تانگھ|| ذلفی

۔

کالی بکری ساوے گھا کھا کے بنبݨ پلی پائی ہائی۔ نیلے ہُنب اسمان تیں چٹیاں کھیر بدلیاں باکر وال اچ پیاں کٹھیاں تھیندیاں ہن، بھاگ بھری چٹے چولے تیں سیپ پائی بھریندی ہائی۔ بھاگ بھری دا گھر کچے گارے دا بݨیا ہویا ہائی ، نیلے اسمان دا رنگ تے اوندے گھر دے کندھیں دا رنگ ہیک جہیں ہن۔ پولے ماریاں اے کندھیاں ڈاڈھیاں سوھنڑیاں لگدیاں پیاں ہن، ہیک پاسو سفیل تیں سوھݨے سوھݨے تھاں تِھپے لاتھے ہن۔ تے سفیل تیں ہتھ دے سیپ نال سیتا چٹا پوش گھتیا کھڑا ہا تے اوندے اُتیں رتے رنگ دے دھاگے نال سیپ کڈھیا ہویا ہائی۔ سفیل دے ہیٹھو ہیک منھی ہائی جیندے اُتیں کُجھ ٹرنگ لاتھے ہن تے او ٹرنگ وی جھالر آلیں پردیں نال کجے پائے ہن۔ اونہاں ٹرنگاں اچ بھاگ بھری دے ورھی سوئی دا کجھ سمان لاتھا ہائی۔ منھی کوں ڈو چھوٹیاں چھوٹیاں دریاں لگیاں ہوئیاں ہن تے اُتھاں جھانولی، کُٹ دا مُنگُر ، ہیک چھج، داوری ڈنڈکی تے کجھ بیاں سِتراں سوگھیاں تھیاں لاتھیاں ہن۔ گھر دے صحن اچ گھڑاونج تیں ڈو گھڑے لاتھے ہن، باہروں لکڑ دا ہیک ٹنگڑا وی کھڑا ہائی جیندے اُتیں کجھ تھاں تِھپے ٹنڳے کھڑے ہن، جیندے اچ ہیک دَکھی، ہیک ججھری، ڈو مٹی دے لوٹے تے ہیک مَٹی ہائی۔

گھر دے ڈوجھی پاسوں ڈنگریں دی بندُر ہائی تے اوندے نال ترائے خالی کِلے ثھوکیے کھڑے ہن۔ گھر دا ویڑھا بہوں کُھلا ہائی تے اوندے اچ ہیک ڈھانڈل بیر چھاترا ماری کھڑی ہائی۔ اوں بیر تیں چیڑیں دا چلکار ہائی تے بھاگ بھری دا من ایویں بیر آلی کار ساوا کچوچ ہائی۔

گھر دی ہیک چُنڈ اچ کلھوٹی ہائی، ڈوجھی چُنڈ اچ پَلا ہائی بھوں آلا تے اوندے نال رلدڑ کُکڑیِں دی کُھڈی ہائی۔ گھر دے ادھ اچ ہیک وڈی ساری تَھلی ہائی اوندی ہیک چُنڈ اچ تنور پوریا پیا ہائی ، ہیک چُلھ گھتی پائی ھے، تے اوندے ہیک پاسوں وڈا سارا ٹانواں بݨیا کھڑا ہائی جتھاں رات کوں کُکڑیں چڑھ باہندیاں ہن۔ تھلی دے ہیک پاسوں چُلھا ڈتا کھڑا ہا تے اوندے آخری نُکُڑ تیں ٹوکری اچ لے ڈتے مٹی دے برتن بلکدے لاتھے ہن۔

بھاگ بھری سیپ سیندیں سیندیں سِر اُتیں چاتا اسمان دو ڈٹھس تے اسمان تیں سِجھ کوں پِڑ پیا کھڑا ہائی، ڈو مچھلے وی پاتی کھڑا ہائی نال نال چھوٹیاں چھوٹیاں جھٹ دیاں بدلیاں تیتر کھنبیاں بݨ رغام دی ڈس پیاں ڈیندیاں ہن۔ بھاگ بھری کوں پتہ لڳ گیا جو بارش نیڑے ھے۔۔! اوں جلدی جلدی سیپ آلے کپڑے سوگھے کیتے، کاٹھیں دیاں تھبیاں چا کے بھا آلی کوٹھی اچ رکھیاں، تݨا تیں ٹنگے کپڑے لہائے، تنور تیں پاتری ڈتُس تے اپݨی بنبݨ پلی بکری کوں بھاݨے اچ ونج ٻدھس۔ اجاں او بکری ٻدھ کے آندی پائی ہائی تاں اوکوں ہوا دا ٹھڈا ٹھار جھولا محسوس تھیا تے اوں جھولے اچ بارش دی خُشبو سنگھ گھدی۔ باکر وال اچ جھڑ کالا دھوں تھیا پیا ہا، سجھ کوں بدلیاں کج ڈتا ہا تے کھیمݨ دے لسکارے اسمان تیں لسکدے ڈسݨ پائے ڳئے۔ ساوݨ دی سغراند لڳ گئی ہائی، جھڑ سڃے پھیر ٹور بدھی تاں بھاڳ بھری دے من اچ ہیک ہوک اُٹھی جو چاندݨ اینجھے موسم اچ کیا پیا کریندا ہوسی۔۔!