میڈی وستی، (پنجویں لڑی)۔۔عبدالباسط بھٹی

میں چلہا چھلݨ کیتے پہلے ہک،، تݙی،، چاتی تے ہک، کھوڑی،، میݙا ہک مسات میݙے نال رل ڳیا، کیوں جو دیسی چلہے دی،، کھلڑی،، زری کراڑی ہوندی ہے چنگا بھلا زور لڳدے، چلہا چھلݨ دے دوران،، کاں،، کاں، کاں کریندے سامݨے آ ٻاھندے میں جینویں ای کھنب پرے سٹیندا چاء تے اݙ ویندے، کجھ لحظے بعد،، ہلیں،، دا جوڑا وی آسمان تے نظر آندا،،، ہل،، لحظہ ہک فضا اچ چکر مریندی تے ول یک دم،، شت،، مار کھنباں دی مٹھہ کوں جھپٹی مار سامݨے ٹالھی تے ونج ٻاہندی تے انھاں کھنباں نال لڳے کھل دے ٹوٹے کھاندی، چلہا صاف کریندے کریندے،، کویلیاں،، دی ہک ٹولی وی پڑھچے تے آ چڑھدی تے آپݨے حصے دا رزق ڳولیندی

جینویں میں پہلے عرض کیتے ساݙی وستی ہک گھر وی پکا نہ ہا ساریاں سالھیں ہن، ساݙے ویڑھے دی ہک چنݙ،، بھوں،، دا پلا ہا تے اوندے نال ہک کچی،، کھڈی،، ھئ، کھݙی کیا ھئ کچیاں سلھاں دی اساری ھئ، کھݙی دی چھت تے،، ککھ کلنجر،، ھن جینکوں،، گارے،، دا لیپا ݙتا ہویا ہا، کھݙی دی دری وی کوئ ڈھیر وݙی نہ ھئ بس ہک نکا جیہاں،، ڳلا،، ہا جتھوں بندے دا چھڑا سر یا ہتھ اندر ونج سڳدا ہا، دری دے سامݨے ݙوں نکیاں نکیاں،، کلیاں،، ٹھوکیاں ہویاں ھن جنھاں دے اڳوں پھٹی رکھ کھݙی بند کیتی ویندی ھئ کیوں جو رات کوں،، ٻلیاں،، تے،، نولواں،، دا ݙر لڳدا ہا،

ایہ تاں ہے سیالی رت دی ڳالھ،، ہنالے،، اچ ساݙیاں ککڑیں گھر دے تھلے تے بݨی،، ڈھاری،، یا،، ٹانویں،، تے چڑھ ٻاھندیاں ہن اتھاں وی یکا ݙر راھندا ھا کیوں جو اتھاں اندھاری رات اچ گیدڑ پڄ ویندے ہن گیدڑاں کوں جیڑھیلے موقعہ ملدا او ہک ادھ ککڑ ضرور چاء ویندے ہن، ایں موقعے تے ساݙے کتے وی بھڑدے تاں ھن لیکن بکھ دے اختے تھے گیدڑ کتیاں نال،، ٻھتی،، ضرور ݙیندے ھن،

میں عرض کیتے،، چیتر رت،، رتاں دی سردار رت ہے ایں رت جمل جہان دے پھکی انݙے لیہندن تے ٻچے کڈھیندن، اساں ونجوں جو ہا مال چراوݨ ساکوں ہر وݨ تے آلھݨیاں اچ،، چوڳ،، گھندے ٻچے نظردے،

سبحان اللہ، ایہ پکھی وی عجب مخلوق ہن نہ پکا گھر بݨاون نہ کیہں کوں ݙکھاون رنجاون نہ کیہں دا برا سوچن، پکھیاں دے ٻچے وی یکا عزاب اچ راھندن کڈاہیں مینہ وا کݙاہیں ناڳ دا ٻچے کھاوݨ کڈاہیں کانواں دا حملہ آور تھوݨ بعض دفعہ چھوٹے ٻچے آلھݨیں اچوں ڈھے کویلیاں دا رزق بݨ ویندے تے کجھ اݙراک تھی آپݨی نویں دنیا ونج وسیندے