سُگھڑ۔ تے تیڈا پائے تیڈے نال چنگا کائینی؟

ڈولی۔ میسݨا ، کہیں نہ کم دا ٹھڈا ڃل۔