بھاویں سہی سچ مر گئے ہیں۔۔۔۔۔|| ذلفی

ہیک تجربہ اے تھائے جو بندہ جیرھے ویلھے مر ویندے اوکوں پتہ نئیں ہوندا او مر گئے۔۔! مثال طور تیں تہاڈے ساڈے وچوں کئی اینجھے لوک ہن جیرھے واقعی مر گئے ہوسن پر ساکوں تہاکوں اوندا پتہ وی کائینا ہوسی۔۔! چوہیں تیں تجربہ کرݨ نال اے گالھ نشابر تھائی ھے جو دماغ ہیک خاص حالت کوں فریم کر کے ساڈی میموریز اچ ابسٹرکٹ ائیڈیا بݨا کے چھوڑ ڈیندے۔ او آئیڈیا ساڈے چیتے اچ اتنا پُختہ ہوندے جو اساں بھاویں مر گئے ہووں پر اساں فکر مند ہوندے ہیں۔ خاص کر ریسرچ اچ اے گالھ سامݨے آئی ھے جو جیرھے لوک اپݨی زندگی اچ ہیک مستقل ٹھہراو محسوس کریندن، جیرھے ہر ویلھے بغیر وجہ یا ریشنیلیٹی دے کہیں نہ کہیں پھاتݨ اچ ونج پھسدن، جیکوں لگدے جو اساں بالکل کہیں کم دے نسے ساڈے کولوں کوئی مسئلہ حل نئیں تھیندا ، جیرھے مختلف آپشنز تیں سوچݨ چھوڑ ڈیندن ، جنہاں دی یاداشت بالکل لُل تھی ویندی ھے، جیرھے ہر پاسوں ڈارک انرجی کوں محسوس کریندن تے ہر قسمی آہر جا ترلے کولو تراہندن ، سمجھو او اصل اچ موئے لاتھن اونہیں کوں پتہ ہی کائینا ہوندا۔۔! اونہاں کوں لگدے او ٹُکُر وی کھاندن، گھر آلیں نال وی الویندن ، سردی گرمی محسوس کریندن پر خوشی نئیں محسوس کریندے تے سائینسدانیں آکھئے او اصل اچ ڈیڈ ہوندن پر اُنہاں دے دماغ دا آئیڈیا ہیک فریم آلی کار کہیں کیمرے دی ریل اچ محفوظ فلم وانگ ہیک چرخی تیں پھردا پیا ہوندے۔۔! سائنسدانیں ایں ریسرچ اچ اے وے آکھئے کو ساڈی آبادی 8 ارب نئیں نہ ہی اتنا آبادی ایں ارتھ تیں کہیں ہیک وڈی نوع دی ممکن ھے۔۔! ساڈی زیادہ کولو زیادہ جیرھے صحیح سلامت واقعی زندہ ہن اُنہاں دی آبادی ہیک ارب آو زیادہ ونج وی نئیں سگدی۔۔باقی ست ارب لوک زندہ نئیں او موئے ہوئے ہن بس دماغ دے آخری ائیڈیا تیں یکی رنگی زندگی دے گھن چکر اچ بھلاؤندے ودے راہندن۔۔او آہدن انہاں کوں زندگی کوئی موقع ڈیندی ھے تے نہ ہی انہاں اچ کوئی صلاحیت باقی بچی ہوندی ھے جو او کہیں پیچیدہ مسئلے دا حل کڈھ سگن۔ کیا پتے تساں اساں وی دماغ دا آخری ائیڈیا ہووں ، تے اصل اچ زندہ نہ ہووں۔۔! اونہاں اچوں کجھ سائینسداناں اے گالھ وی اپنی ریسرچ اچ لکھی ھے جو جیرھے مردہ لوک ہوندن اونہاں کوں کڈاہیں کڈاہیں ایسے واقعات سامݨے آ ویندن انہاں کوں لگدے اے تاں پہلے تھی چکا ہا۔۔! مطبل کوئی ان ڈٹھی جاہ، یا واقعہ جیرھا دراصل پہلی واری تھیندا پیا ہوندے پر مردہ بندے کوں ایویں لگدے جیویں اے جاہ یا واقعہ او پہلے ڈیکھ یا ابزرو کر چکا ہووے۔۔! پتہ نئیں اے رولا کیا ھے۔۔! سمجھ نئیں آندی پائی بھاویں تاں سہی وچ مر گئے ہیں۔۔!