کہانی چرنوبیل ایٹمی پلانٹ اچ تھائے حادثے دی!!!۔۔۔۔۔|| ذلفی

اے کہانی چرنوبیل ایٹمی پلانٹ اچ تھائے حادثے دی ھے جیرھا سن چھیاسی اچ تھیا ہائی۔ اوں زمانے روس سوویت یونین ہوندا ہائی تے امریکہ بہادر تے سوویت یونین دی آپت اچ بہوں کھٹ کھٹ راہندی ہائی جیکوں ” سرد جنگ” وی آکھیا ویندے۔

روس دی خفیہ ایجنسی کے جی بی اوں ویلھے دنیا دی بہوں طاقتور تے خطرناک ایجنسی سمجھیں ویندی ہائی تے اوندا کنٹرول مُلک دے اندر وی بہوں ہائی تے باہر وی پراکسی جنگیں اچیں او اپݨی جنگھ اڑائی رکھدی ہائی۔ سوویت یونین چندر تیں پہنچ چکیا ہائی رشئین ٹیکنالوجی دنیا اچ مشہور تھیندی ویندی ہائی۔ تے ڈوجھی پاسوں انکل سام دے ڈیڈھ اچ ولوڑ ہن او وی اپݨے طریقے نال دنیا اچ اپݨے کالونئیل عزائم دا پرچارک ہا۔ ایہو دور ہا جڈاں نیوکلئر ٹیکنالوجی تے اوندے استعمال تیں انہاں ڈو وڈے مُلکیں دے وسائل خرچ تھیندے پائے ہن تے ایں ٹیکنالوجی کوں جنگی عزائم کولو گھن انرجی دی ضروریات پوری کرݨ سانگے ورتݨ دے وڈے وڈے منصوبے ہن کیوں جو اوں ویلھے انڈسٹری دا نواں نواں جِن بوتل کولو باہروں نکل چکا ھا تے مارکا چِھتے تھائے ودے ہن۔

سوویت یونین اپݨی انرجی دی ضرورت پوری کرݨ سانگے 18 نیوکلئیر پاور پلانٹ نصب کر چُکا ہا تے انہاں کولوں فائدہ وی چیندا پیا ہا۔

انہاں پلانٹس اچوں ہیک دا ناں چرنوبیل ہا جیرھا اجوکے یوکرین دے کیپیثل کیف دے نیڑے ہیک قصبے دے ناں تیں ہا۔

26 اپریل چھیاسی اچ ہیک بہوں وڈے انسانی المئے کوں ڈٹھے جو اے پلانٹ اچانک ہیک دھماکے نال پھٹ گئے تے تابکاری بے قابو تھی کے 2600 کلو میٹر دے علاقے کوں تباہ و برباد کر ڈتے۔ جیندے اچ 93 ہزار لوک مر گئین تے بے تحاشا جنگلی جانور تے پودے پکھی وی بُھسم تھائے گئے ہن۔ 3 لکھ لوک ہجرت کر کے اچانک سب کجھ چھوڑ کے منہ کر گئے تے پورا علاقہ دوزخ کولو گھٹ کائینا ہا۔ اگر کوئی پودا ایں علاقے اچ بچ گیا ہا تاں اوکوں مار ڈتا گیا، جانور یا کوئی زندہ چیز جیرھی ہالی ساہ جوگی بچی ودی ہائی اوکوں گولی مار ڈتی گئی تاں جو تابکاری دے اثرات مزید نہ کھنڈن۔

ول انسان دا او روپ وی تریخ ڈٹھے جیندے اچ انسانیت اپنا کم ڈکھیندی ھے۔ 6 لکھ رضا کار ایں علاقے اچ کم کرݨ واسطے کٹھے تھائے جیندے اچ اکثر کینسر یا ڈوجھیں تابکاری نال جُڑیل بیماریاں دی وجہ کولو مر سُتے یا مفلوج تھی گئے پر انہاں اپنا کم جاری رکھیا۔

ایں ڈاکومنٹری فلم اچ بہوں ہی ہولناک قسم دیاں کہانیاں ہن جیرھیاں ساکوں سوچݨ تی مجبور کریندن تے ایں فلم دی سب کولو اہم تے دلچسپ گالھ اوں ویلھے دے کیمونسٹ ملک دی بیروکریسی دا رویہ تے اپروچ ھے۔ جیرھی ایڈے وڈی ٹریجڈی تھیوݨ دے بعد وی اپݨی پروموشن دے چکر اچ ہائی تے ول ریاست دی انا تے طاقت کوں برقرار رکھݨ سانگے جیرھا کھیڈ ریاست کھیڈے او وی بہوں خوفناک ھے۔ جی دے اچ ڈکھایا گئے جو بیروکریسی کیویں کم کریندی ھے، کیویں حقائق کوں ریاستی وسائل استعمال کر کے مسخ کیتا ویندے، کیویں میڈیا کوں کنٹرول کر کے پروپیگنڈہ تھیندے۔۔

اے سب کجھ اج وی تھیندا پائے اج وی امریکہ کولو گھن یورپ تئیں تے یورپ کولو گھن جہان تئیں وڈیاں وڈیاں ریاستاں سچ کوں لوکیندن بھاویں عام لوکیں نال جو پیا تھیوے۔ ایں سیریز کوں ڈیکھݨا چاہیدا ھے۔ میں ایکوں 10 اچوں 9 نمبر ڈیساں۔ بہوں ہی شاندار قسم دا تاریخی سچ تے اوندا ورتارا ۔۔