ٹُکڑیاں کجھ زندگی دیاں۔۔۔۔۔۔|| ذلفی

کجھ یاداں ساڈی زندگی اچ ایویں رچ وس ویندن جو آو ناسٹلجیا اچ اولوں بݨ کے پھردیاں رہ ویندن۔ کہیں ویلھے اے اولوں ساڈے چیتے اچ مینہ دے بعد اسمان آلی کار صاف تھی کی تاریں آلی کار جھل مِل لا ڈیندن۔

انہاں یاداں اچ ریڈیو ہیک اینجھی یاد ھے جیرھی اج وی ساڈے جہیں لوکیں دے چیتے اچ چِتری لاتھی ھے۔ سویلے اُٹھوں ہا تے ریڈیو ملتان لاؤن ہا، ریاض میلسی ، خورشید ملک دیاں چسولیاں گالہیں سݨوں ہا تے حسینہ ممتاز، قمر اقبال، منصور ملنگی، جمیل پروانہ، نصیر مستانہ، ثّریا ملتانی تے پٹھاݨے خان دیاں مُدھر آوازاں کنیں اچ سُراں دے رس گھولن ہا۔ ول آکاش واݨی لاؤں ہا تے لتا، رفی، مُکیش، منا ڈے تے آشا بھوسلے کوں سُݨوں ہا تے میوزک دا سواد آ ونجے ہا۔ اُنہالے مہینے اچ کہیں وݨ دی چھاں تیں کھٹڑی سٹ کے ریڈیو سُݨدے سُݨدے سُکھ دی بے چِنت نندر آ ونجے ہا۔ شام کوں اُٹھوں ہا وت ریڈیو کوں میڈیم ویو کولو شارٹ ویو تیں لاؤں ہا تے ساکوں آل انڈیا ریڈیو لبھ پووے ہا اوکوں سݨو ہا ۔ شارٹ ویو تیں چینل گولݨ ویلھے چنگا بھلی محنت کرݨی پوندی ہائی۔ کتھائیں عربی چینل وی آ ونجن ہا تے کجھ انگلش چینل وی لبھ پوندے ہن۔ ایویں کم کار کریندیں تے ریڈیو سݨدے ڈیہنہ چنگا لنگھ ویندا ہائی۔۔شام تھیوے ہا ڈیہنہ ٹھر جُلے ہا تے وت ڈنگریں ڈھوریں دا گھا پٹھا وی کروں ہا تے ریڈیو وی کچھ اچ ہووے ہا۔ بنی آباد تھیوے ہا تے بھرئیے بند دی کٹھ تیں بہہ کے ریڈیو سݨݨ دی اپݨی چس ہوندی ہائی۔ ڈیہنہ لاہوے ہا تے چُلھ تیں کٹھے تھی باہوں ہا اماں دے ہتھ دی پکی روٹی بھاجی وی ڈاڈھی چس ڈیندی ہائی۔ رات دی وت اپݨی چس ہوندی ہائی کچہریاں آباد تھی ونجن ہا، سارے ڈیہنہ دیاں گُزریاں ویہاݨیاں سُݨوں ہا، ٻٹاں لگن ہا، حقے دے کش ، بازی دے پِڑ تے گزر گزران دیہاں گالہیں۔ گھر اچ ملک، مہر دا پروگرام چلے ہا، شام کوں اٹھ وجن ہا تاں وت ریڈیو گھروں چویج کے بیٹھک تیں آ ونجے ہا، بی بی سی سارے شوق نال سُݨو ہا، سیربین اچ شفعی نقعی جامعی، رضا علی عابدی ، وسعت اللہ خان، لاہور کولو شاہد ملک، مہ پارہ صفدر، سدھو بھائی، شیر دریا ، بچہ جمہورا ہیک رونق ہوندی ہائی گھنٹہ پورا ڈاڈھی چس آندی ہائی۔ وت نو وج ونجن ہا تاں کجھ لوک کچہری بہہ ونجن ہا تے کجھ اپݨے اپݨے گھریں دو بالیں نال ٹائم ونج پاس کرن ہا۔ اساں ڈاڈے آو ریڈیو سنبھال گھنو ہا تے ول آل انڈیا ریڈیو ، آکاش واݨی، سری لنکا دا سیلون ریڈیو، ایران دا ریڈیو اصفحان سݨدیں سݨدیں نندر آ ونجے ہا۔۔کڈاہیں کڈاہیں ریڈیو تیں کوئی ڈرامہ وی لگدا ہا اوکوں شوق نال سُݨدے ہاسے ڈاڈھی چس آندی ہائی۔۔اوں دور اچ آخر شب ہیک پروگرام لگدا ہا اوندے اچ بہوں کلاسیکل قسم دی موسیقی ہوندی ہائی او وی سݨدے ہاسے۔ وت کجھ پنڈت آ ونجن ہا انہاں دے راگ گھنٹے گھنٹے دے ہوندے ہن او وی سݨوں ہا، اُتھوں کولو پتہ لگا جو کلاسیکل میوزک ہوندی کیا ھے۔ راگ ملہار ، مالکوس، درباری تے بیا بہوں کجھ ہووے ہا ڈاڈھا نشہ پک پووے ہا۔۔ریڈیو روح کوں زندہ رکھدا ہا، تربیت کریندا ہا، معلومات ڈیندا ہا تے نندر پواوݨ دا بہوں وڈا ذریعہ ہوندا ہا۔ اج نہ او ریڈیو ھے، نہ او وقت ھے، نہ او بنی ھے، نہ او کچہریاں ہن، نہ او پیار محبت ھے، نہ او نانی ھے تے نہ ڈاڈا ۔۔! ہیک اوپرپ ھے، ابزرڈٹی ھے، بے ہنگم قسم دا سوشل میڈیا ھے۔۔! نہ سچ ھے نہ کوڑ ھے سب دھوڑ ھے۔۔